Óskar Víkingur efstur í sínum flokki

Það gekk ekki vel í fjórðu umferð Norðurlandamótsins í skólaskák sem fram fór í gær. 4 vinningar komu í hús. Símon Þórhallsson (b-flokkur) og Óskar Víkingur Davíðsson (e-flokkur) unnu sínar skákir. Óskar Víkingur er efstur með 3,5 vinning. Símon og Vignir (d-flokki) eru í þriðja sæti í sínum flokki.

Danir fóru uppfyrir Ísland í landskeppninni. Danir hafa 25 vinninga en Íslendingar hafa 24,5 vinninga. Þessar þjóðir hafa algjöra yfirburði. Norðmenn eru þriðju með 21,5 vinninga. 

 

Staða íslensku keppendanna:

 

Fimmta og næstsíðsta umferð er nú í gangi. 

• Heimasíða mótsins
• Chess-Results

 

Barna- og unglingameistaramót Reykjavíkur fer fram í dag

Barna- og unglingameistaramót Reykjavíkur, sem og Stúlknameistaramót Reykjavíkur, fer fram sunnudaginn 21. febrúar í félagsheimili T.R. Faxafeni 12.

Taflið hefst kl.14 og stendur til ca. kl. 18. Tefldar verða 7 umferðir eftir svissnesku kerfi með umhugsunartímanum 15 mín. á skák.

Teflt verður í tveimur flokkum: opnum flokki og stúlknaflokki.

Verðlaun verða veitt fyrir þrjú efstu sætin í mótinu og þar fyrir utan hlýtur sigurvegarinn titilinn Unglingameistari Reykjavíkur 2016, sé hann búsettur í Reykjavík eða félagi í reykvísku taflfélagi.

Einnig verða veitt verðlaun fyrir þrjár efstu stúlkurnar og þar fyrir utan hlýtur efsta stúlkan titilinn Stúlknameistari Reykjavíkur 2016, sé hún búsett í Reykjavík eða félagi í reykvísku taflfélagi.

Til viðbótar verða veitt verðlaun fyrir efsta sætið í árgöngum 2000-2001, 2002-2003, 2004-2005, 2006-2007 sem og 2008 og yngri í báðum flokkum (opna flokknum og stúlknaflokknum).

Mótið er opið öllum krökkum sem eru fædd 2000 og síðar.

Núverandi Reykjavíkurmeistarar eru Vignir Vatnar Stefánsson og Svava Þorsteinsdóttir.

Skákmótið hefst kl. 14 og er aðgangur ókeypis.

Við minnum á að mótið er hluti af stigakeppni félagsins sem er í gangi út febrúar þar sem litið er til ástundunar og árangurs. Hér má rifja upp fyrirkomulag stigakeppninnar.

Skráningarform

Skráðir keppendur

Skákþáttur Morgunblaðsins: Þrír efstir á sterkasta innlenda móti ársins

Guðmundur Kjartansson stóð best að vígi þegar ein umferð var eftir á Gestamóti Hugins og Breiðabliks sem staðið hefur yfir undanfarnar vikur en þar er tefld ein umferð í viku hverri. Fyrirkomulagið, sem skákfrömuðurinn Jón Þorvaldsson á mestan heiður af, nýtur mikilla vinsælda; þetta er sterkasta innlenda mótið sem haldið er á ári hverju. Sú stefna var tekin strax í upphafi þessa mótahalds að birta ekki skákir mótsins opinberlega og virðast keppendur hæstánægðir með það.

Aðstæður í stúku Breiðabliksvallar eru til fyrirmyndar. Teflt er í tveim riðlum og í A-riðli þar sem keppendur hafa meira en 2000 alþjóðleg elo-stig var staðan fyrir lokaumferðina þessi:

1. – 3. Guðmundur Kjartansson, Halldór Brynjar Halldórsson og Magnús Örn Úlfarsson 4 v. (af 5) 4.- 7. Stefán Kristjánsson, Guðmundur Gíslason, Þorsteinn Þorsteinsson og Halldór G. Einarsson 3 ½ v. 8. – 15. Dagur Ragnarsson, Ingvar Jóhannesson, Þröstur Þórhallsson, Björn Þorfinnsson, Andri Áss Grétarsson, Björgvin Jónsson, Örn Leó Jónsson og Jón Trausti Harðarson 3 v. 37 skákmenn hófu keppni.

