Káerringar slá ekki slöku við

Þó hásumar sé að nafninu til slá KáEerringar ekki slöku við og hittast til tafls vikulega á mánudagskvöldum nema heimaleikur sé á knattspyrnuvellinum, þá degi seinna.

Góðir aufúsugestir og áráttuskákmenn eiga það til að reka inn nefið og freista þessa að skáka heimamönnum.  Það tókst þeim bærilega fulltrúum Skáksambandsins sem héldu uppi merki þess fyrir viku síðan enda þótt þeir tefldu þar þar ábyrðarlaust á eigin vegum enda orðnir  sárþjáðir af skákbakteríunni og langeygðir á að taka þátt í almennilegu hraðskákmóti - 13 umferðir í beit og ekkert slór.

Stefán Bergsson, forsvarsmaður Skákakademíunnar, gaf nemendum sínum gott fordæmi, fór þar langfremstur og sigraði glæsilega með 12 vinningum og Gunnar forseti Björnsson seldi sig einnig dýrt krækti sér í 10 vinninga og hvarf glaðbeittur á braut. Jón G. Friðjónsson og Guðfinnur "sigursæli" Kjartansson voru svo skammt undan með 9.5 vinninga. Prófessor Jón er jafnan harður í horn að taka þá sjaldan hann má vera að því að líta upp úr skræðum sínum og etja kappi við samherja sína eins og sannaði eina ferðina enn að hann er sterkur skákmaður þó stigalaust sé.  Júlíus Friðjónsson, hinn rútíneraði RB-maður, kom einnig við nýlega og lét ljós sitt skína skært og landaði sigri af gömlum vana.

Nánari úrslit má greina á meðf. mótstöflum ef vel er að gáð. 

 

 

 

Telft verður að vanda í KáErr-heimilinu í kvöld og þar er jafnan galopið hús fyrir alla taflfæra menn á öllum aldri sem vilja freista gæfu sinnar og leggja höfuð sín á gapastokkinn.

 

 

SUMARMÓT VIÐ SELVATN: Á fimmtudaginn kemur verður í samvinnu við Gallerý Skák haldin skákhátíð og veisla mikil við fjallavatnið fagurblátt, út í guðsgrænni náttúrunni við Selvatn ofan Geitháls við Nesjavallaveg. Teflt verður 11-13 umferða hvatskákmót með 10 mín. uht,  og reiddur fram margréttaður hátíðarkvöldverður undir beru lofti í taflhléi auk svaladrykkja,  kaffi og kruðerís á meðan á tafli stendur.   Þátttökugjald er kr. 5000. Nær fullskráð er í mótið en þátttaka takmarkast við 40  keppendur, en ef smuga myndast vegna forfalla er hægt að senda inn þátttökubeiðnir á netfangið: [e-mail].

Pardubice: Hjörvar vann - Hannes og Dagur með jafntefli

Vel gekk á þriðja keppnisdegi Czech Open sem fram fór í dag. Hjörvar Steinn Grétarsson (2511) vann sína skák en Hannes Hlífar Stefánsson (2522) og Dagur Arngrímsson (2384) gerðu jafntefli. Sá síðarnefndi átti sennilega unnið tefla gegn aserska stórmeistarann Azer Mirzoev (2536). Vel gekk í b-flokki þar sem 3 vinningar í 5 skákum komu í hús og d-flokki þar sem 1,5 vinningur í 3 skákum kom í hús.

A-flokkur:

Hannes hefur 2,5 vinning, Dagur hefur 2 vinninga og Hjörvar hefur 1,5 vinning.

Í 4. umferð, sem fram fer á morgun, teflir Hannes við sænska alþjóðlega meistarann Daniel Semcesen (2447), Dagur við hvít-rússneska stórmeistarann Kirill Stupak (2510) og Hjörvar við tékkneskan FIDE-meistara (2284). Allar skákirnar verða sýndar beint á vefsíðu mótsins.

B-flokkur: 

Þrír vinningar af 5 mögulegum komu í hús í 3. umferð. Dagur Ragnarsson (2020) og Oliver Aron Jóhannesson (2015) unnu, Nökkvi Sverrisson (2041) og Jón Trausti Harðarson (1899) gerðu jafntelfi en Mikael Jóhann Karlsson (2029) tapaði.

