Rozentalis í TV

Litháíski stórmeistarinn  (2612) er genginn til liðs við Taflfélag Vestmannaeyja. Rozentalis hefur meðal annars teflt á 1. borði fyrir Litháa á 7 Ólympíuskákmótum.  Rosentalis bætist við fríðan hóp stórmeistara sem eru fyrir í TV og má þar helsta nefna Aleksey Dreev (2668), Jan Gustafsson (2619), Ivan Salgado Lopez (2614), Kamil Miton (2606), Jon Ludvig Hammer (2599), Tomi Nybäck (2599), Nils Grandelius (2573), Helga Ólafsson (2544) og Henrik Danielsen (2510). 

 

Þorvarður í TR

Þorvarður Fannar Ólafsson (2266) hefur gengið til við Taflfélag Reykjavíkur. Þorvarður kemur úr Víkingaklúbbnum en hefur lengst af alið manninn í Skákdeild Hauka og fyrrirennaranum Skákfélagi Hafnarfjarðar.

Þorvarður er mikill liðsauki fyrir Taflfélag Reykjavíkur fyrir átökin á Íslandsmóti skákfélaga í haust.

Skák í Skálholti: Fyrirlestur og skákmót á laugardaginn kemur.

Á 50 ára afmælishátíð Skálholtskirkju þann 20. júlí nk. flytur  Guðmundur G. Þórarinsson, verkfræðingur, fyrirlestur um hina fornu sögualdarskákmenn frá Ljóðshúsum - The Lewis Chessmen -  og kenningu um að þeir séu íslenskir að uppruna.  Jafnframt verður efnt til sögulegs skákmóts þar sem teflt verður með eftirgerðum hinna fornu taflmanna.  Tefldar verða 7 umferðir með 10 mínútna umhugsunartíma. Þátttakaendafjöldi er takmarkaður. Þeim sem kynnu að vilja vera með í mótinu er bent á að hafa samband við Einar Ess ([e-mail]), en skákklúbburinn Riddarinn stendur fyrir mótinu. 

Úr dagskránni á www.skalholt.is : 13.30 Skákmót í Skálholtsskóla.Teflt verður með eftirgerð af hinum fornu sögualdartaflmönnum frá Ljóðhúsum á Suðureyjum - The Lewis Chessmen - en þeir eru taldir hafa verið gerðir af Margréti hinni oddhögu í Skálholti á dögum Páls biskups Jónssonar. Guðmundur G. Þórarinsson flytur inngangsorð um líklegan íslenskan uppruna þeirra.

Mamedyarov sigurvegari Grand Prix mótsins í Beijing

Aserinn Mamedyarov (2763) sigraði á FIDE Grand Prix - sem lauk rétt í þessu í Beijing í Kína. Aserinn geðþekki gerði jafntefli við Gelfand (2773) í lokaumferðinni. Rússinn Alexander Grischuk (2780) varð annar. Ungverjinn Peter Leko (2737) og Búlgarinn Veselin Topalov (2767) urðu í 3.-4. sæti.

Frammistaða Aserans hefur fleytt honum upp í áttunda sæti heimslistans.

Topalov hefur hins vegar þegar tryggt sér sigur í Grand Prix seríunni þótt einu móti sé ólokið.

• Heimasíða mótsins
• Beinar útsendingar

Hraðskákkeppni taflfélaga hefst í ágúst

Hraðskákkeppni taflfélaga, hefst venju samkvæmt eftir verslunarmannahelgi. Þetta er í nítjánda sinn sem keppnin fer fram en Víkingaklúbburinn er núverandi meistari. Í fyrra og hitteðfyrra tóku 18 lið í keppninni sem er met.

Íslensk skákfélög eru hvött til að taka þátt.

Reglur keppninnar eru hér að neðan.

Teflt er eftir útsláttarfyrirkomulagi.    

Dagskrá mótsins er sem hér segir

• Forkeppni (ef meira en 16 lið taka ) - skuli vera lokið eig síðar en 10. ágúst
• 1. umferð (16 liða úrslit): Skuli vera lokið eigi síðar en 20. ágúst
• 2. umferð (8 liða úrslit): Skuli vera lokið eigi síðar en 31. ágúst
• 3. umferð (undanúrslit): Skulu fara fram fimmtudaginn 5. september kl. 20
• 4. umferð (úrslit): Skulu fara fram sunnudaginn 8. september kl. 14

Umsjónaraðili getur heimilað breytingar við sérstakar aðstæður.    

