Skák.is

Bloggfærslur mánaðarins, júlí 2015

11.7.2015 | 20:00

Skákþáttur Morgunblaðsins: Walter Browne setti svip sinn á skáklíf Íslendinga

Einhver litríkasti skákmaður sem Bandaríkjamenn hafa eignast og tíður gestur á skákmótum hér á landi, Walter Shawn Browne, lést 24. júní sl. 66 ára að aldri. Browne var þá meðal þátttakenda á National open, skákmóti sem hann hafði unnið ellefu sinnum. Þar voru orkuútlátin söm við sig; meðan á mótinu stóð tefldi hann fjöltefli, tók að sér skákkennslu og sat dágóða stund við pókerborðið en þar hafði hann um dagana rakað saman dágóðum skildingi. Þannig hafði hann alltaf lifað lífinu. Svo lagðist hann til svefns í húsi vinar síns í Las Vegas og vaknaði ekki aftur.

Um tíma starfaði hann sem „gjafari“ við spilavíti í Las Vegas og kynntist ýmsum skrautlegum karakterum. Í bók sinni „The stress of chess and its infinite finesse“birtist mynd af honum með Frank Sinatra, önnur með Kenny Rogers. Þegar skákferill hans er gerður upp stendur eftir að hann vann fleiri mót en nokkur annar skákmaður vestra og er einhver minnisstæðasti stórmeistari sem greinarhöfundur hefur teflt við. Síðasta viðureign okkar var á Reykjavíkurskákmótinu í fyrra þar sem hann var heiðursgestur. Þar náði ég loks fram hefndum eftir töp í Lone Pine '78, Reykjavík '80 og í New York '84. Yasser Seirawan tók í sama streng í viðtali um daginn og hikaði ekki við að kalla Browne sinn langerfiðasta andstæðing. Að tefla við Walter Browne var sérstök lífsreynsla því maðurinn bókstaflega skalf og nötraði frá fyrstu mínútu til þeirrar síðustu og dró jafnan að sér mikinn fjölda áhorfenda. Browne kom fyrst til Íslands veturinn 1978 og tefldi þar á best skipaða Reykjavíkurskákmóti frá upphafi, skaust fram úr Bent Larsen á lokametrunum og varð einn efstur. Hann bar Íslendingum alltaf vel söguna og eignaðist hér marga vini.

Örlögin höguðu því svo að Walter Browne tók við því hlutverki sem beið Bobbys Fischers í Bandaríkjunum eftir einvígið í Reykjavík 1972. Browne nýtti sér út í ystu æsar þau tækifæri sem opnast höfðu fyrir skákina eftir einvígið í Reykjavík. Hann varð „sexfaldur skákmeistari Bandaríkjanna“ og sá titill varð síðan ávallt tengdur nafni hans og ímynd. Burtséð frá bægslaganginum við skákborðið var hann hress og skemmtilegur náungi og einkar orðheppinn. Í frásögn minni af sögu Reykjavíkurmótanna frá viðburðum ársins 1986 stendur þetta skrifað: „Browne steig þá í ræðustól og minnti á framtak sitt til eflingar hraðskákeppni á heimsvísu og útgáfu sína á tímariti helguðu hraðskákinni og bætti svo við, að í einni hraðskák fælist yfirleitt meiri hugsun en hjá bandarísku ruðningsliði yfir heilt keppnistímabil.“

Á ferli sínum vann Browne tvisvar stórmótið í Wijk aan Zee í Hollandi. Í fyrra skiptið fór hann ómjúkum höndum um vin sinn frá Argentínu.

Walter Browne – Miguel Quinteros

Sikileyjarvörn

1. e4 c5 2. Rf3 d6 3. Bb5+ Bd7 4. Bxd7+ Dxd7 5. c4 Dg4

Eftir þessa skák hefur peðsránið alltaf þótt vafasamt.

6. O-O Dxe4 7. d4 cxd4 8. He1 Dc6 9. Rxd4 Dxc4 10. Ra3 Dc8 11. Bf4 Dd7 12. Rab5

Hótar 13. Rxd6+. Nú dugar ekki 12. ... e6 vegna 13 Rxe6! fxe6 14. Hxe6+! o.s.frv.

12. ... e5 13. Bxe5! dxe5 14. Hxe5+ Be7

15. Hd5! Dc8 16. Rf5 Kf8 17. Rxe7 Kxe7 18. He5+

- og svartur gafst upp. Tærasta mátið kemur upp eftir 18. ... Kf6 19. Df3+! Kxe5 20. He1 mát.

