Guðmundur vann sterkan stórmeistara í dag

Alþjóðlegi meistarinn, Guðmundur Kjartansson (2408) vann eistneska stórmeistarann Kaido Kulaots (2587) í sjöundu umferð Gíbraltar-mótsins í dag. Guðmundur hefur nú hlotið 5 vinninga og er í 19.-35. sæti.

Í 8. umferð, sem fram fer á morgun, teflir Guðmundur við spænska alþjóðlega meistarann Jose Carlos Ibarra Jerez (2538).

Rússneski stórmeistarinn Nikita Vitiugov (2694) er efstur með 6,5 vinning.

246 skákmenn taka þátt í mótinu og þar af 48 stórmeistarar. Guðmundur er nr. 66 í stigaröð keppenda.

• Heimasíða mótsins
• Chess-Results

KR-pistill: Stefán Þormar vann síðast

Það er jafnan líf og fjör í Frostaskjólinu og heitt í kolunum þegar gengið er til „burtreiða" á mánudagskvöldum. Þar skiptast menn á  hrósa sigri - vera öðrum snjallari.

Það ber til nokkurrar nýlundu að nú er farið að  gera heimildarmyndir um skákmótin og atganginn þar til kynningar fyrir komandi kynslóðir eins og sjá má á meðfylgjandi hreyfimynd úr smiðju Guss-Films Inc.  Áður hefur verið verið gert frægt myndband um skákofsann sem þar geysar, sem fengið hefur alþjóðlega kynningu á ChessCafé og sjá má á heimasíðu klúbbsins og á Youtube með því að slá inn ChessFury.

http://www.youtube.com/watch?v=m85AC7HLuCA

Það var enginn annar en Stefán Þormar Guðmundsson, hinn fágaði og trausti skákkappi (hellisheiðarséníð sjálft), sem bar sigurorð af öðrum á mánudaginn var, sérstaklega GunnaGunn, sem selur sig jafnan dýrt þrátt fyrir háan aldur og fyrri störf.  Báðir luku keppni með 9.5 vinningi af 13 mögulegum en séníið hafði sigurinn á 3 stigum.

 Vikuna á undan var það Ingimar Jónsson, sem var allra snjallastur með 10. 5 vinning en Jón G. Friðjónsson kom næstur með 10v.  Vikuna þar áður (7. Jan.) tillti einn þessara mörgu herskáu Gunnarra sér á toppinn með 10.5 vinningi ásamt Gunnari I. Birgissyni, sem segir gottaðbúaíkópavogi.  Var þar um að ræða skákvíkinginn Gunnar Frey Rúnarsson, sem marði nafna sinn á stigum með 1.5 hundraðasta, sem jafngildir broti úr sekúndu á skíðamóti.

Vegna hins glæsilega sigurs Íslands í IceSave-skákinni fyrir EFTA-dómstólnum í dag fer etv. vel á því  að birta hér stutt myndskeið úr öðru hnitnu videó-i frá Guss-Films, sem tekið var í garðveislu KR við Selvatn fyrir tveimur árum, þar sem Jónas Elíasson, prófessor og skákunnandi dregur dár af Gordon Brown, fyrrv. forsætisráðherra Bretlands í skorinorðri stöku sem sýnir vel hvaða hug Íslendingar bera til hans.

 

 

 http://youtu.be/c8qlyZ3csxg

Meira á heimasíðunni kr.is (skák)            

ESE- Skákþankar 28.1.13

Og það var teflt á Blönduósi

Hjá Blönduskóla á Blönduósi settum upp skákmót miðvikudaginn 23. janúar í tilefni af Skákdegi Íslands. Mótið var ætlað miðstigi og unglingastigi og mættu nokkrir hressir krakkar. Það er ekki mikil skákmenning þessi árin hérna á Blönduósi en þeir sem að mættu skemmtu sér vel og höfðu mjög gaman af því að tefla.

Í myndaalbúmi má finna nokkrar myndir frá Blönduósi.

Sigurvegarar dagsins

• Daníel Logi Heiðarsson - miðstig
• Benedikt Axel Ágústsson - unglingastig

Teflt í Grunnskóla Raufarhafnar á Skákdeginum

Það var víða teflt á Skádaginn. Það var t.d. gert í Grunnskólanum á Raufarhöfn þar sem haldið var upp á daginn, allir nemendur skólans tóku þátt og kepptu sín á milli. Í myndaalbúmi má minna nokkrar myndir frá Skákdeginum á Raufarhöfn.