Skráning til þátttöku rennur út 31. júlí nk. Skráning fer fram á Skák.is.

Reglur keppninnar:

1.      Sex manns eru í hvoru liði og tefld er tvöföld umferð, þ.e. allir í öðru liðinu tefla við alla í hinu liðinu. Samtals 12 umferðir, eða 72 skákir.

2.      Heimalið sér um dómgæslu. Komi til deiluatriða er Ólafur S. Ásgrímsson yfirdómari keppninnar.

3.      Varamenn mega koma alls staðar inn. Þó skal gæta þess að menn tefli ekki oftar en tvívegis gegn sama andstæðingi og hafi ekki sama lit í báðum skákunum.

4.      Ætlast er til þess að þeir sem tefli séu fullgildir meðlimir síns félags. Aðeins má tefla með einu taflfélagi í keppninni.

5.      Liðsstjórar koma sér saman um hvenær er teflt og innan tímaáætlunar. Komi liðsstjórar sér ekki saman um dagsetningu innan tímaramma getur umsjónaraðili ákvarðað tímasetningu.

6.      Verði jafnt verður tefldur bráðabani. Það er tefld er einföld umferð þar sem dregið er um liti á fyrsta borði og svo hvítt og svart til skiptist. Verði enn jafnt verður áfram teflt áfram með skiptum litum þar til úrslit fást.

7.      Heimalið bjóði upp á léttar veitingar, t.d. kaffi, gos, kökur eða kex.

8.      Viðureignirnar skulu fara fram innan 100 km. radíus (max 1-1,5 klst. ferðalag) frá Reykjavík nema að félög komi sér saman um annað.

9.      Úrslitum skal koma til umsjónarmann eins fljótt og auðið er í netfangið [e-mail] og eigi síðar en 12 klukkustundum eftir að keppni lýkur.

10.  Úrslit keppninnar verða ávallt aðgengileg á heimasíðu Hellis, www.hellir.blog.is, sem er heimasíða keppninnar, og á www.skak.is.

11.  Mótshaldið er í höndum Taflfélagsins Hellis sem sér um framkvæmd mótsins.

Tikkanen sænskur meistari þriðja árið í röð - þurfti bráðabanaskák til

Stórmeistarinn Hans Tikkanen (2528) varð í gær sænskur meistari þriðja árið í röð. Það þarf að fara aftur til áranna 1951-53 til að finna slík dæmi en þá afrekaði Gösta Stoltz .ap sama. Tikkanen þurfti að hafa fyrir hlutunum. Hann var hálfum vinningi fyrir neðan Nils Grandelius (2573) fyrir lokaumferðina en vann sína skák á meðan Nils gerði jafntefli.

Þá var komið að einvígi þeirra á milli á meistaratitilinn, sem teflt var samdægurs, með styttri umhugsnartíma. Þeir tefldu tvö tveggja skáka einvígi sem bæði enduðu 1-1. Þá var komið að svokallaðri bráðabanaskák (Armageddon). Þar hafði Tikkanen betur. 

Tiger Hillarp Persson (2528) og Axel Smith (2461) urðu í 3.-4. sæti 1½ vinningi á eftir efstu mönnum.

Heimasíða mótsins

Hjörvar með jafntefli við Jones - endaði í fjórða sæti

Alþjóðlegi meistarinn Hjörvar Steinn Grétarsson (2511) gerði jafntefli gegn enska stórmeistaranum og "Þingeyingnum" Gawain Jones (2643) í níundu og síðustu umferð opna skoska meistaramótsins sem fram fór í dag. Enn eitt jafnteflið þeirra á millum. Hjörvar endaði í fjórða sæti með 6,5 vinning.

Efstir og jafnir með 7 vinninga urðu stórmeistararnir Jones, landi hans Daniel Gormally (2496) og Imre Hera (2558), Ungverjalandi.

Frammistaða Hjörvars samsvaraði 2506 skákstigum og hækkar hann um fimm skákstig fyrir hana.

Ritstjóra er ekki kunnugt um hver varð skákmeistari Skotlands en stórmeistarinn Matthew Turner (2518) og alþjóðlegi meistarinn Roddy McKay (2370) urðu efstir heimamanna með 6 vinninga.

55 skákmenn tóku þátt í aðalmótinu. Þar af voru 9 stórmeistarar og 8 alþjóðlegir meistarar. Hjörvar var nr. 5 í stigaröð keppenda.

• Heimasíða mótsins
• Beinar útsendingar
• Úrslitaþjónusta

Skákþáttur Morgunblaðsins: Bjargar heimavöllurinn Anand?