Helgi Ólafsson helol@simnet.is

Skákþættir Morgunblaðsins eru birtir á Skák.is viku síðar en í sjálfu

Grein þessi birtist í Morgunblaðinu 4. júlí 2015

Skákþættir Morgunblaðsins

Spil og leikir | Breytt 6.7.2015 kl. 10:36 | Slóð | Facebook | Athugasemdir (1)

11.7.2015 | 19:20

Ungir skákmenn gerðu það gott á Skákþingi Noregs - Aryan Tari skákmeistari Noregs

Ungir og efnilegir skákmenn voru í aðalhlutverki á Skákþingi Noregs sem lauk í Osló í dag. Sigurvegari mótsins varð Aryan Tari (2502) sem er aðeins 16 ára. Hann hlaut 7 vinninga í 9 skákum. Í öðru sæti varð Johan Salomon (2424) sem er aðeins 18 ára og þriðji varð Kristian Stuvik Holm (2376) sem er 17 ára. Framtíð Noregs er því nokkuð björt.

Í mótið vantaði allra sterkustu skákmenn Noregs (allt ólympíuliðið) en meðal keppenda voru þó þrír stórmeistarar (Östenstad, Djurhuus og Gausel). Árangur hins unga Tari er því mikið. Þrátt fyrir ungan aldur er hann aðeins sá þriðji yngsti sem hampar titlinum en bæði Agdestein og Carlsen urðu meistarar yngri en Tari.

Heimasíða mótsins

Spil og leikir | Slóð | Facebook | Athugasemdir (0)

11.7.2015 | 13:18

Hjörvar vann í lokaumferðinni - endaði í 8.-16. sæti

Stórmeistarinn Hjörvar Steinn Grétarsson (2559) vann ástralska alþjóðlega meistarann Justin Tan (2417) í tíundu og síðustu umferð Benasque-mótsins á Spáni sem fram fór í morgun.

Hjörvar hlaut 7,5 vinning og endaði í 8.-16. sæti (10. sæti á stigum).

Frammistaða Hjörvars samsvaraði 2580 skákstigum og hækkar hann um 8 stig fyrir hana. Hjörvar hefur því endurheimt annað sæti Íslendinga á stigalista FIDE.

Indverski stórmeistarinn B. Adhiban (2627) sigraði á mótinu en hann hlaut 8,5 vinning.

Jón Trausti Harðarson (2141) tapaði fyrir finnsku goðsögninni Heikki Westerinen (2313) í lokaumferðinni. Jón Trausti hlaut 5,5 vinning og endaði í 108.-158. sæti (133. á stigum).

Alls tóku 412 skákmenn frá 37 löndum þátt í mótinu. Þar af voru 34 stórmeistarar. Hjörvar var nr. 13 í stigaröð keppenda en Jón Trausti var nr. 123.

Spil og leikir | Slóð | Facebook | Athugasemdir (0)

10.7.2015 | 22:08

Sumarmótið mikla við Selvatn IX - Róbert sigraði, Bragi og Gunnar komu næstir

Skákhátíðin að sveitasetri þeirra hjóna Guðfinns og Erlu Axels fór fram Í í fögru sumarveðri í faðmi náttúrunnar í Listaskálanum við Selvatn síðdegis á fimmtudaginn var (9. júlí). og stóð langt fram á kvöld.

Umgjörð mótsins var eins og best verður á kosið og einkar glæsileg. Mættir voru 40 skákgarpar á öllum aldri til að láta ljós sitt sína og kosta kapps um að máta hvern annan eða verða sjálfir mát ella.

GRK bauð mótsgesti velkomna, ESE setti mótið; KrSt kynnti styrktaraðila þess fjölmarga; Siggi Dan sló kröftuga tóna á píanóið til að fylla menn baráttuhug og Kristján Hreinsson fór með gamanmál til að létta tapsárum mönnum lund. Mikið var um dýrðir, hátíðarkvöldverðarhlaðborð undir beru lofti, glæsileg verðlaun og vinningahappdrætti.

