EM landsliða hafið - pistill nr. 1

 

EM landsliða er rétt hafið hér í Varsjá í Póllandi. Skáksamband Íslands sendir að þessu sinni lið til keppni bæði í opnum flokki og í kvennaflokki. Þetta er í áttunda skipti sem skipti sem við tökum þátt í opnum flokki en aðeins í þriðja skipti sem við sendum lið í kvennaflokki. Þess má geta að EM landsliða verður haldið í Laugardalshöllinni í nóvember 2015 sem verður stærsta verkefni sem íslensk skákhreyfing hefur tekist á síðan einvígi aldarinnar var haldið hér 1972.

 

Bein útsending frá mótinu

Í gær lagði hópurinn af stað frá BSÍ um kl. 9:30 í boði Kynnisferða. Í hópnum voru 14 manns, það er liðsmennirnir tíu, liðsstjórarnir, tveir skákstjórar og svo yðar einlægur.  Héðinn var kominn áður frá Texas þar sem hann stundar nám.

 

 

Ég og skákstjórarnir (Róbert og Omar) ætlum meðal annars spá í hvernig best sé að haga framkvæmdinni hérlendis árið 2015. Hvað megi læra af Pólverjum og hvað megi gera betur.

Flogið var með Norwegian Air til Osló og þaðan áfram til Varsjár og voru komin á hótelið sem jafnframt er keppnisstaður um kl. 22. Þar virkar Internet um borð sem var mikill lúxus.

Gripið var í spil í Osló og vorum við Davíð ekki lengi að komast að því að við værum afburðaspilamenn.

 

 

Fínar aðstæður á skákstað en eins og venjulega er ólag á internetinu. Það er venja fremur en hitt að internet sé í ólagi við upphaf stórmóta en svo lagast það yfirleitt eftir 1-2 daga.  Menn klikka sí og á því að skákmenn eru algjörir internet-nördar! Sjálfur hef ég juðast áfram á 3G-tengingu sem hefur virkar fínt. Nú reyndar þegar umferðin er byrjuð virkar netið fínt en það gæti breyst aftur þegar skákirnar fara að klárast!

 

 

Hótelið er í miðborg Varsjár og stutt í næstu H & M - verslun sem vekur kátínu hjá hluta hópsins. Lesundum læt ég eftir að giska á hvaða hluta.

Lið Íslands í opnum flokki er:

1. SM Héðinn Steingrímsson (2543)
2. SM Hannes Hlífar Stefánsson (2539)
3. SM Hjörvar Steinn Grétarsson (2511)
4. SM Henrik Danielsen (2502)
5. AM Guðmundur Kjartansson (2455)

Henrik hvílir í fyrstu umferð. Guðmundur teflir sína fyrstu skák fyrir Íslands hönd og Héðinn teflir í fyrsta skipti í landskeppni sem fyrsta borðs maður. Héðinn hefur reyndar áður teflt á fyrsta borði en bara þá einstakar skákir þegar Hannes hefur hvílt.

Liðsstjóri er Helgi Ólafsson, stórmeistari í skák og skólastjóri Skákskóla Íslands.

EM landsliða er afar sterkt mót og hlutfallslega mun sterkara mót en Ólympíuskákmótið því hér taka þátt mun færri veikari þjóðir. Íslenska liðinu er raðað í 28. sæti af 38 sætum á styrkleikalista keppendaþjóðanna með meðalstigin 2524 skákstig.

 

Flestir sterkustu skákmenn Evrópu taka þátt en þó vantar einstaka sterka skákmenn eins og Magnus Carlsen, sem er að tefla heimsmeistaraeinvígi við Anand, sem hefst á laugardaginn, og Vladimir Kramnik sem teflir ekki með Rússum að þessum sinni.

 

Þrátt fyrir fjarveru Kramniks eru Rússarnir sterkastir á pappírnum (meðalstig 2747) en í næstum sætum eru Ólympíumeistarar Armena (2715), Frakkar (2695), Úkraínumenn (2694) og Aserar (2693).