Dagur hefur fullt hús, Jón Trausti hefur 2,5 vinning, Nökkvi og Mikael hafa 2 vinninga og Oliver hefur 1,5 vinning.

D-flokkur:

Dawid Kolka (1669) vann, Heimir Páll Ragnarsson (1406) gerði jafntefli en Felix Steinþórsson (1488) tapaði. 

Dawid og Heimir hafa 1 vinning en Felix hefur 0,5 vinning en tefldar hafa verið 2 umferðir. Á morgun verða tefldar tvær umferðir í d- og e-flokki.

E-flokkur

Steinþór Baldursson tapaði og hefur 1 vinning eftir 2 skákir.

238 skákmenn frá 35 löndum tefla í efsta flokki. Þar af eru 46 stórmeistarar og 63 alþjóðlegir meistarar. Hannes er nr. 24 í stigaröð keppenda, Hjörvar er nr. 29 og Dagur er nr. 89. Hámarksstig í b-flokki eru 2400 skákstig og þar taka 235 skákmenn þátt. Íslensku skákmennirnir eru nr. 96-192 í stigaröð keppenda.

• Heimasíða mótsins
• Chess-Results
• Beinar útsendingar (hefjast kl. 13)
• Myndaalbúm (Steinþór Baldursson)

Skákþáttur Morgunblaðsins: Íslendingar tefla á spænsku mótaröðinni

Þessa dagana eru fjölmargir íslenskir skákmenn að búa sig undir þátttöku á mótum erlendis. Stór hópur ungra skákmanna mun taka þátt í skákhátíðinni í Pardubice í Tékklandi sem hefst um miðjan þennan mánuð; meðal þátttakenda er einnig Íslandsmeistarinn Hannes Hlífar Stefánsson. Henrik Danielssen og Hilmir Freyr Heimisson eru skráðir til leiks á Politiken Cup sem hefst um svipað leyti, bræðurnir Björn og Bragi Þorfinnssynir hyggja á þátttöku á sterku móti sem hefst í heimaborg Tal í Riga hinn 5. ágúst nk.

Skákvertíðin er hinsvegar fyrir nokkru byrjuð hjá Guðmundi Kjartanssyni sem í sumar hyggur á þátttöku á sex mótum á Spáni, sem öll eru hluti spænsku mótaraðarinnar. Mót nr. 2 stendur yfir þessa dagana og fer það fram í smábænum Benasque sem er í námunda við Pýrenea-fjöllin. Héðinn Steingrímsson er einnig meðal þátttakenda og tveir gamalkunnir stórmeistarar Norðurlanda einnig, Ulf Andersson og Heikki Westernen. Eftir sjö umferðir af tíu hafa þeir báðir fimm vinninga og sitja með öðrum í 28.-61. sæti meðal 428 keppenda, Héðinn er taplaus en Guðmundur, sem yfirleitt gerir ekki mikið af jafnteflum, hefur unnið fimm skákir og tapað tveimur.

Hjörvar Steinn Grétarsson sem útskrifaðist frá Verslunarskólanum í vor og ætlar að leggja áherslu á skákina næsta árið a.m.k. valdi að taka þátt í opna skoska meistaramótinu sem hófst í byrjun júlí. Eftir fimm umferðir er hann með 3½ vinning og er með efstu mönnum þó að tap fyrir enska stórmeistaranum Daniel Gormally í fimmtu umferð hafi sett svolítið strik i reikninginn hjá honum. Andstæðingur hans í fjórðu umferð var áreiðanlega vel lesinn í fræðunum og beitti Benkö-bragðinu sem þessa dagana virðist ekki bíta jafn vel og á árum áður. Leiðin sem Hjörvar valdi er ein fjölmargra og sigur hans var afar sannfærandi.

