Landsmót 50+ fer fram 9. júní í Mosfellsbæ

Landsmót UMFÍ fyrir 50+ fer fram um helgina 8.-10. júní í Mosfellsbæ.  Skákkeppnin fer fram laugardaginn 9. júní og fer fram á milli 12 og 17.  Keppt verður í einum flokki eftir Monrad-kerfi.  Veitt verða verðlaun fyrir bestan árangur karla og kvenna.

Mótið verður nánar kynnt þegar nær dregur.

Landsmót UMFÍ 50+

Úrslitaeinvígi Íslandsmótsins í skák: Jafntefli í hörkuskák

 

Jafntefli varð í hörskuskák í fyrstu skák úrslitaeinvígis Þrastar Þórhallssonar (2425) og Braga Þorfinnssonar (2449) um Íslandsmeistaratitilinn. 

 

Þröstur hafði hvítt og tefld var Bogo-indversk vörn.  Þröstur fékk töluvert betri stöðu en lék mjög slysalega af sér manni í 39. leik og mátti hafa sig allan við að halda jafntefli og það tókst eftir 91 leik.  Heldur fjörlegra teflt hér en í heimsmeistaraeinvíginu í Moskvu þar sem aðeins ein skák af 10 hefur orðið lengri en 40 leikir.  

Önnur skák einvígisins fer fram á morgun og hefst kl. 14.  Teflt er í Stúkunni á Kópavogsvelli.  Bragi stjórnar þá hvítu mönnunum.  

Hægt er að fylgjast með skákunum á netinu og einnig er hægt að fylgjast með skákunum á risaskjá á skákstað og hlusta um leið á skýringar skákspekinga.  

Mikið er í húfi í einvíginu.  Ekki nóg með að sigurvegarinn verði Íslandsmeistari heldur fær hann sjálfkrafa sæti í Ólympíulandsliði Íslands, sem keppir í Tyrklandi í haust, og keppnisrétt fyrir Íslands hönd á EM einstaklinga sem fram fer í Póllandi í apríl 2013. 

Hvorki Þröstur né Bragi hafa orðið Íslandsmeistarar og því er ljóst að nýr Íslandsmeistari verður krýndur eftir nokkra daga.  Alls tefla þeir 4 skákir um Hvítasunnuhelgina og verði jafnt af þeim loknum tefla þeir til þrautar með skemmri umhugsunartíma.

Hægt verður að nálgast allar upplýsingar um einvígið hér á Skák.is.

Vignir með jafntefli - er í 3.-5. sæti fyrir lokaumferðina

Vignir Vatnar Stefánsson (1512) fer mjög mikinn í b-flokki skákhátíðinnar í Salento í Ítalíu.  Í sjöundu og næstsíðustu umferð, sem fram fór í dag, gerði hann jafntefli á fyrsta borði við töluvert stigahærri andstæðing (1941).  Vignir hefur 5 vinninga og er hálfum vinningi fyrir neðan efstu menn.  Hilmir Freyr Heimsson (1752) tapaði og hefur 3 vinninga.

Björn Þorfinnsson (2388), sem teflir í aðalmótinu tapaði sinni annarri skák í röð, nú fyrir belgíska stórmeistarann Vadim Malakhatko (2526) á fremur snuppóttan hátt.   Björn hefur 4 vinninga og er í 9.-15. sæti.  

22 skákmenn tefla í a-flokki og þar af eru 4 stórmeistarar og 6 alþjóðlegir meistarar.  Björn er nr. 8 í stigaröð keppenda.  

• Heimasíða mótsins
• Beinar útsendingar (hefjast almennt kl. 13:30 eða 14:00)

 

Úrslitaeinvígi Þrastar og Braga hafið

 

Úrslitaeinvígi Þrastar Þórhallssonar og Braga Þorfinnssonar um Íslandsmeistaratitilinn hófst í Stúkunni á Kópavogsvelli í dag kl. 16.  Þröstur stjórnar hvítu mönnunum.  Ármann Kr. Ólafsson, bæjarstjóri Kópavogs, lék fyrsta leikinn fyrir Þröst, d2-d4.  Hægt er að fylgjast með skákinni á netinu en auk þess er hægt að koma á skákstað og fylgjast með skákinni á risaskjá og ræða málin á neðri hæð Stúkunnar.