 

Ungmennaæfing Skákdeildar Breiðabliks í dag kl. 17

Skákæfingar fyrir ungmenni 16-25 ára eru haldnar í Stúkunni á 3ju hæð við Kópavogsvöll alla mánudaga kl 17-19. Æfingarnar eru opnar öllum á þessum aldri óháð taflfélagi.

Gengið er inn bakatil á kjallarahæð. Sigurvegari æfingarinnar hlýtur að launum gjafabréf á  pizzu hjá Italiano Pizzeria Hlíðasmára. Stjórnandi æfinganna er Páll Andrason

Heimasíða Skákdeildar Breiðabliks: http://www.breidablik.is/skak

Frábær hátíð í Vogum: Skákklúbbur stofnaður í tilefni Skákdags Íslands

Frábær skákhátíð var haldin í Stóru-Vogaskóla í Vogum á Vatnsleysuströnd í tilefni af Skákdegi Íslands. Viðstaddir voru 200 nemendur skólans, starfsfólk og foreldrar, og eldri borgarar í bænum voru sérstakir heiðursgestir. Tugir spreyttu sig í fjöltefli við Róbert Lagerman skákmeistara.

Svava Bogadóttir skólastjóri setti hátíðina, sem fram fór í glæsilegum samkomusal skólans þar sem er hátt til lofts og vítt til veggja. Svava sagði meðal annars í ræðu sinni að skákiðkun væri mjög æskileg, enda bætti skákkunnátta námsárangur, auk þess að vera skemmtileg og holl tómstundaiðja sem allir geta stundað. Þá sagði Svava að Skákdagurinn væri haldinn til að heiðra Friðrik Ólafsson stórmeistara, sem væri mesti skáksnillingur sem Ísland hefði alið.

Róbert tefldi fjöltefli á hátíðinni og voru mótherjar hans af öllum kynslóðum. Alls tefldi meistarinn við hátt í 70 mótherja. Hann tapaði ekki skák, en gerði jafntefli við Guðmund Jónas Haraldsson og Sveinbjörn Egilsson.

Samhliða fjölteflinu sá Hrafn Jökulsson um byrjendafræðslu, auk þess sem fjölmörg af yngstu börnunum lituðu skákmyndir af mikilli innlifun. Þá var opnað skákkaffihús í tilefni dagsins, þar sem nemendur skólans buðu upp á kakó og vöfflur. Þá steig Birgitta Iðunn Ívarsdóttir, nemandi í 8. bekk, á svið og söng fullfallega fyrir gesti hátíðarinnar.

Skólabókasafnið, sem jafnframt er opið öllum bæjarbúum, fékk skákbókagjöf í tilefni dagsins. Una Svane bókavörður veitti gjöfinni viðtöku, og á næstunni verða skákbækur áberandi á bókasafninu.

Hápunktur hátíðarinnar í Vogum var stofnun skákklúbbs, sem mun annast uppbyggingu skáklífsins í þessum 1200 manna blómlega og vinalega bæ. Í stjórn klúbbsins eru Guðmundur Jónas Haraldsson, Stefán Arinbjarnarson, Örn Pálsson og Sveinbjörn Egilsson. Þá verður tveimur ungmennum boðið að taka sæti í stjórninni, svo rödd unga fólksins heyrist. Æfingar hins nýja skákklúbbs verða á fimmtudögum milli 17 og 19 í samkomusalnum í Álfagerði.

Guðmundur Jónas, sem er mikill skákáhugamaður og átti hugmyndina að hátíðinni, var alsæll með hvernig til tókst:

,,Takk fyrir yndislega samverustund á skákdegi í Vogum. Ég skemmti mér alveg konunglega.
Það var falleg og góð stemning sem sveif yfir vötnum. Alltaf svo gaman að sjá fólk af öllum stærðum og gerðum blanda geði og skemmta sér saman. Skáklistin hefur þennan dásamlega eiginleika að allir geta verið með.

Myndaalbúm frá hátíðinni í Vogum (HJ)

Hraðkvöld hjá Helli í kvöld

Taflfélagið Hellir heldur hraðkvöld mánudaginn 28. janúar nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Gíbraltar: Guðmundur með sigur í dag

Alþjóðlegi meistarinn, Guðmundur Kjartansson (2408) vann Ítalann Marco Ferrante (2227) í sjöttu umferð Gíbraltar-mótsins sem fram fór í dag. Í gær tapaði hann hins vegar fyrir Nana Dzagnidze (2555) frá Georgíu, sem er fimmta stigahæsta skákkona heims. Guðmundur hefur 4 vinninga og er í 32.-63. sæti.