Eftir harða keppni og margar æsilegar baráttuskákir á öllum borðum stóð Róbert nokkur Lagerman uppi sem sigurvegari. Hann hlaut 9 vinninga af 11 mögulegum og keppti fyrir Lögmannsstofu Jóns G. Briem sem styrktaraðila. Bragi Halldórsson (KPMG) varð annar og Gunnar Björnsson (Urður) í þriðja sæti.

Á eftir þeim fylgdi svo fríður flokkur skákkempna með örlítið færri vinninga eins og gengur og sjá má á meðf. mótstöflu. Ungmennaverðlaun hlaut hinn uppvaxandi meistari Gauti Páll Jónsson (Eldhús Sælkerans) Ellismellur mótsins var Sverrir Gunnarsson 88 ára (Byko). Engin fór tómhentur heim.

Skákdeild KR, Gallerý Skák og Riddarinn sem stóðu sameiginlega fyrir mótinu þakka keppendum og stoltum stuðningsaðilum framlag þeirra til eflingar skáklífinu.

Myndaalbúm (ESE)

Spil og leikir | Breytt s.d. kl. 22:14 | Slóð | Facebook | Athugasemdir (0)

10.7.2015 | 21:03

Ingvar vann - Sigurbjörn gerði jafntefli við Macieja

Ingvar Þór Jóhannesson (2372) vann pólska skákmeistarann Michal Karpus (2114) í fyrstu umferð minningarmóts um Najdorf sem hófst í Varsjá í dag. Sigurbjörn Björnsson (2327) saumaði lengi vel að pólska stórmeistaranum Bartomiej Macieja (2586) en varð að sætta sig að lokum við jafntefli.

Það eru hörkuskákir hjá báðum á morgun. Sigurbjörn mætir stigahæsta keppenda mótsins, búlgarska stórmeistaranum Ivan Cheparinov (2683) en Ingvar teflir við pólska stórmeistarann Jacek Tomsczak (2579). Báðir verða þeir í beinni útsendingu en umferðin kl. 15.

Alls tefla 83 skákmenn í efsta flokki og þar af eru 23 stórmeistarar. Ingvar er nr. 39 í stigaröð keppenda en Sigurbjörn er nr. 52.

Heimasíða mótsins
Úrslitaþjónusta
Beinar útsendingar (hefjast almennt kl. 15)

Spil og leikir | Breytt s.d. kl. 21:31 | Slóð | Facebook | Athugasemdir (0)

10.7.2015 | 19:32

Hjörvar með jafntefli við Deysi Cori - Jón Trausti á sigurbraut

Stórmeistarinn Hjörvar Steinn Grétarsson (2559) gerði jafntefli við Deyri Cori (2421), stórmeistara kvenna frá P, í níundu og næstsíðustu umferð Benasque-mótsins á Spáni.

Hjörvar hefur 6,5 vinning og er í 12.-40. sæti. Í lokaumferðinni sem fram fer á morgun teflir Hjörvar við ástralska alþjóðlega meistarann Justin Tan (2417). Skákin verður sýnd beint og hefst umferðin kl. 7 í fyrramálið.

Jón Trausti Harðarson (2141) vann sína þriðju skák í röð og er kominn með 5,5 vinning. Á morgun teflir hann við finnska stórmeistarann Heikki Westerinen (2313).

Alls taka 412 skákmenn frá 37 löndum þátt í mótinu. Þar af eru 34 stórmeistarar. Hjörvar er nr. 13 í stigaröð keppenda en Jón Trausti er nr. 123.

Spil og leikir | Slóð | Facebook | Athugasemdir (0)

10.7.2015 | 15:25

Ingvar mætir Karpus á minningarmóti Najdorfs

Minningarmót um Miguel Najdorf hófst rétt í þessu í Varsjá í Póllandi. FIDE-meistararnir Ingvar Þór Jóhannesson (2372) og Sigurbjörn Björnsson (2327) eru meðal keppenda.

Í fyrstu umferð teflir Sigurbjörn við pólska stórmeistrann Bartomiej Macieja (2586) en Ingvar við Michal Karpus (2114). Hægt er að fylgjast með þeim báðum í beinni.

Heimasíða mótsins
Úrslitaþjónusta
Beinar útsendingar (hefjast almennt kl. 15)

Spil og leikir | Slóð | Facebook | Athugasemdir (0)

10.7.2015 | 08:54

Hjörvar teflir við Cori-systurina í dag

Stórmeistarinn Hjörvar Steinn Grétarsson (2559) tapaði fyrir stórmeistaranum Jorge Cori (2623) í sjöundu umferð Benasque-mótsins í gær. Hjörvar fær í dag tækifæri til að jafna metin gegn Cori-fjölskyldunni því hann teflir við systur Jorge, Deysi Cori, í dag. Margir munu eftir þeim systkinum sem tefldu á Reykjavíkurskákmótunum 2010 og 2011 í Ráðhúsinu.

