Skákakademían býður til veislu á Lækjartorgi á Menningarnótt

Skákgyðjan verður á miðju sviðinu þegar Menningarnótt verður fagnað á laugardaginn. Skáktjald rís á Lækjartorgi og þar mun hver viðburðurinn reka annan frá 12 til 20. Skákakademían stendur fyrir hátíðinni á Lækjartorgi og býður gestum Menningarnætur til þessarar margrétta skákveislu.

Dagskráin hefst klukkan 12 á laugardaginn þegar Helgi Ólafsson stórmeistari og skólastjóri Skákskóla Íslands teflir klukkufjöltefli við kvennalandsliðið, sem senn heldur á Ólympíuskákmótið í Tyrklandi.

Kvennaliðið verður skipað Hallgerði Helgu Þorsteinsdóttur, Jóhönnu Björgu Jóhannsdóttur, Elsu Maríu Kristínardóttur, Tinnu Kristínu Finnbogadóttur, Nansý Davíðsdóttur og Sigurlaugu Regínu Friðþjófsdóttur.

Samhliða fjölteflinu munu krakkarnir í Úrvalssveit Skákakademíunnar hefja taflmennsku við gesti og gangandi. Skákáhugamenn á öllum aldri eru hvattir til að spreyta sig, enda verða sum efnilegustu börn og ungmenni landsins meðal þátttakenda.

Klukkan 13.30 er svo komið að Alheimsmótinu í leifturskák. Tíu meistarar taka þátt, en umhugsunartími á skák er aðeins 60 sekúndur, svo það má bóka mikið fjör og spennu. Keppendur verða Ingvar Þór Jóhannesson, Jón Viktor Gunnarsson, Sigurður Daði Sigfússon, Jóhanna Björg Jóhannsdóttir, Hallgerður Helga, Óskar Long, Kristján Örn Elíasson, Jón Gunnar Jónsson, Jón Trausti Harðarson og Hjörvar Steinn Grétarsson. Bókaforlagið Bjartur gefur vinninga.

Kukkan 15 mun Katrín Jakobsdóttir menntamálaráðherra og heiðursgestur skákhátíðarinnar draga um töfluröð á Íslandsmóti skákfélaga. Forsvarsmenn skákfélaganna eru hvattir til að mæta og vera viðstaddir.

Klukkan 15:30 hefst Eymundsson Íslandsmótið í ,,Heilinn og höndin" þar sem 10 lið takast á. Tveir keppendur eru saman í liði og má samanlögð stigatala þeirra ekki fara yfir 4300 stig.  Heilinn mælir fyrir um hvaða gerð af taflmanni á að hreyfa (til dæmis peð, riddara, kóng) en ,,höndin" velur leikinn. Björn Ívar Karlsson tekur við skráningum í [e-mail] og ættu áhugasamir að hafa samband við hann sem fyrst.

Kukkan 16:00 gefst gestum kostur á að reyna sig í fjöltefi gegn Hjörvari Steini Grétarssyni, 19 ára landsliðsmanni, sem hefur verið á miklu flugi síðustu misserin og er okkar efnilegasti meistari.

Klukkan 17:00 kemur að einum hápunkti dagsins: Bónus-einvígi Hjörvars Steins og Jóhanns Hjartarsonar. Þeir munu tefla 4 hraðskákir og verður afar spennandi að fylgjast með viðureign Hjörvars gegn Jóhanni, sem er stigahæsti meistari íslenskrar skáksögu. Sigurvegarinn fær 40 þúsund króna inneign hjá Bónus, en sá sem bíður lægri hlut 20 þúsund.

Klukkan 18:30 er svo komið að síðasta stórviðburði dagsins í Skáktjaldinu á Lækjartorgi, viðureign Vals og KR. Hvort lið verður skipað fjórum keppendum og tefla allir við alla, tvöfalda umferð. Búast má við rafmagnaðri spennu, enda bæði lið vel skipuð.

Liðstjóri Vals er Gunnar Björnsson, sem leiddi liðið til sigurs á Reykjavíkurmóti íþróttafélaganna sl. haust, og liðstjóri KR er Sigurbjörn Björnsson, sem í vikunni vann glæsilegan sigur á Borgarskákmótinu.

Frábær veisla framundan: Komið fagnandi í Skáktjaldið á Lækjartorgi á Menningarnótt!