 

Í 7. umferð, sem fram fer á morgun, teflir Guðmundur við eistneska stórmeistarann Kaido Kulaots (2587).

Efstir með 5,5 vinning eru stórmeistararnir Liem Le Quang (2705), Víetnam, Nikita Vitiugov (2694), Rússlandi, Kiril Georgiev (2643), Búlgaríu.

246 skákmenn taka þátt í mótinu og þar af 48 stórmeistarar. Guðmundur er nr. 66 í stigaröð keppenda.

• Heimasíða mótsins
• Chess-Results

Skákþáttur Morgunblaðsins: Snilldartilþrif heimsmeistarans

Á skákhátíðinni í Wijk aan Zee í Hollandi sem stendur yfir þessa dagana beinist athyglin hér heima ekki síst að stórmeistaraflokki C þar sem Hjörvar Steinn Grétarsson hefur staðið sig prýðilega og er með 3 vinninga af fimm mögulegum í 13 umferða móti. Í A-flokki hefur heimsmeistarinn Wisvanthan Anand verið á miklu flugi. Eftir fimm umferðir er hann efstur ásamt Magnúsi Carlsen og Sergei Karjakin, allir með 3 ½ vinning.

Sá léttleiki sem einkenndi taflmennsku Indverjans alla tíð virtist alveg að hverfa en nú geta aðdáendur hans aftur tekið gleði sína. Lev Aronjan átti örugglega ekki von á þeim trakteringum sem biðu hans í 4. umferð þessa móts. Hér er komin einhver glæsilegasta skák sem sést hefur í langan tíma í þessum styrkleikaflokki:

Lev Aronjan - Wisvanthan Anand

Slavnesk vörn

1. d4 d5 2. c4 c6 3. Rf3 Rf6 4. Rc3 e6 5. e3 Rbd7 6. Bd3 dxc4 7. Bxc4 b5 8. Bd3 Bd6

Nýjasti snúningurinn í Meran-afbrigðinu, Anand vann Kramnik tvisvar með 8. ... a6 í HM-einvíginu 2008 en aðrir góðir leikir eru 8. .... Bb7 og 8. ... b4.

9. O-O O-O 10. Dc2 Bb7 11. a3 Hc8 12. Rg5

Aronjan sem er býsna hugmyndaríkur í byrjunum sínum hefur áreiðanlega ætlað að koma heimsmeistaranum á óvart með þessum leik sem býður upp á möguleikann 12. ... Bxh2 13. Kxh2 Rg4+ og getur þá svarað með 14. Kg1 Dxg5 15. f3! og síðar - e4 og - b4. En hann kemur ekki að tómum kofunum hjá Anand.

12. ... c5!

Hvað er nú þetta? B5-peðið er valdlaust og h7-peðið einnig. Anand hafði notað óvenjumikinn tíma á byrjunina. Var hann að rifja upp gamlar niðurstöður eða setti hann leikrit á svið til að blekkja Aronjan?

13. Rxh7

Best samkvæmt ofurforritinu „Houdini".

13. ... Rg4!?

Einu sinni voru svona leikir kallaðir sprikl. „Houdini" var lengi að samþykkja hugmyndina

14. f4!?

Betra er 14. h3 Bh2+! 15. Kh1 Dh4 (hótar 16. ... Dxh3) 16. d5! Hfd8 17. Be2 með flókinni stöðu. „Houdini" heldur áfram: 17. .... Bb8 18. bxg4 Re5 19. Bd1 b4! og staðan er í dínamísku jafnvægi.

14. ... cxd4 15. exd4?

Tapleikurinn. Hann varð að leika 15. Rxf8 Bxf8 16. h3 dxc3 17. hxg4 Rf6 og svarta staðan er ekki lakari. En nú kemur eftirminnilegur leikur.

15. ... Bc5!! 16. Be2

Það var úr vöndu að ráða, 16. Rxf8 gekk ekki vegna 16. ... Bxd4+ 17. Kh1 Dh4 og mátar og 16. dxc5 Rxc5 er heldur ekki gæfulegt.

16. .... Rde5!

