Skákþing Norðlendinga - skráningu lýkur í kvöld

Skákþing Norðlendinga 2012

Akureyri 25-28. maí 2012

150 ára afmælismót Akureyrarkaupstaðar

100 ára afmælismót Júlíusar Bogasonar skákmeistara

Skákþingið hefur verið haldið árlega frá 1935 og er nú háð í 78. sinn.  Sérstaklega verður vandað til mótshaldsins nú í tilefni af því að 150 ár eru liðin frá því Akureyrarbær öðlaðist kaupstaðaréttindi. Þá er með mótshaldinu þess minnst að í ár eru 100 ár liðin frá fæðingu Júlíusar Bogasonar skákmeistara. Júlíus varð skákmeistari Akureyrar 19 sinnum og  5 sinnum skákmeistari Norðlendinga.

Teflt verður í félagsheimili Skákfélags Akureyrar, Íþróttahöllinni við Skólastíg.

Dagskrá:
Tefldar verða 7 umferðir eftir svissnesku kerfi, 3 atskákir og 4 kappskákir.  Föstudagur 25. maí kl. 20.00:          1.-3. umferð. Atskák, 25 mín/mann.
Laugardagur 26. maí kl. 10.00:             4. umferð. Kappskák, 90 mín + 30 sek/leik.
Laugardagur 26. apríl kl. 16.00: 5. umferð. Kappskák, 90 mín + 30 sek/leik.
Sunnudagur 27. maí kl. 13:00:   6. umferð. Kappskák, 90 mín + 30 sek/leik.
Mánudagur 28. maí kl. 10.00:   7. umferð. Kappskák, 90 mín + 30 sek/leik.                         Mánudagur 28. maí kl. 14.30:            Hraðskákmót Norðlendinga.

Mótið verður reiknað til íslenskra skákstiga og til FIDE-skákstiga.

 Keppni í kvennaflokki fer fram laugardaginn 26. apríl og hefst kl. 10.00. Þetta að því tilskildu að næg þátttaka fáist. Lágmark er 6 keppendur svo mótið fari fram. Tefldar verða atskákir, 5-7. umferðir.  

Þátttökugjald:   kr. 4000 fyrir 17 ára og eldri, kr. 2000 fyrir 16 ára og yngri.  Þátttaka í hraðskákmótinu er innifalin. Þeir sem einungis tefla í hraðskákmótinu greiða kr. 500 fyrir þátttökuna.Þátttökugjald í kvennaflokki kr. 1000.

Verðlaun:

1. verðlaun kr. 50.000

2. verðlaun kr. 30.000

3. verðlaun kr. 20.000

4. verðlaun kr. 10.000

Skákmeistari Norðlendinga  kr. 25.000

Efstur skákmanna með 1801-2000 kr. 15.000

Efstur skákmanna með 1800 stig og minna kr. 15.000

 

Öllum er heimil þátttaka á mótinu, en aðeins þátttakendur með lögheimili á Norðurlandi geta unnið þá meistaratitla sem teflt verður um, þ.e. Skákmeistari Norðlendinga, (í meistaraflokki, kvennaflokki og unglingaflokki) og Hraðskákmeistari Norðlendinga.  

Skráning:  í netfangið [e-mail] og er skráningarfrestur til miðnættis 24. maí.  Fylgjast má með skráningu á Chess-Results

Mjóddarmót Hellis fer fram 9. júní

Mjóddarmót Hellis fer fram laugardaginn 9. júní í göngugötunni í Mjódd.  Mótið hefst kl. 14 og er mótið öllum opið. Góð verðlaun í boði.  Á síðasta ári sigraði Brúðarkjólaleiga Katrínar en fyrir þá tefldi Daði Ómarsson.  Tefldar verða sjö umferðir með sjö mínútna umhugsunartíma.  Skráning fer fram í síma 866-0116 og á heimasíðu Hellis: http://hellir.blog.is.  Þátttaka er ókeypis!

Verðlaun eru sem hér segir:

• 1. 10.000
• 2.   6.000
• 3.   4.000

Skráning:

• Heimasíða Hellis: http://hellir.blog.is
• Sími: 866 0116

Dawid Kolka stóð sig best á unglingaæfingum Hellis í vetur

Dawid Kolka sigraði örugglega á lokaæfingunni á vormisseri með fullu húsi 5v í jafn mörgum skákum. Það fór vel á því að Dawid sigraði á lokaæfingunni því hann sigraði einnig örugglega í stigakeppninni með 64 stig sem er með því hærra sem sést hefur sérstaklega með tilliti til þess næsti maður í stigakeppninni Vignir Vatnar var með 50 stig.