Hjörvar Steinn Grétarsson - Dawid Oswald

Benkö-bragð

1. d4 Rf6 2. c4 c5 3. d5 b5 4. cxb5 a6

Þó að þessi leikur liggi beinast við hefur ýmislegt annað verið reynt, t.d. að gefa peðið til baka, með 5. b6. Um skeið var eitt helsta svar hvíts við bragði Benkös leiðin: 5. f3 axb5 6. e4. Þá má nefna mótbragðið 5. Rc3!? axb5 6. e4 b4 7. Rb5 sem byggist á gildrunni 7. ... Rxe4 8. De2 þar sem ekki dugar að hörfa með riddarann, 8. ... Rf6 er svarað með 9. Rd6 mát!

5. bxa6 g6 6. Rc3 Bxa6 7. e4 Bxf1 8. Kxf1 d6 9. Rf3 Bg7 10. g3 0-0 11. Kg2 Rbd7 12. a4 Ha6 13. Dc2 Da8 14. Hd1

Hrókurinn er stundum hafður á e2 í þessu afbrigði en hér hefur hann það hlutverk að spyrna á móti framrás e-peðsins. Áður hefur verið leikið 14. Ha3 eða 14. Rb5.

14. ... Db7 15. Hb1

Góður reitur fyrir hrókinn. Hvítur bíður átekta en heldur opnu fyrir framrás b-peðsins.

15. ... e6 16. Bf4 exd5 17. exd5

Gott var einnig 17. Rxd5. )

Rh5 18. Be3 He8 19. b4! cxb4 20. Rb5 Hc8?

Ráðleysislegt. Best var 20. ... Rhf6! t.d. 21. Dc7 Da8 22. Rxd6 Hf8 og svartur á enn von.

21. De2 Rhf6 22. Hxb4 Rhf6

- sjá stöðumynd -

23. Rxd6 Rxe3+ 24. Dxe3 Dxb4 25. Rxc8 Dxa4

Tapar strax. Reyna mátti 25. ... He6 en eftir 26. Da7 er fátt um fína drætti, t.d. 26. ... Rf8 27. Rg5 Hf6 28. Re7+ Kh8 29. Rd5 og vinnur.

26. De8+ Rf8 27. Re7+ Kh8 28. Dxf7 Da2 29. Hd5!

- og nú er engin vörn við hótuninni 30. Dg8 mát. Svartur gafst upp.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 14. júlí 2013

Skákþættir Morgunblaðsins

Andorra: Héðinn og Guðmundur unnu í 2. umferð

Stórmeistarinn Héðinn Steingrímsson (2557) og alþjóðlegi meistarinn Guðmundur Kjartansson (2444) unnu báðir í 2. umferð í Andorra Open sem fram fór í dag. Andstæðingar þeirra voru á stigabilinu (2157-2218).

Þriðja umferð fer fram á morgun. Þá teflir Guðmundur við spænska stórmeistarann Luis Arizmendi (2580) en Héðinn við enska alþjóðlega meistarann Lawrence Trent (2420). Skák Guðmundar verður sýnd beint á vefsíðu mótsins.

Alls taka 178 skákmenn frá 20 löndum þátt í mótinu. Þar af eru 16 stórmeistarar og 14 alþjóðlegir meistarar. Héðinn er nr. 9 í stigaröð keppenda en Guðmundur er nr. 22.

• Heimasíða mótsins
• Chess-Results
• Beinar útsendingar - 4 skákir (hefjast kl. 13:30 eða 14:00)

Sergey Fedorchuk í TR

Úkraínski ofurstórmeistarinn Sergey Fedorchuk (2667) er genginn til liðs við Taflfélag Reykjavíkur. Fedorchuck varð Evrópumeistari unglinga undir 14 ára árið 1995, en meðal annarra afreka hans má nefna efsta sætið á Cappelle la Grande Open árið 2008, ásamt TR-ingunum Vugar Gashimov (2737), Erwin L'Ami (2640), nýbökuðum skákmeistara Úkraínu, Yuriy Kryvoruchko (2678) og fleirum. Einnig sigraði hann á Dubai Open 2006 ásamt Armenunum Sargissian og Petrosian.

