Skák.is

Bloggfærslur mánaðarins, ágúst 2017

27.8.2017 | 10:42

Lenka efst fyrir lokadag Íslandsmóts kvenna

Lenka Ptácníková (2212) er efst með fullt hús á Íslandsmóti kvenna en þriðja umferð fór fram í gærkveldi. Lenka vann þá Guðlaugu Þorsteinsdóttur (2010). Fjórar skákkonur koma jafnar með 2 vinninga í 2.-5. sæti. Það eru auk Guðlaugar þær Sigurlaug R. Friðþjófsdóttir (1738), Jóhanna Björg Jóhannsdóttir (1862) og Lisseth Acevedo Mendez (1893). Fjórða og næstsíðasta umferð mótsins hefst kl. 11. Lokaumferðin hefst kl. 17.

Á fyrsta borði tefldu forystusauðirnir Lenka og Guðlaug. Lenka tefldi skákina afar vel og saumaði jafnt og þétt að Gullu. EFtir 33 leiki kom þessi staða upp.

Lenka lék 34. Hfh6! Guðlaug getur ekki varið biskupinn á h3 og gafst upp níu leikjum síðar.

Liss Acevedo Mendez lagði til sóknar gegn Freyju Birkisdóttur (1325) og eftir 18. leik Liss 18. Hh1-h2?? kom upp krítíska staða skákarinnar.

Freyja sá að veikleiki hvíts er f4-peðið og reyndi að notfæra sér það með 17...Be1?? Eftir 18. e5 er hvíta staða hins vegar auðunnin og innbyrti Liss vinninginn nokkuð auðveldlega eftir það. Ef Freyja hefði séð hinn magnaða leik 18...Bc5!!, sem auðvitað blasir alls ekki við, hefðu úrslitin hæglega geta orðið öðruvísi.

Sigurlaug R. Friðþjófsdóttir (1738) vann nemenda sinn Batel Goitom Haile (1270) nokkuð örugglega þrátt fyrir góða baráttu Batel.

Hrund Hauksdóttir (1765) lék illa af sér í þrettánda leik 13. Dd2-f2 og hin taktíska Jóhanna Björg Jóhannsdóttir (1862) var ekki lengi að nýta sér það.

13...Bxc3+! 14. bxc3 Dxc3. 15. Dd2 Dxa1+ og Jóhanna vann örugglega nokkru síðar.

Fjórða umferð hefst núna kl. 17. Þá mætast:

Sigurlaug (2) - Lenka (3)
Guðalug (2) - Lisseth (2)
Jóhanna (2) - Veronika (1)
Freyja (1) - Batel (1)
Hrund (1) situr yfir.

Heimasíða mótsins
Chess-Results
Beinar útsendingar á Chess24 (kl. 11 og 17)

Spil og leikir | Slóð | Facebook | Athugasemdir (0)

27.8.2017 | 07:00

Hlemmur Square mótaröðin hefst í kvöld

Hlemmur Square mun í samstarfi við Vinaskákfélagið halda fyrsta kaffihúsahraðskákmótið á Hlemmur Square næstkomandi sunnudag, 27. ágúst, klukkan átta.

Stefnt er að mánaðarlegum mótum þar sem teflt er í rúmgóðum heimkynnum veitingastaðar hótelsins, Pylsa/Pulsa Restaurant.

Tefldar verða 9 umferðir með 5 mínútna umhugsunartíma.
Þátttaka er ókeypis á mótið en Hlemmur Square gefur gjafabréf fyrir efstu þrjú sætin auk þess sem medalía verður veitt fyrir vinningshafann.

verðlaun: Gjafabréf á Pylsa/Pulsa Restaurant / bar fyrir 7.000 kr.
verðlaun: Gjafabréf á Pylsa/Pulsa Restaurant / bar fyrir 5.000 kr.
verðlaun: Gjafabréf á Pylsa/Pulsa Restaurant / bar fyrir 3.000 kr.

Gleðistundarverðlag á kranaveigum fyrir þátttakendur mótsins, ef þörf skyldi krefja í þeim annars harða skóla sem skákin er!

Gert er ráð fyrir því að skákmótið taki þrjár klukkustundir.

Skráning er í gula kassanum efst á síðunni.

