Alexander Ipatov og Guo Qi heimsmeistarar ungmenna

Tyrkneski stórmeistarinn Alexander Ipatov (2577), sem var meðal keppenda á N1 Reykjavíkurskákmótinu varð í dag heimsmeistari ungmenna, 20 ára og yngri.  Ipatov fékk 10 vinninga í 13 skákum og varð jafn ungverska stórmeistaranum Richard Rapport (2605) en hafði betur eftir stigaútreikning.  Kínverjinn Ding Liren (2695) og Svíinn Nils Grandelius (2562) urðu í 3.-4. sæti.

Fjórar stúlkur urðu efstar og jafnar með 9,5 vinning.  Það voru Guo Qi (2358), Kína, Natassia Ziaziulkina (2342), Hvíta-Rússlandi, Anastasia Bodnaruk (2414), Rússlandi, og Aulina Medina (2218) urðu efstar og jafnar í kvennaflokki en sú kínverska hafði heimsmeistaratitilinn efstir stigaútreikning.

Mótið fór fram í Aþenu í Grikklandi.  

Enginn íslenskur keppandi tók þátt í mótinu í ár, sem Helgi Áss Grétarsson sigraði á árið 1994, en Hjörvar Steinn Grétarsson mun tefla í mótinu að ári.

• Heimasíða mótsins
• Chess-Results