Pörunarnámskeið haldið 6. og 7. september

Fræðslunefnd SÍ stendur fyrir pörunarnámskeiði dagana sjötta og sjöunda september. Kennt verður sitthvort kvöldið frá 20:00 til um það bil 21:30. Kennslan fer fram í Skáksambandi Íslands að Faxafeni 12. 

Á námskeiðinu verður kennt hvernig nota megi pörunarforritið Swiss-Manager til þess að halda skákmót. 

Nokkrir kennarar verða á námskeiðinu og verður miðað við að hver kennari hafi ekki fleiri en tvo nemendur á sinni könnu svo að kennslan geti verið sem mest einstaklingsmiðuð. 

Þátttakendur þurfa ekki að hafa neinn grunn í að halda utan um skákmót í tölvu.  

Þátttakendur þurfa að koma með eigin fartölvu á námskeiðið. 

Meðal kennara verða Gunnar Björnsson, Björn Ívar Karlsson, Omar Salama og Stefán Bergsson. 

Skákfélög eru hvött til að senda fulltrúa frá sér á námskeiðið. 

Þátttaka ókeypis. 

Skráning á [e-mail].

Magnús Hjaltason sigurvegari fyrsta móts Bikarsyrpunna

Magnús Hjaltason úr Fjölni hafði sigur í fyrsta móti Bikarsyrpunnar sem fram fór um nýliðna helgi. Magnús, sem hefur frá upphafi Bikarsyrpunnar verið þar tíður gestur, hlaut 5,5 vinning úr skákunum sjö og fór taplaus í gegnum mótið. Næstir í mark með 5 vinninga komu TR-ingurinn Adam Omarsson og Gunnar Erik Guðmundsson úr skákdeild Breiðbliks, en Adam var hærri á mótsstigum og hlaut því annað sætið. Stúlknaverðlaun féllu í skaut Soffíu Berndsen sem landaði 4 vinningum en ásamt henni voru þær Anna Katarina Thoroddsen og Iðunn Helgadóttir fulltrúar kvenþjóðarinnar að þessu sinni.

Mótahald fór fram eins og best verður á kosið enda þátttakendur orðnir margreyndir við hin köflóttu skákborð. Eins og venja er var flautað til leiks seinnipart föstudags og lauk síðustu umferð rétt eftir kl. 17 á sunnudag. Úr varð afar spennandi og skemmtilegt mót þar sem allnokkrir keppendur börðust á toppnum og þá voru mjög margar jafnar og tvísýnar viðureignir háðar á milli keppenda hvort sem þeir voru í toppbaráttu eður ei. Bæting allra viðstaddra í skáklistinni var áberandi og ljóst er að efniviðurinn er mikill.

Þegar að lokadeginum kom var Gunnar Erik efstur en Benedikt Þórisson, Magnús og Ingvar Wu Skarphéðinsson fylgdu fast á eftir. Í fimmtu umferð gerðu Gunnar og Magnús jafntefli sín í milli en á sama tíma lagði Benedikt Ingvar og þar með voru Gunnar og Benedikt efstir og jafnir fyrir sjöttu og næstsíðustu umferð. Sú umferð bauð einmitt upp á spennandi innbyrðis viðureign þeirra í milli þar sem samið var jafntefli eftir rafmagnaða baráttu og prýðilega teflda skák. Úrslit á næstu borðum voru þau að Adam sigraði Árna Ólafsson og slíkt hið sama gerði Magnús gegn Soffíu. Staðan fyrir lokaumferðina var því þannig að hvorki fleiri né færri en fjórir keppendur voru efstir og jafnir með 4,5 vinning; Adam, Benedikt, Gunnar og Magnús. Jafnara getur það varla orðið.

Í sjöundu og síðustu umferð mættust síðan á tveim efstu borðunum Adam og Gunnar, sem og Magnús og Benedikt. Lítið var gefið eftir í viðureignunum og snemma skákar var Adam kominn manni yfir gegn Gunnari en sá síðarnefndi varðist vel og náði að vinna manninn til baka og að lokum var samið um skiptan hlut. Magnús stýrði hvítu mönnunum gegn Benedikt og upp kom hin enska árás Sikileyjarvarnar í vel tefldri skák af beggja hálfu. Magnús hafði þó sigur að lokum og tryggði sér þar með sigurinn í mótinu með 5,5 vinning eins og fyrr segir. Þess má geta að Magnús var einmitt með besta samanlagðan árangur í mótum Bikarsyrpunnar á síðasta tímabili.