Gott væri að skrá sig sem fyrst, þar sem aðeins 28 skákmenn komast að.

Upplýsingar um þegar skráða keppendur má finna hér.

Spil og leikir | Breytt 24.8.2017 kl. 21:51 | Slóð | Facebook | Athugasemdir (0)

26.8.2017 | 20:00

Skákþáttur Morgunblaðsins: Allt gengur á afturfótunum hjá Kasparov

Nú þegar Garrí Kasparov gengur fram á sjónarsviðið og hefur taflmennsku á Grand chess tour í St. Louis í Missouri í Bandaríkjunum, sem er þriðja mót bikarsyrpu sem hófst í París í vor, bregður svo við að einungis einn keppandi af þeim tíu sem mættir eru til leiks í St. Louis hefur teflt kappskák við þennan magnaða afreksmann sem bar höfuð og herðar yfir keppinauta sína á 20 ára tímabili. Skákferill hans fram að kaflaskilunum sem urðu eftir Linares-mótið árið 2005, þegar hann hætti keppni og sneri sér að rússneskum stjórnmálum, hafði þá verið nær óslitin sigurganga.

En tíminn stendur ekki í stað og Kasparov, sem er 54 ára gamall, var vel ljóst áður en mótið hófst á þriðjudaginn að þessi kynslóð skákmanna sem hann er að kljást við er af öðru sauðahúsi en sú sem hann kvaddi á Spáni fyrir 12 árum; foringi hinnar nýju línu, Magnús Carlsen, „skákvélarnar“ og netið hafa breytt landslagi skákarinnar og þar við bætist ný sálfræðileg staða; mótherjarnir – að Wisvanthan Anand undanskildum – eru þetta 20-30 árum yngri menn. Garrí hafði staðið sig vel í 10 skáka hraðskákeinvígi við Nigel Short fyrir nokkrum árum og í fyrra hafði hann í fullu tré við ásana í ólympíuliði Bandaríkjanna, Nakamura, So og Caruana, á hraðskákmóti sem var haldið á þessum sama stað í St. Louis. Velunnarar hans voru því hóflega bjartsýnir þegar keppni hófst á þriðjudaginn en fyrirkomulagið með þeim hætti að allir tefla við alla þrisvar sinnum, níu atskákir (25 10 Bronstein ) sem gefa tvo vinninga fyrir sigur og 18 hraðskákir (5 3 Bronstein) sem gefa vinning fyrir sigur.

Kasparov virtist vel undirbúinn þegar hann settist að tafli í 1. umferð gegn Sergei Karjakin, hvassbrýndur vel og lagði Rolex-úrið sitt til hliðar við skákborðið eins og hann gerði í gamla daga. Eftir jafntefli í fjórum fyrstu skákunum var eins og sjálfstraustið ykist því bæði Aronjan og Nakamura höfðu lent í vandræðum gegn honum og nú var hann staðráðinn í að vinna Rússann unga Jan Nepomniachtchi í 5. umferð. Flókin byrjun og skemmtilegar lausnir en á viðkvæmu augnabliki missti hann þráðinn og tapaði. Þá var eins og orkan væri frá honum tekin og menn höfðu orð á því hversu illa honum hafði tekist að skipuleggja tímanotkun sína. Í 7. umferð þjarmaði hann þó vel og lengi að Tékkanum David Navara; eftir skarpa og vel heppnaða byrjun virtist staðan ætla að tefla sig sjálf. Þá kom hik og Navara náði að snúa sig út úr erfiðleikunum en Kasparov gat ekki sætt sig við að vinningurinn væri genginn sér úr greipum:

St. Louis 2017:

Kasparov – Navara

Í þessari stöðu er ekkert annað en jafntefli að hafa: 49. Dc7+ Kxe6 50. Dc8+ Hd7 (ekki 50.... Ke5 51. Dc3+ Hd4 52. Rc6+ og vinnur) 51. De8+ He7 52. Dc8+ með þráskák.

