Gallerý Skák - Keppteflið um Friðrikskónginn - Harvey vann fyrsta mótið

Kappteflið um FriðriksKónginn II hófst í Gallerý Skák sl. fimmtudagskvöld sem liður í dagskrá „Íslenska Skákdagsins" sem haldinn er hátíðlegur í dag,  26. janúar ár hvert,  á afmælisdegi Friðriks, með skákviðburðum og taflmennsku um land allt. Þetta var  fyrsta mótið af fjórum í mótaröðinni.

Þátttaka var góð - á þriðja tug keppenda voru mættir til að tafls og til þess að sýna skáklistinni þjóðhollustu í leiðinni með þátttöku sinni, eins og hvatt var til af forystumönnum skákhreyfingarinnar. Setja varð upp aukaborð á ganginum framanvið aðalkeppnissalinn, svo sumir fengu að prófa hvernig það er að  tefla „hinumegin". Er þeir komu svo aftur fílefldir „að handan"  stóðust þeim fáir mátið.

Jafnan er mikil áhersla á það lögð í SkákGallerýinu að keppendur tefli vandað. Engu að síður var taflmennska sumra að þessu sinni ekki upp á marga fiska eins og gengur. Annað slagið brá þó fyrir að menn tefldu með listrænu ívafi eins og hæfir listasmiðjunni, vettvangi mótsins. Var það ekki síst fyrir það að skákkóngurinn sjálfur kempan Friðrik Ólafsson var mættur á vettvang til að leika fyrsta leikinn og hvetja menn til dáða.  

Friðrik tefldi síðan nokkrar skákir í viðlögum sem afleysingamaður við góðan orðstír, var skipt inn á fyrir Guðfinn Err gegn Magnúsi Pé, hins áttræða seggs, aldurforseta mótsins, fyrir Einar Ess gegn Páli Gé  og  Guðmund Err, afmælisbarn dagsins gegn  Þórarni (TéTé), sem allir fengu þannig dýrmætan vinning á silfurfati upp í hendurnar. Komu Friðriks og viðveru var sjálfsögðu fagnað mjög. Enginn hefur borið hróður lands og þjóðar jafn vel og víða á alþjóðavísu á skáksviðinu sem hann. Það er afar veltilfundið og fallið að halda sérstakan skákdag og helga hann honum til heiðurs. Og vekja þannig athygli og áhuga á mikilvægi skákiðkunar til uppbyggingar og viðhalds andlegs atgerfis ungs fólks á öllum aldri og almennu félags- og listagildi manntaflsins.        

Þegar á leið mótið fór kynngimögnuð djúphyggja og  fláræð dulhyggja að setja mark sitt á taflstíl sumra keppenda í meira mæli en annarra - einkum Harveys Georgsonar Tausignant, hins ólseiga gamalreynda skákgúrús, sem síðan vann mótið með 8 vinningum af ellefu.  Að sama skapi fór óheft bitlaus og allt að því taumlaus keppnisharka og  glórulaus barátta að bera suma keppendur ofurliði ásamt klukkunni sem reyndist óvinur margra. Þannig töpuðust skákir sem menn töldu sig vera með unnar fyrir lítið, m.a. missti Þórarinn laxabani einn af önglinum í gjörunninni skák og átti þá bara eftir einn leik til að máta.  

Svona skakkaföll geta eins og áður hefur verið að vikið og tíundað leitt til alvarlegra „bráðaskákáfallastreyturöskunartaugastrekkingstilfella" ef einhverjir eru ekki nálægir til að veita viðkomandi „skyndiáfallastyrkingarviðlagahjálp" á staðnum með því að taka um axlir, slá á bak og  stuttri bænastund þar sem bölvað með honum í hljóði. Sem betur fer eru þó flestir hinir eldri og keppnisreyndari orðnir öllu vanir í þessum efnum og láta lítt á sig fá þótt gramir séu, einkum við sjálfan sig, þó yngstu keppendur séu stundum gráti næst.

 

Þetta er þriðja mótið af fjórum sem Harvey vinnur í Gallerýinu. Þegar orrahríðinni lauk kom í ljós að Friðgeir Hólm hafði hafnað í öðru sæti með 7.5 vinning og svo einir þrír með 7 vinninga, þeir Jon Olav, Guðfinnur og Gunnar Ingi með fjóra niður og loks einir fimm með 6.5 vinning.  Jafnara gat það varla orðið og stigareikningur réði um sætaröð og stigagjöf.  

 

Mótaröðin heldur svo áfram næstu þrjár vikurnar á sama tíma. Allir taflfærir velkomnir - óháð þátttöku í kappteflinu mikla.

Nánari úrslit má sjá á meðf. mótstöflu og vettvangsmyndir í myndasafni.

 

 

 ESE -Skákþankar 26.01.13