Rússarnir hafa ekki unnið á mótinu síðan 2007 og hefur reyndar gengið bölvanlega í landsliðskeppnum síðustu ár þrátt fyrir að vera iðulega stigahæstir. Þeir hafa ekki sigrað á Ólympíuskákmótinu síðan 2002. Þjóðverjar urðu afar óvænt Evrópumeistarar árið 2011.

 

EM-mótið var lengi að með allt öðru fyrirkomulagi og fyrsta keppnisárið 1957 tóku aðeins fjögur lið og til að byrja með voru 10 manna lið. Núverandi fyrirkomulag með 4 manna lið og 1 varamann byrjaði árið 1992 en síðan 1997 hefur mótið verið haldið á tveggja ára fresti. Íslendingar tóku þátt árið 1992 en svo ekki aftur fyrr en árið 2001. Ágætis grein um sögu mótsins má lesa á heimasíðu mótsins

 

Þetta er í áttunda skipti sem við tökum þátt í opnum flokki. Fyrst tókum við þátt árið 1992 og endaði liðið í 13. sæti sem er besti árangurinn sem hefur náðst. Í fyrra lentum við í 26. sæti sem dugði í efsta sæti í Norðurlandakeppninni.   Við náðum mjög góðum árangri árið 2007 en þó fóru Héðinn og Henrik mjög mikinn.

Við erum með þriðja besta Norðurlandaliðið samkvæmt skákstigum en fyrir ofan okkur eru Svíar (2539) og Danir (2535) en fyrir neðan okkur eru Finnar (2481) og Norðmenn (2312). Norska liðið er ákaflega sérstakt en það skipa fjórir „guttar" fæddir 1997-99. Simen Agdestein átti að leiða hópinn en lenti víst í reiðhjólaslysi rétt fyrir mót. Norðmenn eru varamannslausir. Ég er hálf hissa ekki síst í ljósi þess að þeir halda Ólympíuskákmótið á næsta ári.

Lið Íslands í kvennaflokki:

1. KSM Lenka Ptácníková (2238)
2. Hallgerður Helga Þorsteinsdóttir (1951)
3. Jóhanna Björg Jóhannsdóttir (1901)
4. Tinna Kristín Finnbogadóttir (1882)
5. Elsa María Kristínardóttir (1819)

 

Þetta er aðeins í þriðja skiptið að Ísland sendir kvennalið á EM. Síðast gerðist það í Gautaborg árið 2005.

 

Íslenska liðinu, sem hefur meðalstigin 1993 er raðað nr. 32 af 32 liðu svo búast má við erfiðari keppni í ár hjá stelpunum.        

Þar eru Úkraínukonur efstar (2498) en Rússar og Georgíukonur eru skammt undan (2491). Rússar hafa titil að verja.

Þrjár Norðurlandaþjóðir taka þátt í kvennakeppninni en auk okkar eru það Norðmenn (2099) og Finnar (2030). Maður saknar óneitanlega Dana og Svía.

 

 

Setning mótsins hófst kl. 14:30 (kl. 13:30) og tók fremur langan tíma. Ekki er teflt í einum sal heldur í nokkrum . Í aðalsalnum er 11 efstu viðureignirnar í opnum flokki og 9 í kvennaflokki. Hinum viðureignunum er skipt niður á nokkra sali. Stelpurnar tefla í sal þar sem aðeins þrjár sveitir eru. Þetta verður öðruvísí Höllinni 2015 þegar allir tefla í einum stórum sal.

Fullt af myndum fylgja og fær Heimilistæki og Hlíðar Þór Hreinsson miklar þakkir fyrir að útvega góð myndavél l í ferðina. Þar eiga skákmenn að versla.

Góð stemming er í hópnum sem þakkar allar góðar kveðjur frá Íslandi.

Læt þetta duga í bili - stefni að daglegum pistlum frá skákstað.

Kveðja frá Varsjá,
Gunnar

 

• Heimasíða mótsins
• Chess-Results
• Beinar útsendingar
• Myndir frá fyrstu umferð (GB)