Vignir Vatnar var fjarverandi á síðustu æfingunni þar sem hann er að tefla erlendis og býður hans verðlaunagripur fyrir annað sætið í stigakeppni vetrarins. Í öðru sæti á æfingunni með 4v og 14 stig var Felix Steinþórsson. Felix var í þriðja sæti í stigakeppninni og hefur verið í stöðugri framför í vetur. Þriðji á æfingunni var Róbert Leó Jónsson með 4v og 13,5 stig. Róbert veitti Felix nokkra keppni um þriðja sætið í stigakeppninni og hefði kannski getað sótt að honum með því að mæta a.m.k. á jafn margar æfingar og Felix.

Það voru samtals 114 sem mættu á æfingar vetrarins. Sumir mættu á fáar og aðrir á flestar en æfingarnar voru í það heila vel sóttar og kjarninn sem mætti á þær stór. Auðvitað gengur mönnum misjafnlega á æfingum sem þessu en aðalatriðið er að hafa gaman af því að tefla þótt auðvitað spilli ekki fyrir að vinna af og til verðlauna. Nokkrir tóku miklum framförum í vetur sem mun skila þeim hærra ef haldið er áfram á sömu braut.

Æfingarnar hefjast svo aftur næsta haust um mánaðarmótin ágúst/september.

Myndaalbúm (VÓV)

Chess Life Magazine fjallar um N1 Reykjavíkurskákmótið

Ítarleg umfjöllun um N1 Reykjavíkurskákmótið á 10 blaðsíðum má finna í maí-tölublaði Chess Life Magazine.  Tímaritið er útbreiddasta skáktíma heims en allir meðlimir bandaríska skáksambandins, um 85.000 manns, fá blaðið sent heim til sín í hverjum mánuði. 

Greinin er skrifuð af Macauley Peterson. Áður hafði komið enn ítarlegri grein á alls 20 blaðsíðum um N1 Reykjavíkurskákmótið í virtasta skáktímarit heims, New in Chess.

New in Chess er hægt að nálgast á bóksölu Sigurbjörns, sem verður í gangi samhliða úrslitaeinvígi Íslandsmótsins í skák sem fram fer um Hvítasunnuhelgina í Stúkunni í Kópavogi.  Þar verður einnig hægt að nálgast bók Helga Ólafssonar, Bobby Fischer Comes Home.

Stefnt er að Chess Life Magazine verði einnig til sölu í bóksölu Sigurbjörns innan skamms.   Upplýsingar um hvenær bóksalan verður í gangi um helgina verður kynnt hér á Skák.is.

 

 

Björn með jafntefli í sjöttu umferð og er í 3.-5. sæti

Björn Þorfinnsson (2388) gerði jafntefli við ítalska alþjóðlega meistarann Roberto Mogranzini (2461) í sjöttu umferð alþjóðlega mótsins í Salento í Ítalíu sem fram fór í dag.  Björn hefur 4 vinninga og er í 3.-5. sæti.  Í sjöundu umferð, sem fram fer á morgun og hefst kl. 13:30 teflir Björn við þýska stórmeistarann Felix Levin (2506).

Þýski stórmeistarinn Igor Khenkin (2670) er efstur með 5 vinninga. 

Í uppgjöri íslensku strákanna í b-flokki vann Vignir Vatnar Stefánsson (1512) Hilmi Frey Stefánsson (1752).  Vignir hefur 3½ og er í 4.-8. sæti.   Hilmir hefur 2 vinninga.  

22 skákmenn tefla í a-flokki og þar af eru 4 stórmeistarar og 6 alþjóðlegir meistarar.  Björn er nr. 8 í stigaröð keppenda.  

• Heimasíða mótsins
• Beinar útsendingar (hefjast almennt kl. 13:30 eða 14:00)

 

HM-einvígi: Jafntefli í 9 skák - staðan er 4½-4½

Jafntefli varð í níundu skák heimsmeistaraeinvígis Gelfand og Anand sem fram fór í dag.  Skákin í dag er sú langlengsta hingað til eða 49 leikir.  

Tíunda skák einvígisins fer fram á morgun og hefst kl. 11. Henrik Danielsen er með myndbandsskýringar frá hverri skák sem finna má á Chessdom. 

Alls tefla þeir 12 skákir. 

• Heimasíða einvígisins
• ChessBomb
• Myndbandsskýringar Henriks
  

Skákfélagi Vinjar berst höfðingleg skákgjöf

Systkini Hauks Angantýssonar, þau Íbsen, Bára, Auður, Ólafur Óskar og Guðrún,  vildu að Skákfélag Vinjar, sem Haukur leiddi sl. vetur, myndi fá skákbækur Hauks til eignar og varðveislu . Hann lést þann 4. maí sl.