Mikið er í húfi í einvíginu.  Ekki nóg með að sigurvegarinn verði Íslandsmeistari heldur fær Íslandsmeistarinn sjálfkrafa sæti í Ólympíulandsliði landsliði Íslands, sem keppir í Tyrklandi í haust, og keppnisrétt fyrir Íslands hönd á EM einstaklinga sem fram fer í Póllandi í apríl 2013. 

Hvorki Þröstur né Bragi hafa orðið Íslandsmeistari og því er ljóst að nýr Íslandsmeistari verður krýndur eftir nokkra daga.  Alls tefla þeir 4 skákir og verði jafnt tefla þeir til þrautar með skemmri umhugsunartíma.

Útsending frá fyrstu skákinni

Úrslitaeinvígi Íslandsmótsins í skák hefst í dag kl. 16 í Stúkunni á Kópavogsvelli

Fjögurra skáka úrslitaeinvígi Íslandsmótsins í skák fer fram Hvítasunnuhelgina, 25.-28. maí, í Stúkunni í Kópavogi.  Til úrslita tefla þeir Þröstur Þórhallsson og Bragi Þorfinnsson.   Alls tefla þeir 4 kappskákir föstudag-mánudag og tefla svo til þrautar á miðvikudaginn 30. maí með styttri tímamörkum verði jafnt eftir þessar 4 skákir.   Þröstur stjórnar hvítu mönnunum í fyrstu skák einvígisins.  

Mikið er í húfi því sigurvegarinn vinnur sér bæði inn sæti í landsliði Íslands á Ólympíuskákmótinu í Istanbul, sem fram fer 27. ágúst - 10. september, og fær keppnisrétt fyrir Íslands hönd á EM einstaklinga sem fram fer í Legnica í Póllandi 5.-17. apríl 2013.

Boðið verður upp á kaffi og með því á skákstað.  Hægt að verður fylgjast með skákinni á risaskjá á neðri hæð Stúkunnar.   

Bein útsending (með töfum): http://live.chess.is/2012/landslids/u1/tfd.htm

Dagskrá:

• 1. skák, föstudaginn, 25. maí, kl. 16:00
• 2. skák, laugardaginn, 26. maí, kl. 14:00
• 3. skák, sunnudaginn, 27. maí, kl. 14:00
• 4. skák, mánudaginn, 28. maí, kl. 14:00
• Bráðabani ef jafnt, miðvikudaginn, 30. maí, kl. 16:00 

Skákþing Norðlendinga hefst í kvöld

Skákþing Norðlendinga 2012

Akureyri 25.-28. maí 2012

150 ára afmælismót Akureyrarkaupstaðar

100 ára afmælismót Júlíusar Bogasonar skákmeistara

Skákþingið hefur verið haldið árlega frá 1935 og er nú háð í 78. sinn.  Sérstaklega verður vandað til mótshaldsins nú í tilefni af því að 150 ár eru liðin frá því Akureyrarbær öðlaðist kaupstaðaréttindi. Þá er með mótshaldinu þess minnst að í ár eru 100 ár liðin frá fæðingu Júlíusar Bogasonar skákmeistara. Júlíus varð skákmeistari Akureyrar 19 sinnum og  5 sinnum skákmeistari Norðlendinga.

Teflt verður í félagsheimili Skákfélags Akureyrar, Íþróttahöllinni við Skólastíg (gengið inn að vestan).  

Dagskrá:

Tefldar verða 7 umferðir eftir svissnesku kerfi, 3 atskákir og 4 kappskákir.  

Föstudagur 25. maí kl. 20.00: 1.-3. umferð. Atskák, 25 mín/mann.
Laugardagur 26. maí kl. 10.00: 4. umferð. Kappskák, 90 mín + 30 sek/leik.
Laugardagur 26. maí kl. 16.00: 5. umferð. Kappskák, 90 mín + 30 sek/leik.
Sunnudagur 27. maí kl. 13:00: 6. umferð. Kappskák, 90 mín + 30 sek/leik.
Mánudagur 28. maí kl. 10.00: 7. umferð. Kappskák, 90 mín + 30 sek/leik.

Mánudagur 28. maí kl. 14.30: Hraðskákmót Norðlendinga.

Mótið verður reiknað til íslenskra skákstiga og til FIDE-skákstiga.

Keppni í kvennaflokki fer fram laugardaginn 26. maí og hefst kl. 10.00. Þetta að því tilskildu að næg þátttaka fáist. Lágmark er 6 keppendur svo mótið fari fram. Tefldar verða atskákir, 5-7. umferðir.  