Í B-riðli var Dawid Kolka efstur fyrir lokaumferðina með 4 ½ vinning en næstir á eftir honum komu Bárður Örn Birkisson og Snorri Þór Sigurðsson. Þar hófu 28 skákmenn þátttöku.

Frammistaða Halldórs Brynjars og Magnúsar Arnar vekur einna mesta athygli en Halldór vann fallegan sigur á Birni Þorfinnssyni í 5. umferð. Magnús Örn hefur löngum þótt harður í horn að taka en Guðmundur Kjartnasson vinnur að því að ná 2500 stigum sem þarf til að fá útnefningu stórmeistaratitils. Stigasöfnun gengur vel á þessu móti en hann lækkaði hinsvegar eitthvað á Skákþingi Reykjavíkur á dögunum. Sá keppenda sem hefur hækkað mest á stigum er hinsvegar Vignir Vatnar Stefánsson. 

Margeir Pétursson tefldi á minningarmótinu um Paul Keres

Fáir skákmenn hafa notið jafnmikillar hylli í heimalandi sínu og eistneski stórmeistarinn Paul Keres. Hann þótti manna verðugastur þess að hampa heimsmeistaratitlinum en grimm örlög, hernám nazista í Eistlandi og síðar innlimun í Sovétríkin, höguðu því svo að hann náði ekki því marki þó oft hafi hann komist nálægt því. Nú þykir sannað að í fyrstu atlögu Keres að titlinum, heimsmeistaramótinu í Haag og Moskvu árið 1948 þar sem fimm fremstu skákmenn mættust í kjölfar andláts Alexanders Alékín árið 1946, hafi hann teflt undir hótunum Sovétmanna og verið þvingaður til að tapa í fjórum skákum fyrir Mikhail Botvinnik sem í lok mótsins var krýndur heimsmeistari. 

Á öflugu atskákmóti sem haldið var í Tallinn í byrjun þessa árs í tilefni þess að þann 7. janúar sl. voru 100 ár liðin frá fæðingu hans, sigraði Lettinn Igor Kovalenko og varð fyrir ofan menn á borð við Peter Svidler og Boris Gelfand, hlaut 9 ½ vinning af ellefu. Meðal þátttakenda í Tallinn var Margeir Pétursson, hlaut hann 6 ½ vinning af 11 mögulegum og varð í 48. sæti af 178 keppendum.

Mótið var hluti af viðamikilli dagskrá þar sem eitt og annað úr ævi Keres var dregið fram. Þar kom t.d. fram að hinn ungi Paul Keres lagði stund á skákdæmagerð og hér koma tvö dæmi sem hann gerði 13 og 16 ára:

Keres 1929 

Hvítur mátar í 2. leik

 

 

 

 

 

 

 

Keres 1932 

Hvítar mátar í 3. leik.

 

 

 

 

 

 

Lausnir birtast í næsta pistli. 

Grein þessi birtist í Morgunblaðinu 13. febrúar 2016

Skákþættir Morgunblaðsins

Frábært gengi í þriðju umferð - efstir í landskeppninni

Það gekk frábærlega í þriðju umferð NM í skólaskák sem fram fór í morgun í Vaxjö í Svíþjóð. Átta vinningar af 10 mögulegum komu í hús og engin skák tapaðist! Vignir Vatnar Stefánsson er efstur með fullt hús í c-flokki og Óskar Víkingur Davíðsson og Róbert Luu eru efstir með 2,5 vinninga í e-flokki. 

Íslendingar náðu góðri forystu í landskeppninni en þeir hafa 20,5 vinninga. Danir eru aðrir með 18 vinninga og Norðmenn þriðju með 17 vinninga.

