EM: Tap gegn Tékkum og Litháum

 Bæði íslensku liðin töpuðu í fyrstu umferð EM landsliða sem fram fór í Varsjá í dag. Liðið í opnum flokki tapaði 1,5-2,5 fyrir sterku liði Tékka. Héðinn, Hannes og Hjörvar gerðu jafntefli en Guðmundur tapaði í sinni fyrstu skák fyrir íslenska landsliðið. Kvennaliðið tapaði fyrir sveit Litháa. Tinna Kristín vann laglegan sigur á fjórða borði en Lenka og Jóhanna Björg töpuðu. Hallgerður Helga situr enn að tafli en ljóst að hún er að berjast fyrir jafntefli.

Enn er eitthvað að óloknum skákum. Nokkur athyglisverð úrslit hafa orðið. Svíar héldu jafntefli gegn Aserum og Búlgarar, sem hafa oft stillt upp sterkara liði, gerðu jafntefli við ólympíumeistara Armena. Flest stefnir svo í óvæntan sigur Austurríkis á Hollendingum.

Nánari fréttir síðar í kvöld. 

• Heimasíða mótsins
• Chess-Results
• Beinar útsendingar
• Myndir frá fyrstu umferð (GB)