Úrslit tveggja stórmóta, í Stafangri annarsvegar og á minningarmótinu um Mikhael Tal í Moskvu hinsvegar, benda í þá átt að í heimsmeistaraeinvígi Anands og Magnúsar Carlsen, sem hefst 6. nóvember nk. í heimaborg Anands Chennai á Indlandi, liggi helsta von Anands um titilvörn í þeirri staðreynd að hann teflir á heimavelli. Að FIDE skuli einhliða og án samráðs við áskorandann hafi ákveðið þennan keppnisstað hefur verið gagnrýnt en Anand hefur sér til málsbóta að hann tefldi heimsmeistaraeinvígi sitt við Venselin Topalov vorið 2010 á heimavelli Búlgarans.

Á mótinu Stafangri sem lauk upp úr miðjum maímánuði varð Magnús í 2.-3. sæti með 5½ vinning, ½ vinningi á eftir sigurvegaranum Sergei Karjakin. Anand hlaut 5 vinninga og varð í 4.-6. sæti en á minningarmótinu um Tal sem lauk í Moskvu á dögunum fékk Magnús sömu niðurstöðu, varð í 2.-4. sæti með 5½ vinning. Flestum á óvart sigraði hinn 45 ára gamli Ísraelsmaður Boris Gelfand, en heimsmeistarinn tók mikla dýfu, fékk 3½ vinning úr 9 skákum og varð í 8.-9. sæti af tíu keppendum. Þau skipti í skáksögunni er heimsmeistari hefur fengið undir 50% vinningshlutfall á skákmóti eru teljandi á fingrum annarrar handar. Anand lét uppskátt eftir Tal-mótið að hann myndi næstu mánuðina einbeita sér að undirbúningi fyrir einvígið í nóvember. Hann hefur alltaf komið vel undirbúinn fyrir þau einvígi sem hann hefur háð og ekki vanmeta þann þátt sem snýr að aðstæðum. Við komu til Indlands í fyrsta skipti steypist yfir margan ferðalanginn mikið „kúltúrsjokk". Þeir munu tefla 12 skákir. Verði jafnt er gripið til skáka með styttri umhugsunartíma.

Á minningarmótinu um Tal töpuðu þeir báðir fyrir Ítalanum Fabiano Caruana og höfðu báðir hvítt! Innbyrðis viðurreign þeirra fór fram í fimmtu umferð:

Magnús Carlsen - Wisvanathan Anand

Nimzoindversk vörn

1. d4 Rf6 2. c4 e6 3. Rc3 Bb4 4. e3 0-0 5. Rge2

Þetta afbrigði sem kennt er við Pólverjann Rubinstein hefur að markmiði að koma í veg fyrir veikleika eftir línunni og minnir fremur á vinsæl afbrigði drottningarbragðs.

5. ... d5 6. a3 Be7 7. cxd5 Rxd5 8. Bd2 Rd7 9. g3 b6 10. Rxd5 exd5 11. Bg2 Bb7 12. Bb4!? Rf6

Bæði hér og síðar gat svartur tekið á sig „hangandi peðin" með leikvinningi, 12. ... c5 13. dxc5 bxc5 14. Bc3. Þetta var sennilega besti kostur svarts og einkennilegt að Anand skyldi ekki hafa valið hann. Lakara er hinsvegar 12. ... Bxb4 13. axb4 með þrýstingi á drottningarvæng.

13. 0-0 He8 14. Hc1 c6 15. Bxe7 Hxe7 16. He1 Dd6 17. Rf4 Bc8?

Þessi liðsskipan biskups og hróks tekur alltof langan tíma. Sennilega hefur Anandn ekki séð fyrir eða vanmetið 19. leik hvíts.

18. Da4 Hc7 19. f3! Be6 20. e4 dxe4

Anand veit ekki sitt rjúkandi ráð, 20. ... c5 með hugmyndinni 21. e5 Dd7 var reynandi en dugar þó skammt, eftir 21. dxc5 Hxc5 22. Hcd1! o.s.frv. er svartur í miklum vandræðum.

21. fxe4 Dd7 22. d5! cxd5 23. Dxd7 Hxd7 24. Rxe6 fxe6

25. Bh3!

Vinnur. Svarta staðan hrynur eftir þennan öfluga biskupsleik.

25. ... Kh8 26. e5 Rg8 27. Bxe6 Hdd8 28. Hc7 d4 29. Bd7!