Staða íslensku keppendanna:

Úrslit 3 umferðar:

Fjórða umferð hefst kl. 14. Þá mætast Hilmir og Nansý innbyrðis sem og Óskar og Róbert 

• Heimasíða mótsins
• Chess-Results

 

NM í skólaskák - Pistill frá liðsstjóra

Það er alltaf töluverð eftirvænting sem ríkir þegar líða fer að NM í skólaskák. Þó sannarlega megi fullyrða að þetta mót sé ekki jafn spennandi og Heimsmeistaramót er alltaf "eitthvað við þetta" mót sem haldið hefur verið frá 1981. Það var sterkur hópur skákungmenna sem hélt í hann í gær frá Leifsstöð í félagi við fimm foreldra, fararstjóra og þjálfara. Sjaldan hefur hópurinn verið jafn þéttur og nú. Ferðalagið til Kastrup gekk vel og eftir að hafa brunað yfir hina margumtöluðu brú milli Köben og Malmö var stefnan tekin rakleiðis á stoppistöðina við Lessebo. Lestarferðin var þægileg og tók rétta þrjá tíma. Á Lessebo beið eftir okkur hinn heltrausti Hakan Jelling sem er formaður Skákfélagsins í Vaxjö. Vaxjö er sumsé 90.000 manna borg. NM fer fram í Kosta sem er um 1000 manna bær rétt hja Vaxjö. Hér í Kosta er ein þekktasta gler- og kristalframleiðsla veraldar. Á hátíðarkvöldverði í gærkvöldi hvar var boðið upp á sænskar bjúgur og frikadeller af gamla skólanum var einmitt mikill glerlistamaður sem sýndi hvernig maður á að bera sig að í hinum ýmsu glerkúnstum.  

Aðbúnaður er með miklum ágætum þótt hann hafi verið betri á NM. Hópurinn gistir í bústöðum á svona sumarhúsahóteli. Þar eru flestir keppendur en Norðmenn ákváðu þó að létta aðeins á Carlsen-gullinu og keyptu sér gistingu á skákstað. Bústaðirnir eru alveg nýir og flott hannaðir. Það er hins vegar nokkuð þröngt um nokkra í hópnum þar sem allt að fjórir eru í bústað sem varla 30 fermetrar. Aukin heldur er ekki net í bústöðunum heldur einungis í lobbíinu. Aðstaðan á skákstað er hins vegar afar góð. Skáksalurinn í raun 100% og fínasta aðstaða fyrir aðstandendur. Taflmennskan fer sumsé fram hérna á Kosta Art Hotel sem er líklegast fimm stjörnu hótel með gler og kristal út um allt. Hér er svo hið fínasta spa og rækt og járnarífingar hjá undirrituðum framundan í upphafi næstu umferðar. Það er um 1.5 km milli gisti- og skákstaðar sem er vel þolanlegt og hægt að labba. Hinn heltrausti Hakan og hans menn hafa hins vegar tryggt transport á milli sem lýsir vel viðmóti þeirra að halda þetta mót á sem bestan hátt. Sjaldan hef ég kynnst jafn góðu viðmóti hjá umsjónarmönnum og ljóst að Hakan hefur líklegast gengið í gegnum einhverslags sósíal-demókrataískan skipulagsskóla og kynnt sér þjónandi forystu út í ystu æsar. 

Engin skák er í beinni sem er mikil synd. Ástæðan er sú að samhliða NM er skákfélagið í Vaxjö að halda Grand-Prix í Vaxjö. Þeir reyndu að færa til mótin en það bárust einhverjar mótbárur frá NM-þjóðunum svo það var ekki hægt að verða við því. Skákstjórn er í traustum höndum hjá félaga okkar Guðmundi Sverri Þór. Við Helgi Ólafs skiptum verkum með okkur þannig að ég sinni almennum skipulags- og rótarastörfum fyrir hópinn og hann tekur að sér fræðistörf á sviði skáklistarinnar. Skákirnar eru í gangi núna niðrí skáksal og fóru ágætlega af stað fyrir okkar krakka. Óskar Víkingur vann skiptamun snemma og hinir voru meir og minna að tefla byrjanir sem hentuðu þeim. Foreldrar hafa verið duglegir við að taka myndir og setja á facebook, ég er ekki jafn vel vopnaður á því sviði.