Hjörvar hefur 6 vinninga og er í 12.-32. sæti. Jorge Cori er einn efstur með 7 vinninga.

Skák Hjörvars gegn Deysi Cori verður sýnd beint á vef mótsins sem og á Chessbomb. Hún hefst kl. 14.

Jón Trausti Harðarson (2141) vann sína aðra skák í röð og er kominn með 4,5 vinning.

Alls taka 412 skákmenn frá 37 löndum þátt í mótinu. Þar af eru 34 stórmeistarar. Hjörvar er nr. 13 í stigaröð keppenda en Jón Trausti er nr. 123.

Spil og leikir | Slóð | Facebook | Athugasemdir (0)

9.7.2015 | 23:58

Skákir frá Yanofsky-mótinu 1947 og Euwe-mótinu 1948

Argentínumaðurinn Eduardo Bauzá Mercére sendi ritstjóra í dag tölvupóst. Í tölvupóstum voru skákirnar Yanofsky-mótinu 1947 og Euwe-mótinu innslegnar. Þessar skákir hafa ekki verið aðgengilegar í skákgagnagrunnum en finna mátti þær í gömlu íslenskum skáktímaritum.

Bæði þessi mót eru afar merkileg. Segja má að Yanofsky-mótið sé fyrsta alþjóðlega mótið sem haldið hafi verið hérlendis. Meðal keppenda auk Yanofsky var Robert Wade og svo sterkustu íslensku skákmennirnir á þessum tíma.

Yanofsky sigraði á mótinu, Ásmundur Ásgrímsson varð annar og Guðmundur S. Guðmundsson þriðji.

Euwe-mótið er ekki síður merkilegt því Euwe var fyrrum heimsmeistari í skák. Hann vann mótið en Guðmundur Pálmason og Ásmundur Ásgeirsson urðu í 2.-3. sæti.

Skákirnar fylgja með sem við viðhengi. Bæði sem PGN og einnig sem Chessbase-fælar.

Veljið skák (28 alls):

Skrár tengdar þessari bloggfærslu:

Spil og leikir | Breytt 10.7.2015 kl. 00:02 | Slóð | Facebook | Athugasemdir (0)

9.7.2015 | 13:41

Íslandsmót skákmanna í golfi fer fram 8. ágúst

Íslandsmót skákmanna í golfi 2015 verður haldið á Leirdalsvelli hjá Golfklúbbi Kópavogs og Garðabæjar (GKG) laugardaginn 8. ágúst nk. Keppt verður í tvíkeppni þar sem árangur í golfi og skák er lagður saman.

Við byrjum í Glersalnum í stúkunni við Kópavogsvöll kl 10 og teflum 9 umferða hraðskákmót. Að því loknu færum við okkur á golfvöllin og tökum þátt í einu glæsilegasta móti sumarsins sem er Bylgjan Open.

Keppt verður í opnum flokki, en einnig í unglingaflokki (grunnskólanemar).

Ef menn standa sig vel í golfmótinu, þá er möguleiki að komast í gegnum niðurskurðinn og spila þá annan hring á sunnudeginum.

Núverandi Íslandsmeistari er Helgi Ólafsson. Það þarf að fara að veita honum smá keppni! Íslands- og heimsmetið er 2391 stig og er það í eigu Helga.

Upplýsingar um fyrri mót eru á http://chess.is/golf

Þar munu líka birtast nánari upplýsingar þegar nær dregur móti.

Skákdeild Breiðabliks sér um framkvæmd Íslandsmóts skákmanna í golfi.

Skráning: https://docs.google.com/forms/d/13xSiNcQ7_siuY1eEuZ-HvitqRFe4lKRXVKHZHjflwCw/viewform?usp=send_form

Skráðir keppendur: https://docs.google.com/spreadsheets/d/1HLSblckSAkrmRVeMqsWjptgzblImBhld6-kne8x-LXc/edit?usp=sharing

Spil og leikir | Slóð | Facebook | Athugasemdir (0)

« Fyrri síða | Næsta síða »