Sergey Fedurchuck bætist því við stóran hóp öflugra erlendra stórmeistara félagsins, en fyrir eru hjá félaginu svo nokkrir séu nefndir, heimsmeistarinn fyrrverandi Anatoly Karpov, skákdrottningin Judit Polgar, Gata Kamsky, Jan Smeets, Mykhailo Oleksienko og fyrrnefndir Erwin L'Ami og skákmeistari Úkraínu Yuriy Kryvoruchko.

Fedorchuck mun leiða fríðan hóp sem tekur þátt í lokuðu 9 umferða stórmeistaramóti Taflfélags Reykjavíkur sem haldið verður í skákhöll TR í Faxafeni í byrjun október.  Frekari fréttir af þátttakendum á því geysiöfluga móti munu berast á næstu dögum og vikum.

Góður dagur í Pardubice - Hannes og Dagur unnu

Það gekk prýðilega á öðrum keppnisdegi Czech Open sem fram fór í dag en alls tefla þar 12 Íslendingar. Í a-flokki unnu Hannes Hlífar Stefánsson (2522) og Dagur Arngrímsson (2384) sínar skákir en Hjörvar Steinn Grétarsson (2511) tapaði. Í b-flokki komu 4 vinningar af 5 mögulegum í hús, Í d-flokki kom einn vinningur af þremur mögulegum í hús en þar voru allir að tefla upp fyrir sig. Steinþór Baldursson vann svo sína skák í e-flokki.

A-flokkur:

Hannes vann Rússa með 2386 skákstig, Dagur vann stigalágan Svía (2172) en Hjörvar tapaði fyrir skoska FIDE-meistaranum Alan Tate (2277). Hannes hefur 2 vinninga, Dagur 1,5 vinning en Hjörvar 0,5 vinning.

Í 3. umferð, sem fram fer á morgun, teflir Hannes við tékkneska stórmeistarann Vladimir Talla (2394) , Dagur við aserska stórmeistarann Azer Mirzoev (2536) og Hjörvar við titillausan Tékka (2229).

B-flokkur:

Fjórir vinningar af fimm mögulegum komu í hús í fyrstu umferð. Mikael Jóhann Karlsson (2029) sem vann króatískan FIDE-meistara (2202), Dagur Ragnarsson (2020), Jón Trausti Harðarson (1899) og Nökkvi Sverrisson (2041) unnu allir en Oliver Aron Jóhannesson (2015) tapaði.

Mikael, Dagur og Jón Trausti hafa 2 vinninga, Nökkvi hefur 1,5 vinning og Oliver hefur 0,5 vinning.

D-flokkur:

D- og E-flokkar hófust í dag og reyndar c-flokkur einnig en þar teflir enginn Íslendingur.

Felix Steinþórsson (1488) og Heimir Páll Ragnarsson (1406) gerðu jafntefli við mun stigahærri andstæðinga (1770-1782).

E-flokkur

Steinþór Baldursson, faðir Felix, byrjaði vel en hann vann 12 ára Þjóðverja í fyrstu umferð.

238 skákmenn frá 35 löndum tefla í efsta flokki. Þar af eru 46 stórmeistarar og 63 alþjóðlegir meistarar. Hannes er nr. 24 í stigaröð keppenda, Hjörvar er nr. 29 og Dagur er nr. 89. Hámarksstig í b-flokki eru 2400 skákstig og þar taka 235 skákmenn þátt. Íslensku skákmennirnir eru nr. 96-192 í stigaröð keppenda.

• Heimasíða mótsins
• Chess-Results
• Beinar útsendingar (hefjast kl. 13)
• Myndaalbúm (Steinþór Baldursson)

Andorra: Héðinn og Guðmundur unnu í fyrstu umferð

Stórmeistarinn Héðinn Steingrímsson (2557) og alþjóðlegi meistarinn Guðmundur Kjartansson (2444) taka þátt í alþjóðlegu skákmóti í Andorra sem hófst í dag. Báðir unnu þeir stigalága andstæðinga (1979-2033) í fyrstu umferð. Önnur umferð fer fram á morgun. Þá tefla þeir aftur við stigalægri andstæðinga (2157-2218).