Stefán Steingrímur Bergsson

• Heimasíða mótsins
• Chess-Results

 

Guðfinnur sigurvegari Eðalskákmóts Magga Pé

Æsir tefldu sitt Eðalskákmót í gær. Þetta mót er kennt við höfðingjann Magnús V Pétursson sem átti hugmyndina af því og gefur öll verðlaun. Teflt er um farandbikar. Valdimar Ásmundsson vann hann í gær í þriðja skipti í röð og hefur þá unnið hann til eignar.

Það mættu heiðursmenn til leiks í gær, en það voru aðeins tíu af þeim sem áttu rétt til verðlauna.

Það er vegna þess að menn verða að vera orðnir 75 ára eða verða það á árinu til þess að kallast Eðalskákmenn.

Maggi er sterkur eins og hann segir okkur oft og sumir okkar hafa fengið að reyna á eigin skinni. Valdimar fékk 6½ vinning og það fékk Björn Víkingur Þórðarson líka í öðru sæti Eðalmanna. Í þriðja sæti varð svo Páll G Jónsson með 6 vinninga.

Flesta vinninga í gær fékk Guðfinnur R Kjartansson 8 v af 10. Guðfinnur er bara of ungur til þess að eiga rétt til verðlauna á þessu móti.

Barna- og unglingameistaramót Reykjavíkur fer fram á sunnudag

Barna- og unglingameistaramót Reykjavíkur, sem og Stúlknameistaramót Reykjavíkur, fer fram sunnudaginn 21. febrúar í félagsheimili T.R. Faxafeni 12.

Taflið hefst kl.14 og stendur til ca. kl. 18. Tefldar verða 7 umferðir eftir svissnesku kerfi með umhugsunartímanum 15 mín. á skák.

Teflt verður í tveimur flokkum: opnum flokki og stúlknaflokki.

Verðlaun verða veitt fyrir þrjú efstu sætin í mótinu og þar fyrir utan hlýtur sigurvegarinn titilinn Unglingameistari Reykjavíkur 2016, sé hann búsettur í Reykjavík eða félagi í reykvísku taflfélagi.

Einnig verða veitt verðlaun fyrir þrjár efstu stúlkurnar og þar fyrir utan hlýtur efsta stúlkan titilinn Stúlknameistari Reykjavíkur 2016, sé hún búsett í Reykjavík eða félagi í reykvísku taflfélagi.

Til viðbótar verða veitt verðlaun fyrir efsta sætið í árgöngum 2000-2001, 2002-2003, 2004-2005, 2006-2007 sem og 2008 og yngri í báðum flokkum (opna flokknum og stúlknaflokknum).

Mótið er opið öllum krökkum sem eru fædd 2000 og síðar.

Núverandi Reykjavíkurmeistarar eru Vignir Vatnar Stefánsson og Svava Þorsteinsdóttir.

Skákmótið hefst kl. 14 og er aðgangur ókeypis.

Við minnum á að mótið er hluti af stigakeppni félagsins sem er í gangi út febrúar þar sem litið er til ástundunar og árangurs. Hér má rifja upp fyrirkomulag stigakeppninnar.

Skráningarform

Skráðir keppendur

Friðrikskóngurinn - Ólafur hrósaði sigri

Mótaröðinni um taflkóng Friðriks Ólafssonar lauk í gærkvöldi í KR-heimmilinu með öruggum sigri Ólafs B. Þórssonar. Hann vann lokamótið með 8 vinningum af níu og kappteflið í heild sinni með 28 GP-stigum af 30 mögulegum, en þrjú mót af fjórum töldu til vinnings.  Júlíus Friðjónsson varð annar með 24 stig og Gunnar Freyr Rúnarsson hafnaði í þriðja sæti
með 23.