- og Anand lagði niður vopnin. Framhaldið gæti orðið 29. ... Re7 30. Hd1 Rg6 31. e6 Re5 32. Kg2 og vinnur létt.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 7. júlí 2013

Skákþættir Morgunblaðsins

[Event "Tal Memorial"] [Site "Moscow RUS"] [Date "2013.06.18"] [EventDate "2013.06.13"] [Round "5"] [Result "1-0"] [White "Magnus Carlsen"] [Black "Viswanathan Anand"] [ECO "E46"] [WhiteElo "2864"] [BlackElo "2786"] [PlyCount "57"] 1. d4 Nf6 2. c4 e6 3. Nc3 Bb4 4. e3 O-O 5. Nge2 d5 6. a3 Be7 7. cxd5 Nxd5 8. Bd2 Nd7 9. g3 b6 10. Nxd5 exd5 11. Bg2 Bb7 12. Bb4 Nf6 13. O-O Re8 14. Rc1 c6 15. Bxe7 Rxe7 16. Re1 Qd6 17. Nf4 Bc8 18. Qa4 Rc7 19. f3 Be6 20. e4 dxe4 21. fxe4 Qd7 22. d5 cxd5 23. Qxd7 Rxd7 24. Nxe6 fxe6 25. Bh3 Kh8 26. e5 Ng8 27. Bxe6 Rdd8 28. Rc7 d4 29. Bd7 1-0

Hjörvar vann í næstsíðustu umferð - er í 3.-4. sæti - mætir Jones á morgun

Alþjóðlegi meistarinn Hjörvar Steinn Grétarsson (2511) vann skoska stórmeistarann Matthew Turner (2518) í áttundu og næstsíðustu umferð opna skoska meistaramótsins sem fram fór Helensburgh í dag. Hjörvar hefur 6 vinninga og er í 3.-4. sæti.

Ensku stórmeistararnir Gawain Jones (2643) og Daniel Gormally (2496) eru efstir með 6,5 vinning. Hjörvar mætir Jones í lokaumferðinni sem fer á morgun. Lokaumferðin hefst fyrr en venjulega eða kl. 10:30. Skákin verður sýnd beint.

55 skákmenn taka þátt í aðalmótinu. Þar af eru 9 stórmeistarar og 8 alþjóðlegir meistarar. Hjörvar er nr. 5 í stigaröð keppenda. Allar skákir mótsins eru sýndar beint.

• Heimasíða mótsins
• Beinar útsendingar
• Úrslitaþjónusta

Guðmundur vann Westerinen í lokaumferðinni

Alþjóðlegi meistarinn Guðmundur Kjartansson (2444) vann finnska stórmeistarann Heikki Westerinen (2283) í tíundu og síðustu umferð alþjóðlegs móts í Benasque á Spáni sem lauk í dag. Héðinn Steingrímsson (2544) gerði hins vegar jafntefli við bandaríska alþjóðlega meistarann Daniel Naroditsky (2486). Báðir hlutu þeir 7 vinninga og enduðu í 20.-44. sæti.

Stórmeistararnir Eduardo Iturriizaga (2642), Venúsela, Maxim Rodshtein (2641), Ísrael, og Aleksander Delchev (2614), Búlgaríu, urðu efstir og jafnir á mótinu með 8,5 vinning. Sá fyrstnefndi telst sigurvegari mótsins eftir stigaútreikning.

Þrátt fyrir að hafa fengið jafn marga vinninga fóru þeir ólíkt að á mótinu. Héðinn tapaði ekki skák, vann fjórar skákir og gerði sex jafntefli. Guðmundur gerði ekkert jafntefli, vann sjö skákir en tapaði þremur skákum.

Frammistaða Guðmundar samsvaraði 2416 skákstigum og hækkar hann um 2 skákstig fyrir hana. Frammistaða Héðins samsvaraði 2452 skákstigum og lækkar hann um 8 stig fyrir hana.

Guðmundur hefur áfram sínu skákferðalagi en tekur næst þátt í alþjóðlegu skákmóti í Andorra sem fram fer 20.-28. júlí. Héðinn er skráður til leiks ásamt fjölda annarra íslenskra skákmanna á Czech Open sem fram fer í Pardubice í Tékklandi 19.-27. júlí

Þátt í mótinu tóku 428 skákmenn frá 37 löndum. Þar af voru 36 stórmeistarar og 25 alþjóðlegir meistarar. Héðinn var nr. 15 í stigaröð keppenda en Guðmundur var nr. 44. umferð.

• Heimasíða mótsins
• Chess-Results
• Beinar útsendingar (hefjast almennt kl. 14)