En Kasparov lék 49. Rc6+?? og eftir 49.... Dxc6+! varð hann að gefast upp þar sem 50. Kxc6 strandar á 50.... Hc2+ og 50. Dxc6 er svarað með 50.... Hd6! og síðan rennur f-peðið upp í borð. Kannski eru þessi endalok besta dæmið um lánleysi Kasparovs í mótinu. Staðan fyrir lokasprettinn í gærkvöldi var þessi:

1. Aronjan 18½ v. (af 27) 2. Nakamura 16½ v. 3. Karjakin 16 v. 4. Nepomniachtchi 15 v. 5. Caruana 14½ v. 6.-7. Le Quang Liem og Dominguez 12 v. 8.-9. Kasparov og Anand 10½ v. 10. Navara 9½ v.

Helgi Ólafsson helol@simnet.is

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 19. ágúst 2017

Skákþættir Morgunblaðsins

Spil og leikir | Breytt 22.8.2017 kl. 11:29 | Slóð | Facebook | Athugasemdir (0)

26.8.2017 | 15:57

Guðlaug og Lenka efstar á Íslandsmóti kvenna

Önnur umferð Íslandsmóts kvenna fór fram í dag. Guðlaug Þorsteinsdóttir (2010) og Lenka Ptácníková (2212) eru efstar með fullt hús. Þær mætast í þriðju umferð sem hefst núna kl. 17. Sex skákkonur eru jafnar í þriðja sæti með 1 vinning.

Lenka vann Jóhönnu Björg Jóhannsdóttir (1862) í vel tefldri skák. Lenka gerði út um skákina með skemmtilegri riddarafittu í 23. leik.

23...Rd5! 24. Dg4 h5! 25. Dd7 Rf4! 26. Rf3 Dxd7 27. Dxd7 Hd8 og svartur hefur unnið lið og vann skákina skömmu síðar.

Guðlaug Þorsteinsdóttir (2010) vann hina ungu Batel Goitom Haile (1270) í viðureign aldursforsetans og yngsta keppendans þrátt fyrir góða baráttu Batel.

Skák Sigurlaugar R. Friðþjófsdóttur (1738) og Hrundar Hauksdóttur (1765) var lengi jafnteflisleg. Í riddaraendatafli tókst Sigurlaugu að loka riddara Hrundar af. Eftirfarandi staða kom upp:

Rétti leikurinn hefði verið 43. Rb7! eða 43. Re4! og og vinningsmöguleikarnir eru hvíts megin. Sigurlaug lék hins vegar 43. Kxh1? en eftir 43...Kxe5 lágu möguleikarnir Hrundar megin vegna væntanlegs frípeðs á c-línunni. Hún vann skákina nokkru síðar.

Skák Veroniku Steinunnar Magnúsdóttur (1785) og Lisseth Acevedo Mendez (1893) var spennandi. Veró tefldi ónákvæmt í tímahraki sem Liss nýtt sér til sigurs.

Þriðja umferð hefst núna kl. 17. Þá mætast:

Lenka (2) - Guðlaug (2)
Lisseth (1) - Freyja (1)
Hrund (1) - Jóhanna (1)
Batel (1) - Sigurlaug (1)
Veronika (0) situr yfir.

Heimasíða mótsins
Chess-Results
Beinar útsendingar á Chess24 (kl. 11 og 17)

Spil og leikir | Breytt s.d. kl. 15:59 | Slóð | Facebook | Athugasemdir (0)

26.8.2017 | 09:45

Íslandsmót kvenna hófst í gær - framhaldið kl. 11 í dag

Níu skákkonur taka þátt í Íslandsmót kvenna sem hófst í gær. Mesta þátttaka á mótinu um langt árabil. Hart var barist í fjórum skákum gærkvöldins og öllum skákunum lauk með hreinum úrslitum.

Lenka Ptácníková (2212) vann peð of Veroniku Steinunni Magnúsdóttur (1785) og í 20. leik fauk maður fyrir borð og gafst þá Veró upp. Vel tefld skák hjá Lenku.

Það stefndi í jafntefli í skák Hrundar Hauksdóttur (1765) og Guðlaug Þorsteinsdóttur (2010). Hrund leik sig slysalega í mát í 45. leik og gafst upp áður en Guðlaug fékk tækifæri á að máta.