Verðaun verða afhent næsta mánudagskvöld í upphafi "Gunnaslags", skemmtikvölds og móts sem nánar verður tilkynnt um þegar nær dregur.

Þrír efstir og jafnir á Skákþingi Akureyrar

Sjöunda og síðasta umferð Skákþings Akureyrar var tefld í fyrradag. Jón Kristinn hafði vinningforskot fyrir umferðina og gat með jafntefli í skák sinni við Andra Frey tryggt sér annan Akureyrarmeistartitil sinn. Honum voru þó mislagðar hendur í skákinni; lenti snemma í erfiðleikum og tókst ekki að klóra í bakkann. Andri vann því góðan sigur og þar með tóks þeim Sigurði Eiríkssyni, sem vann Gabríel Freyr Björnsson, og Haraldi Haraldssyni sem lagði Hrein Hrafnsson að velli, að komast upp að hlið hans.

Þeir Jón Kristinn, Haraldur og Sigurður verða því að heyja úrslitakeppni um titilinn og er hún áfromuð dagana 24-26. febrúar nk.

Lokastaðan var þessi:

1-3. Jón Kristinn Þorgeirsson, Haraldur Haraldsson og Sigurður Eiríksson 4 v.

4. Andri Freyr Björgvinsson 3,5

5. Símon Þórhallsson 3

6. Hreinn Hrafnsson  2,5

7. Gabríel Freyr Björnsson 0

Öll úrslit má sjá á Chess-results. 

Heimasíða SA

Kappteflið um Friðrikskónginn V. - Ólafur B efstur - úrslit ráðast í kvöld

Eftir þrjú mót af fjórum í mótaröðinni er víkingurinn Ólafur B. Þórsson í forystu með 24 GP-stig af 30 mögulegum, Júlíus Friðjónsson annar með 22 og sigurvegarinn frá í fyrra Gunnar Freyr Rúnarsson þriðji með 20 stig. Lokabaráttan um konungsstyttuna verður háð í kvöld í KR-heimilinu og þar ráðast úrslitin.

Gunnar vann annað mótið en Júlíus það fyrsta en Ólafur hefur að sætta sig við annað sætið þrisvar. Örn Leó Jóhannsson blandaði sér í baráttuna síðast og vann mótið þá, en þau 10 stig sem hann ávann sér með sigri sínum teljast ekki með nema hann mæti aftur. Annars hækka Ólafur og Júlíus um 2 stig hvor og Gunnar um eitt. Sigurvegarar fyrri móta eru tómir Gunnarar, Skarphéðinsson, Birgisson, Gunnarsson og svo Rúnarsson síðast.

Þrjú bestu mót hvers keppanda telja til vinnings og því ljóst að Ólafur getur bara bætt við sig 2 stigum, með því að vinna næst, Júlíus 4 og Gunnar 5 ef þeir verða efstir.  En síðan getur innbyrðis röð þeirra líka haft sitt að segja og frammistaða annarra þátttakenda ráðið úrslitum. Erfitt er um slíkt að spá og allt getur gerst eins og dæmin sanna. Því er full ástæða til að leggja leið sína í Frostaskjólið þegar degi hallar en mótið hefst kl.19.30 Tefldar eru 9 umferðir með 10 mín. uht.  

Verðlaunaathöfn fyrir mótaröðina fer fram að viku liðinni í upphafi svonefnds „Gunnaslags“ og þá er þess vænst að meistarinn sjálfur Friðrik Ólafsson verði viðstaddur og afhendi sigurvegaranum konungsstyttuna áritaða. „Gunnaslagur“, tileinkaður fyrrv. sigurvegurum mótaraðarinnar, var í fyrsta sinn haldinn í fyrra en það kvöld eru allir taflfærir Gunnarar sérstaklega hvattir til þátttöku. Sérstök verðlaun verða veitt þeim sem leggur flesta skákmenn með því herskáa nafni að velli og einnig þeim Gunna, sem vinnur flesta nafna sína og stendur sig best.