Þátttökugjald:   kr. 4000 fyrir 17 ára og eldri, kr. 2000 fyrir 16 ára og yngri.  Þátttaka í hraðskákmótinu er innifalin. Þeir sem einungis tefla í hraðskákmótinu greiða kr. 500 fyrir þátttökuna.  Þátttökugjald í kvennaflokki kr. 1000.

Verðlaun:

1. verðlaun kr. 50.000

2. verðlaun kr. 30.000

3. verðlaun kr. 20.000

4. verðlaun kr. 10.000

Skákmeistari Norðlendinga  kr. 25.000

Efstur skákmanna með 1801-2000 kr. 15.000

Efstur skákmanna með 1800 stig og minna kr. 15.000

Hver þátttakandi vinnur aðeins ein verðlaun.

Öllum er heimil þátttaka á mótinu, en aðeins þátttakendur með lögheimili á Norðurlandi geta unnið þá meistaratitla sem teflt verður um, þ.e. Skákmeistari Norðlendinga, (í meistaraflokki, kvennaflokki og unglingaflokki) og Hraðskákmeistari Norðlendinga.  

Skráning:  í netfangið [e-mail] og er skráningarfrestur til miðnættis 24. maí. Þeir sem mæta til leiks eftir að skráningarfrestur er liðinn geta ekki verið vissir um að fá sæti á mótinu. 

Keppendalista má finna á Chess-Results.

Meistaramót Skákskóla Íslands fer fram 1.-3. júní

Meistaramót Skákskóla Íslands fyrir starfsárið 2011/2012 hefst föstudaginn 1. júní. Tefldar verða sjö umferðir eftir svissneska kerfinu. Þátttökurétt hafa nemendur skólans og allir þeir sem tekið hafa þátt í námskeiðum á vegum  skólans eða hlotið þjálfun á vegum skólans.  

Núverandi meistari Skákskóla íslands er Hjörvar Steinn Grétarsson.   

Þátttökuréttur:

Allir nemendur skólans og þeir sem tekið hafa þátt í námskeiðum á vegum skólans.

Að öðru leyti áskilur skólastjóri/mótsnefnd sér rétt til að bjóða völdum einstaklingum til þátttöku.

Dagskrá mótsins verður með eftirfarandi hætti:

Umferðafjöldi: Sjö umferðir. Í þrem fyrstu umferðunum verða tefldar atskákir en fjórar lokaumferðirnar eru kappskákir.

Tímamörk: Atskákir 25 10  þ.e 25 mínútur að viðbættum sekúndum fyrir hvern leik. 

Kappskákir:  90 30 þ.e. 90 mínútur á alla skákina og 30 sekúndur bætast við eftir hvern leik.

Fyrirkomulag: Svissneska kerfið - Swiss Perfect

Skákstig: Mótið verður reiknað til skákstiga, en þrjár fyrstu umferðirnar til at-skákstiga.

Verðlaun:

A:

1. verðlaun:

Meistaratitill Skákskóla Íslands 2011/2012 og farandbikar. Einnig  flugfar m/Flugleiðum á Evrópuleið* og uppihalds kostnaði kr. 30 þús.

2. verðlaun: Flugfarmiði á leiðum Flugfélags Íslands innanlands.  

3. - 5. verðlaun: Vandaðar skákbækur.

Sérstök stúlknaverðlaun:

Farmiði á leiðum Flugfélags Íslands innanlands.

Aldursflokkaverðlaun. 

1. Tvenn verðlaun fyrir þá keppendur sem ná bestum árangri í hópi 14 ára og yngri

2. Tvenn verðlaun fyrir þær stúlkur sem bestum árangri ná í mótinu.

Verðlaun fyrir keppendur 12 ára og yngri.

1. - 3. verðlaun: Vandaðar skákbækur.

* ^{Mótshaldarinn áskilur sér rétt til að finna hagstæðasta fargjald sem hægt er að fá enda verði tilkynnt um ferðir með góðum fyrirvara.} 

Verðlaunahafi verður að nýta sér farmiða innan 12 mánuða frá lokum mótsins.