Sigurlaug R. Friðþjófsdóttir (1738) var sú eina stigalægri sem vann. Hún tefldi afar traust með svörtu gen Lisseth Acevedo Mendez (1893) og innbyrti vinninginn í 31 leik. Lisseth, sem er frá Kosta Ríka, er búsett hérlendis en hún er barnsmóðir og unnusta Hjörvars Steins Grétarssonar.

Jóhanna Björg Jóhannsdóttir (1862) er að tefla á sínu fyrsta kappskákmóti um langt árbili þurfti að hafa töluvert fyrir sigrinum gegn Freyju Birkisdóttur (1325). Freyja er ásamt Batel Gotoim Haile (1270), sem sat yfir í gær, fulltrúar ungu kynslóðarinnar en þær eru að tefla á sínum fyrsta Íslandsmóti.

Önnur umferð hefst kl. 11. Þá mætast:

Jóhanna (1) - Lenka (1)
Guðlaug (1) - Batel (1)
Sigurlaug (1) - Hrund (0)
Verónikka (0) - Lisseth (0)
Freyja situr yfir

Heimasíða mótsins
Chess-Results
Beinar útsendingar á Chess24 (kl. 11 og 17)

Spil og leikir | Breytt s.d. kl. 09:47 | Slóð | Facebook | Athugasemdir (0)

26.8.2017 | 09:18

Bikarsyrpan TR hafin

Bikarsyrpa TR hófst í gær þegar 18 ungmenni settust niður tilbúin að stýra sínum 16 manna her um hina 64 köflóttu reiti. Keppendalistinn samanstendur af krökkum sem eru nú þegar komin með allnokkra reynslu af þátttöku í skákmótum en stigahæstur þeirra er Blikapilturinn öflugi, Gunnar Erik Guðmundsson (1350).

Úrslit fyrstu umferðar voru á þann veg að sá stigahærri sigraði þann stigalægri en því fer fjarri að allir sigrarnir hafi komið áreynslulaust. Má þar til að mynda nefna að hinn ungi Jósef Omarsson, fæddur 2011, tefldi prýðilega gegn hinum margreynda Árna Ólafssyni (1251), og þá var Einar Tryggvi Petersen með vænlega stöðu gegn Tómasi Möller (1137). Jafntefli gerðu svo Soffía Berndsen og Tristan Thoroddsen í viðureign sem hafði alla burði til að vera framhaldið.

Önnur umferð fer fram á dag og hefst kl. 10. Þá mætast m.a. á efsta borði Gunnar Erik og Tómas.

Sjá nánar á heimasíðu TR.

Spil og leikir | Slóð | Facebook | Athugasemdir (0)

25.8.2017 | 13:00

Skákæfingar Hugins fyrir börn og unglinga hefjast mánudaginn 28. ágúst

Barna- og unglingaæfingar Skákfélagsins Hugins í Mjóddinni hefjast aftur eftir sumarfrí mánudaginn 28. ágúst 2017.

Æfingarnar byrja kl. 17:15 og þeim lýkur yfirleitt rétt fyrir kl. 19.

Æfingarnar eru opnar öllum 15 ára og yngri en skipt verður í tvo flokka eftir aldri og styrkleika á flestum æfingum.

Engin þátttökugjöld.

Æfingarnar verða haldnar í félagsheimili Hugins í Álfabakka 14a, Mjódd. Inngangur er milli Fröken Júlíu og Subway en salur félagsins er á þriðju hæð hússins.

Á æfingunum verða 5 eða 6 umferðir með umhugsunartíma 10 eða 7 mínútur. Einnig verður farið í dæmi og endatöfl eins og tími vinnst til.

Þegar starfsemin verður komin vel af stað verður unnið í litlum verkefnahópum á einni æfingu í mánuði og þannig stuðlað að því að efla einingu og samstöðu innan hópsins. Þær æfingar verða eingöngu fyrir félagsmenn og verða kynntar síðar. Jafnframt verður þegar tímabilið er komið af stað í boði kennsla fyrir félagsmenn utan hefðbundins æfingatíma.

Umsjón með æfingunum hefur Vigfús Ó. Vigfússon

Spil og leikir | Breytt s.d. kl. 07:50 | Slóð | Facebook | Athugasemdir (0)

25.8.2017 | 09:00

Íslandsmót kvenna hefst í kvöld

Íslandsmót kvenna fer fram helgina 25.-27. ágúst í húsnæði Skákskóla Íslands Faxafeni 12. Tefldar verða fimm umferðir eftir svissneska kerfinu. Teflt verður í einum flokki, þ.e. mótið opið öllum konum/stúlkum.