Lengi vel hélt Haukur  sérstakan skákbókasjóð sem hann notaði til að kaupa bækur reglulega. Eins og gera mátti ráð fyrir er ekkert af nýútkomnum bókum þarna á ferð en það er gaman að sjá heilu seríurnar og fengur að bókum með sál, sérstaklega þar sem Haukur hefur  tekið þetta lengra en margur og skrifað pælingar sínar og minnispunkta  í einhverjar bókanna.

Þá fylgdi með fjöldi skáktímarita sem og glæsilegt marmaraborð og mikið notaðir trékallar sem prýða  mun  fyrsta borð þegar Vinjarliðið heldur minningarmót um þennan mikla karakter, eftir u.þ. b. mánuð eða svo.

Myndaalbúm (AV)

Úrslitaeinvígi Íslandsmótsins í skák hefst á föstudag í Stúkunni

Fjögurra skáka úrslitaeinvígi Íslandsmótsins í skák fer fram Hvítasunnuhelgina, 25.-28. maí, í Stúkunni í Kópavogi.  Til úrslita tefla þeir Þröstur Þórhallsson og Bragi Þorfinnsson.   Alls tefla þeir 4 kappskákir föstudag-mánudag og tefla svo til þrautar á miðvikudaginn 30. maí með styttri tímamörkum verði jafnt eftir þessar 4 skákir.   Þröstur stjórnar hvítu mönnunum í fyrstu skák einvígisins.  

Mikið er í húfi því sigurvegarinn vinnur sér bæði inn sæti í landsliði Íslands á Ólympíuskákmótinu í Istanbul, sem fram fer 27. ágúst - 10. september, og fær keppnisrétt fyrir Íslands hönd á EM einstaklinga sem fram fer í Legnica í Póllandi 5.-17. apríl 2013.

Dagskrá:

• 1. skák, föstudaginn, 25. maí, kl. 16:00
• 2. skák, laugardaginn, 26. maí, kl. 14:00
• 3. skák, sunnudaginn, 27. maí, kl. 14:00
• 4. skák, mánudaginn, 28. maí, kl. 14:00
• Bráðabani ef jafnt, miðvikudaginn, 30. maí, kl. 16:00 

Samhliða einvíginu á föstu- og laugardag tefla þeir Dagur Ragnarsson og Oliver Aron Jóhannesson til úrslita um Íslandsmeistaratitilinn í skólaskák í eldri flokki.

Jóhanna Björg sigraði á hraðkvöldi Hellis

Jóhanna Björg Jóhannsdóttir sigraði örugglega með fullu húsi 7v á hraðkvöldi Hellis sem fram fór 21. maí sl. Það virtist hafa góð áhrif á taflmennsku hennar að hún kláraði síðast vorprófið í MR þann sama dag og gaf hún anstæðingum sínum engin grið á æfingunni. Í öðru stæti verð Elsa María Kristínardóttir með 5,5v en hún hefur verið mjög sigursæl á þessum æfingum í vetur. Þriðji varð svo Vigfús Ó. Vigfússon með 5v.

Næsti viðburður hjá Helli er atkvöld 4. júní nk.

Lokastaðan

Röð   Nafn                         Vinn   M-Buch. Buch. Progr.

  1   Jóhanna Björg Jóhannsdóttir,   7      19.5  27.0   28.0
  2   Elsa María Kristínardóttir,    5.5    20.0  29.5   21.5
  3   Vigfús Ó. Vigfússon,           5      20.5  29.5   20.0
  4   Sæbjörn Guðfinnsson,           4.5    18.0  25.0   18.5
 5-7  Gunnar Nikulásson,             3.5    19.5  28.5   15.5
      Sverrir Sigurðsson,            3.5    19.0  26.0   14.5
      Jakob Alexander Petersen,      3.5    16.0  21.5   12.0
  8   Jón Úlfljótsson,               3      16.0  23.0   13.0
  9   Óskar Víkingur Davíðsson,      2.5    15.0  20.5    9.0
10-11 Björn Hólm Birkisson,          2      16.0  23.0    7.0
      Bárður Örn Birkisson,          2      14.5  19.5    9.0
 12   Pétur Jóhannesson,             0      14.5  21.0    0.0

Aðalfundur TR fer fram í kvöld

Aðalfundur Taflfélags Reykjavíkur verður haldinn miðvikudaginn 23. maí kl. 20 í húsnæði félagsins að Faxafeni 12.

Dagskrá fundarins er venjuleg aðalfundarstörf.

Stjórn T.R.