B:

Dagskrá:

• 1. umferð: Föstudagurinn 1. júní kl. 18  
• 2. umferð: Föstudagurinn 1. júní kl. 19
• 3. umferð. Föstudagurinn 1. júní kl. 20.
• 4. umferð: Laugardagurinn 2. júní kl. 10-14  
• 5. umferð: Laugardagurinn 2. júní 15 - 19
• 6. umferð: Sunnudagurinn 3. júní kl. 10.-14.
• 7. umferð: Sunnudagurinn 3. júní kl. 15-19.

 ^{* Hljóti einhver stúlka 1. eða 2. verðlaun mun 2. sæti meðal stúlkna gilda til sérstakra stúlknaverðlauna.}

 Verðlaunaafhending fer fram strax að móti loknu.

Þátttöku skal tilkynna í síma SÍ 5689141 á netfangið [e-mail] eða [e-mail] .

Mótsnefnd áskilur rétt til að gera breytingar á fyrirfram boðaðri dagskrá.

Vignir og Heimir unnu í Salento - Vignir í 2.-4. sæti - Björn tapaði

Vignir Vatnar Stefánsson (1512) og Hilmir Freyr Heimisson (1752) unnu báðir í sjöttu umferð b-flokks skákhátíðinnar í Salento sem fram fór í dag.   Vignir vann næststighæsta keppenda flokksins (1912) er nú í 2.-4. sæti með 4½ vinning.   Hilmir Freyr Heimisson (1752) hefur 3 vinninga. 

Björn Þorfinnsson (2388) tapaði fyrir þýska stórmeistaranum Felix Levin (2506) í sjöundu umferð aðalmótsins.  Björn hefur 4 vinninga og er í 5.-10. sæti.

Í áttundu og næstsíðustu umferð, sem tefld verður á morgun, teflir Björn við belgíska stórmeistarann Vadim Malakhatko (2526).   Umferðin hefst kl. 13:30.

Þýski stórmeistarinn Igor Khenkin (2670) og ítalski alþjóðlegi meistarinn Roberto Mogranzini (2461) eru efstir með 5½ vinning.22 skákmenn tefla í a-flokki og þar af eru 4 stórmeistarar og 6 alþjóðlegir meistarar.  Björn er nr. 8 í stigaröð keppenda.  

• Heimasíða mótsins
• Beinar útsendingar (hefjast almennt kl. 13:30 eða 14:00)

 

Þröstur Þórhallsson næsti Íslandsmeistari í skák samkvæmt spám Betsson

Fjögurra skáka úrslitaeinvígi Íslandsmótsins í skák fer fram nú um Hvítasunnuhelgina eða dagana 25. - 28. maí en þar tefla þeir Þröstur Þórhallsson og Bragi Þorfinnsson eina kappskák á dag alla dagana. Verði jafnt eftir þessar fjórar skákir verður teflt til þrautar á miðvikudaginn 30. maí með styttri tímamörkum.

Samkvæmt veðmálasérfræðingum betsson.com er líklegra að Þröstur verði næsti Íslandsmeistari sem skýtur nokkuð skökku við þar sem hann er með færri ELO-stig en Bragi sem er með 2449 stig á móti 2425 stigum Þrastar. Sérfræðingar Betsson sem hafa spáð rétt fyrir hinum ótrúlegustu hlutum hafa væntanlega eitthvað fyrir sér þegar þeir telja að 60% líkur séu að Þröstur Þórhallson verði Íslandsmeistari í skák árið 2012.

Hvort spekingar Betsson hafi rétt fyrir sér eður ei er ljóst að til mikils er að vinna í einvíginu nú um Hvítasunnuna því sigurvegarinn vinnur sér bæði inn sæti í landsliði Íslands á Ólympíuskákmótinu í Istanbul, sem fram fer 27. ágúst - 10. september, og fær keppnisrétt fyrir Íslands hönd á EM einstaklinga sem fram fer í Legnica í Póllandi 5.-17. apríl 2013.

HM-einvígi: Jafntefli í 10. skák - staðan er 5-5

Jafntefli varð í tíundu skák heimsmeistaraeinvígis Anand og Gelfand sem fram fór í dag eftir 25 leiki.   Staðan er nú 5-5 þegar aðeins tveimur skákum er ólokið

Ellefta og næstsíðata skák einvígisins fer fram á laugardag og hefst kl. 11.

Henrik Danielsen er með myndbandsskýringar frá hverri skák sem finna má á Chessdom. 

Alls tefla þeir 12 skákir. 

• Heimasíða einvígisins
• ChessBomb
• Myndbandsskýringar Henriks