Níu skákkonur taka þátt og er búið að para í fyrstu umferð. Þá mætast:

Bo.	Name	Res.	Name
1	Ptácníková Lenka	-	Magnúsdóttir Veronika Steinunn
2	Hauksdóttir Hrund	-	Þorsteinsdóttir Guðlaug U
3	Acevedo Mendez Lisseth	-	Friðþjófsdóttir Sigurlaug R
4	Birkisdóttir Freyja	-	Jóhannsdóttir Jóhanna Björg
	Haile Batel Goitom	0 - -	Bye

Þátttökugjöld: Engin.

Umferðarfjöldi: Fimm umferðir

Tímamörk: 90 mín. + 30 sek. á leik

Dagskrá:

1. umferð, föstudaginn, 25. ágúst, kl. 19:30
2. umferð, laugardaginn, 26. ágúst, kl. 11:00
3. umferð, laugardaginn, 26. ágúst kl. 17:00
4. umferð, sunnudaginn, 27. ágúst, kl. 11:00
5. umferð, sunnudaginn, 27. ágúst, kl. 17:00

Verðlaun:

75.000.-
45.000.-
30.000.-

Verðlaun skiptast jafnt séu konar jafnar í verðlaunasætum. Teflt verður til úrslita um Íslandsmeistaratitilinn með styttri umhugsunarhtíma verði fleiri en ein efst.

Allar skákir mótsins verða sýndar beint. Beinar útsendingar má nálgast á heimasíðu SÍ.

Mótið á Chess-Results.

Spil og leikir | Breytt s.d. kl. 09:48 | Slóð | Facebook | Athugasemdir (0)

25.8.2017 | 07:00

Bikarsyrpa TR hefst í dag

Bikarsyrpa Taflfélags Reykjavíkur hefur fest sig í sessi undanfarin misseri og fer nú af stað fjórða árið í röð. Líkt og síðastliðinn vetur verða mót syrpunnar fimm talsins og verða tefldar sjö umferðir í hverju móti. Mótin fara fram í Skákhöll TR að Faxafeni 12.

Fyrir börn sem vilja taka framförum í skák þá er gott að byrja sem fyrst að tefla í kappskákmótum, en hingað til hefur þeim börnum sem vilja tefla á “alvöru mótum” einkum staðið til boða að taka þátt í opnum mótum. Þar er styrkleikamunur oft mikill og mótin taka langan tíma, auk þess sem mörgum börnum óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því. Þessi mótaröð TR er ekki síður sniðin að þörfum þeirra barna sem dreymir um að næla sér í sín fyrstu skákstig.

Einungis börn á grunnskólaaldri (fædd árið 2002 eða síðar) sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og börnin njóta þess betur að tefla. Tímamörkin eru jafnframt styttri, og henta börnum betur en langar 90 mínútna skákir sem tíðkast á hefðbundnum kappskákmótum fullorðinna. Mótin uppfylla öll skilyrði Alþjóða skáksambandsins FIDE og eru reiknuð til alþjóðlegra skákstiga.

Fyrsta mót Bikarsyrpunnar hefst föstudaginn 25. ágúst og stendur til sunnudagsins 27. ágúst. Tefldar eru 7 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo mikilvægt sé að börnin vandi sig og noti tímann vel, þá má gera ráð fyrir að margar skákir taki mun styttri tíma.

Dagskrá:

1. umferð: 25. ágúst kl. 17.30 (fös)
2. umferð: 26. ágúst kl. 10.00 (lau)
3. umferð: 26. ágúst kl. 13.00 (lau)
4. umferð: 26. ágúst kl. 16.00 (lau)
5. umferð: 27. ágúst kl. 10.00 (sun)
6. umferð: 27. ágúst kl. 13.00 (sun)
7. umferð: 27. ágúst kl. 16.00 (sun)

Verðlaunaafhending fer fram strax að lokinni 7. umferð.

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Tilkynna þarf skákstjóra um yfirsetu fyrir lok umferðarinnar á undan.