Alls taka 178 skákmenn frá 20 löndum þátt í mótinu. Þar af eru 16 stórmeistarar og 14 alþjóðlegir meistarar. Héðinn er nr. 9 í stigaröð keppenda en Guðmundur er nr. 22.

• Heimasíða mótsins
• Chess-Results
• Beinar útsendingar - 4 skákir (hefjast kl. 13:30 eða 14:00)

Hannes vann í fyrstu umferð

A- og b-flokkar Czech Open hófust í gær í Pardubice í Tékklandi. Í dag hefjast svo c-, d- og e-flokkar og þar bætast við fleiri íslenskir keppendur. Í a-flokki vann Hannes  Hlífar Stefánsson (2522) sína skák en Hjörvar Steinn Grétarsson (2511) og Dagur Arngrímsson (2384) gerðu jafntefli. Í b-flokki þar sem fimm íslenskir skákmenn taka þátt komu 4 vinningar í hús.

Hannes vann úkraínska alþjóðlega meistarann Igor Varitsky (2278) en andstæðingar Hjörvars og Dags voru á stigabilinu 2165-2274.  Í dag tefla þeir allir við stigalægri andstæðinga (2172-2386).

Í b-flokki tefla fimm íslenskir skákmenn. Jón Trausti Harðarson (1899), Mikael Jóhann Karlsson (2029), Dagur Ragnarsson (2020) unnu en Nökkvi Sverrisson (2041) og Oliver Aron Jóhannesson (2015) gerðu jafntefli.

238 skákmenn frá 35 löndum tefla í efsta flokki. Þar af eru 46 stórmeistarar og 63 alþjóðlegir meistarar. Hannes er nr. 24 í stigaröð keppenda, Hjörvar er nr. 29 og Dagur er nr. 89. Hámarksstig í b-flokki eru 2400 skákstig og þar taka 235 skákmenn þátt. Íslensku skákmennirnir eru nr. 96-192 í stigaröð keppenda.

• Heimasíða mótsins
• Chess-Results
• Beinar útsendingar (hefjast kl. 13)

 

Skák í Skálholti í dag

Á 50 ára afmælishátíð Skálholtskirkju þann 20. júlí nk. flytur  Guðmundur G. Þórarinsson, verkfræðingur, fyrirlestur um hina fornu sögualdarskákmenn frá Ljóðshúsum - The Lewis Chessmen -  og kenningu um að þeir séu íslenskir að uppruna.  Jafnframt verður efnt til sögulegs skákmóts þar sem teflt verður með eftirgerðum hinna fornu taflmanna.  Tefldar verða 7 umferðir með 10 mínútna umhugsunartíma. Þátttakaendafjöldi er takmarkaður. Þeim sem kynnu að vilja vera með í mótinu er bent á að hafa samband við Einar Ess ([e-mail]), en skákklúbburinn Riddarinn stendur fyrir mótinu. 

Úr dagskránni á www.skalholt.is : 13.30 Skákmót í Skálholtsskóla.Teflt verður með eftirgerð af hinum fornu sögualdartaflmönnum frá Ljóðhúsum á Suðureyjum - The Lewis Chessmen - en þeir eru taldir hafa verið gerðir af Margréti hinni oddhögu í Skálholti á dögum Páls biskups Jónssonar. Guðmundur G. Þórarinsson flytur inngangsorð um líklegan íslenskan uppruna þeirra.

Opna tékkneska meistaramótið hefst kl. 13 - Hannes og Hjörvar í beinni

Opna tékkneska meistaramótið (Czech Open) hefst nú kl. 13. Í dag hefjast a- og b-flokkur en hinir flokkarnir hefjast á morgun. Í a-flokki taka Hannes Hlífar Stefánsson (2520), Hjörvar Steinn Grétarsson (2511) og Dagur Arngrímsson (2384). Að minnsta kosti Hannes og Hjörvar verða í beinni í dag en umferðin hefst væntanlega upp úr kl. 13. Skák Dags verður jafnvel sýnd beint. Andstæðingar dagsins eru á stigabilinu 2165-2278.

• Heimasíða mótsins
• Chess-Results
• Beinar útsendingar (hefjast kl. 13)