Kynngimagnaður leikur sem byggist á hugmyndinni 17. fxe5 Dxd4+ 18. Kh1 Dg1+! 19. Hxg1 Rf2 mát. Þá dugar 17. dxc5 skammt vegna 17. .... Dd4+ 18. Kh1 Rf2+ 19. Hxf2 (eða 19. Kg1 Rh3+ 20. Kh1 Dg1+! 21. Hxg1 Rf2 mát) Dxf2 með óverjandi máthótun.

16. ... Rde5 17. Bxg4 Bxd4+ 18. Kh1 Rxg4 19. Rxf8 f5!

Enn einn snilldarleikurinn sem hótar 20. ... Dh4. Aronjan er varnarlaus.

20. Rg6 Df6 21. h3 Dxg6 22. De2 Dh5! 23. Dd3

Hann gat reynt 23. Hf3 en þá kemur 23. ... Rf2+! 24. Kh2 (ekki 24. Hxf2 Dxh3+ 25. Kg1 Dxg2 mát) 24. ... Bxf3 25. Dxf3 Dxf3 26. gxf3 Rd3 og endataflið er gjörtapað á hvítt.

23. ... Be3!

Línurof bætist hér við önnur stef. Aronjan á enga haldgóða vörn gegn hótuninni 24. .... Dxh3+ og gafst upp.

Helgi Ólafsson

[e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 20 janúar 2013.

Skákþættir Morgunblaðsins

[Event "Tata Steel"] [Site "Wijk aan Zee NED"] [Date "2013.01.15"] [EventDate "2013.01.12"] [Round "4"] [Result "0-1"] [White "Levon Aronian"] [Black "Viswanathan Anand"] [ECO "D47"] [WhiteElo "2802"] [BlackElo "2772"] [PlyCount "46"] 1. d4 d5 2. c4 c6 3. Nf3 Nf6 4. Nc3 e6 5. e3 Nbd7 6. Bd3 dxc4 7. Bxc4 b5 8. Bd3 Bd6 9. O-O O-O 10. Qc2 Bb7 11. a3 Rc8 12. Ng5 c5 13. Nxh7 Ng4 14. f4 cxd4 15. exd4 Bc5 16. Be2 Nde5 17. Bxg4 Bxd4+ 18. Kh1 Nxg4 19. Nxf8 f5 20. Ng6 Qf6 21. h3 Qxg6 22. Qe2 Qh5 23. Qd3 Be3 0-1

Oliver Aron hraðskákmeistari Reykjavíkur

Oliver Aron Jóhannesson er hraðskákmeistari Reykjavíkur en mótið fór fram í dag. Oliver var jafn Birni Freyr Björnssyni og Ögmundi Kristinssyni að vinningum en hlaut titilinn eftir stigaútreikning. 26 skákmenn tóku þátt í mótinu. Ólafur S. Ásgrímsson var skákstjóri.

Lokastaðan:

 1-3  Óliver Aron Jóhannesson,                   11       43.0
      Björn Freyr Björnsson,                     11       41.0
      Ögmundur Kristinsson,                      11       38.0
  4   Omar Salama,                               10.5     45.5
  5   Dagur Ragnarsson,                          10       34.0
 6-8  Mikael Jóhann Karlsson,                    8.5      46.5
      Vignir Vatnar Stefánsson,                  8.5      41.5
      Birkir Karl Sigurðsson,                    8.5      34.5
9-11  Arnaldur Loftsson,                         8        42.5
      Kristján Örn Elíasson,                     8        37.5
      Elsa María Kristínardóttir,                8        36.5
 12   Dagur Kjartansson,                         7.5      42.5
13-14 Gauti Páll Jónsson,                        7        44.0
      Sigurjón Haraldsson,                       7        29.5
15-16 Jakob Alexander Petersen,                  6.5      36.5
      Guðmundur Gunnlaugsson,                    6.5      30.5
17-20 Kjartan Másson,                            6        39.0
      Björn Hólm Birkisson,                      6        33.0
      Bárður Örn Birkisson,                      6        26.5
      Ísak Logi Einarsson,                       6        23.5
 21   Kristófer Ómarsson,                        5.5      36.0
 22   Andri Steinn Hilmarsson,                   5        32.5
 23   Bjarki Arnaldarson,                        4        30.0
 24   Sindri Snær Kristófersson,                 3.5      25.0
 25   Pétur Jóhannesson,                         2.5      26.5
 26   Ívar Andri Hannesson,                      0        27.0