Sjálfkrafa tap dæmist á keppanda sem mætir á skákstað meira en 15 mínútum eftir að viðkomandi umferð hefst.

Þátttökugjald í mótið er 1.500kr. Börn sem eru félagar í TR greiða ekki þátttökugjald.

Sigurvegari mótsins hlýtur að launum bikar og þá hlýtur einnig efsta stúlkan í hverju móti bikar. Verðlaunapeningur eru veittur fyrir 2. sæti og 3. sæti. Sérstök verðlaun verða veitt næsta vor fyrir besta samanlagðan árangur, þar sem mest fjögur mót gilda; taflsett, skákklukka, 5.000kr bókainneign ásamt veglegum farandbikar. Þá verða veitt sérstök verðlaun fyrir besta samanlagðan árangur, þar sem mest fjögur mót gilda, fyrir börn sem eru félagar í TR, en það eru einkatímar hjá einhverjum af sterkustu skákmönnum félagsins; 1. sæti gefur 5 einkatíma, 2. sæti gefur 3 einkatíma og 3. sæti gefur 2 einkatíma.

Skráning fer fram í gegnum skráningarform hér að neðan. Hlökkum til að sjá ykkur!

Skráningarform

Skráðir keppendur

Mót Bikarsyrpunnar í vetur: 25.-27. ágúst, 29. sep-1. okt, 27.-29. okt, 16.-18. feb, 6.-8. apr

Spil og leikir | Breytt 17.8.2017 kl. 08:45 | Slóð | Facebook | Athugasemdir (0)

24.8.2017 | 22:13

Fjörug fyrsta umferð í Meistaramóti Hugins

Það var hart barist í fyrstu umferð Meistaramóts Hugins sem hófst í gær og ekkert gefið eftir þótt stigamunur milli keppenda væri nokkur. Nokkur óvænt úrslit litu dagsins ljós strax í fyrstu umferð. Hjálmar Sigurvaldason og Arnar Milutin Heiðarsson gerðu góð jafntefli við stigahærri keppendur.

Björn Óli Hauksson vann svo Magnús Magnússon í skemmtilegri skák í sínu fyrsta móti hér á landi í meira en 30 ár. Þá eru að vísu frá taldar örfáar skákir í Íslandsmóti skákfélaga. Stigin hjá Birni Óla segja ekki alla söguna því þau eru að stofni til íslensku stigin frá því áður en hætti að tefla hér en skákstyrkleika sinn tók hann ekki út fyrr en á námsárunum í Danmörku þegar hann var mjög virkur. Danirnir reiknuðu fá mót til stiga á þessum árum og alls ekki dönsku deildakeppnina svo Björn Óli hefur engin dönsk stig, engin alþjóðleg stig og bara þessi gömlu íslensku skákstig. Það hefur svo gengið upp og ofan hjá honum halda skákstyrkleika í erilsömu starfi heima og erlendis.

Af öðrum viðureignum er það helst að segja Hjörvar virtist hafa fá tromp í hendi í skákinni á móti Þórði Guðmundssyni en hann sá lengra en við hinir og var allt í einu kominn með vinningsstöðu eins og ekkert væri eðlilegra. Vigfús breytti sjálfur draumi skákstjórans um rólega og stutta fyrstu umferð í hálfgerða martröð með því að tefla lengstu skák umferðarinnar til að reyna að kreista vinning út úr jafnri stöðu á móti Herði Jónassyni og það tókst fyrir rest.

2. umferð verður tefld mánudaginn 28. ágúst og hefst kl. 19.30. Þá mætast m.a. Hjörvar – Vigfús, Ólafur Guðmarsson – Björn Þorfinnsson, Vignir Vatnar – Hörður, Hjörtur Ingvi – Sigurður Daði og Björgvin – Björn Óli. Svo verður einnig áhugavert að fylgjast með Tómas Ponzi kljást við Jón Úlfljótsson en Tómas en þetta er einnig fyrst mót Tómasar í meira en 30 ár.

Nánar á heimasíðu Hugins.

Úrslit 1. umferðar í chess-results:

Pörun 2. umerðar í chess-results:

Spil og leikir | Slóð | Facebook | Athugasemdir (0)

« Fyrri síða | Næsta síða »