Enn einni langri, strangri og skemmtilegri Bikarsyrpuhelgi er því lokið og þökkum við í TR öllum keppendum fyrir þátttökuna. Hér að neðan er hlekkur inn á öll úrslit helgarinnar sem og skákir mótsins og myndaalbúm. Til að skoða skákirnar má t.d. notast við forritið Chessbase Reader sem er frítt og hægt að nálgast hér. Næsta mót syrpunnar fer fram helgina 29. september – 1. október.

Nánar á heimasíðu TR.

• Chess-Results
• Skákirnar

Ingvar vann fyrsta mótið í Hlemmur Square-mótaröðunni

Vinaskákfélagið í samstarfi við Hlemm Square hélt fyrsta kaffihúsa hraðskákmótið á Hlemm, sunnudaginn 27 ágúst, klukkan 20.

Mótið tókst afar vel og mættu 13 skákmenn til leiks.

Tefldar verða 9 umferðir með 5 mínútna umhugsunartíma og var þátttaka ókeypis. Stefnt er að mánaðarlegum mótum þar sem teflt er í rúmgóðum heimkynnum veitingastaðar hótelsins, Pylsa/Pulsa Restaurant.

Hlemmur Square gaf gjafabréf fyrir efstu þrjú sætin auk þess sem medalía var veitt fyrir vinningshafann.

1. verðlaun: Gjafabréf á Pylsa/Pulsa Restaurant / bar fyrir 7.000 kr.
2. verðlaun: Gjafabréf á Pylsa/Pulsa Restaurant / bar fyrir 5.000 kr.
3. verðlaun: Gjafabréf á Pylsa/Pulsa Restaurant / bar fyrir 3.000 kr.

Arnljótur Sigurðsson viðburðarstjóri var skipuleggjandi mótsins og skákstjóri og dómari var Hörður Jónasson.

Á meðan skákmenn tefldu bauð viðburðarstjóri upp á eins og hann segir sjálfur – Gleðistundarverðlag á kranaveigum fyrir þátttakendur mótsins, ef þörf skyldi krefja í þeim annars harða skóla sem skákin er! Skákmótið stóð í cirka 2 1/2 klukkustundir.

Eins og áður segir mættu 13 skákmenn og stóð Ingvar Thor Jóhannesson uppi sem sigurvegari með 9 vinninga eða full hús.

Sigurvegari mótsins Ingvar Thor Jóhannesson

Í öðru sæti varð Gunnar Fr. Rúnarsson með 8 vinninga og í þriðja sæti varð Arnljótur Sigurðsson með 7 vinninga, en hann gaf vinninginn frá sér og urðu 5 skákmenn í 4-8 sæti, en eftir stigaútreikning, þá varð Ingi Tandri Traustason í 4 sæti með 5 vinninga og fékk hann þriðju verðlaun.

Lenka Íslandsmeistari kvenna í níunda sinn!

Lenka Ptácníková (2212) varð í gær Íslandsmeistari kvenna í níunda sinn og þar af í sjötta sinn í röð! Lenka vann mótið með fullu húsi - vann alla fimm andstæðinga sína. Jóhanna Björg Jóhannsdóttir (1862) varð önnur með 4 vinninga.

Árangur Jóhönnu kom á óvart, ekki síst henni sjálfri, en hún hafði ekki teflt kappskák síðan árið 2014! Í lokaumferðinni vann hún Guðlaug Þorsteinsóttur (2010) í vel tefldri skák. Sigurlaug R. Friðþjófsdóttir (1738), Guðlaug og Lisseth Acevedo Mendez (1893) urðu jafnar í þriðja sæti.

Lenka vann Freyju Birkisdóttur (1325) en hin unga Freyja veitti henni töluverða mótspyrnu og var skák þeirra lengsta skák umferðinnar þrátt fyrir mesta stigamuninn.

Á öðru borði hafði Jóhanna hvítt á Guðlaugu í skák sem myndi að öllu líkindum ráða úrslitum um silfrið. Jóhanna tefldi að krafti og vann peð af Guðlaugu. Jóhanna gerði svo út um skákina á laglegan hátt.

 

42. Hxf7+! Rxf7 43. Rxe4+ og Guðlaug gafst upp og silfrið þ.a.l. orðið Jóhönnu Bjargar. Afar lagleg taflmennska hjá Jóhönnu í skákinni.

Á þriðja borði tefldu Lisseth Mendez (1893) og Hrund Hauksdóttir (1765). Liss átti leik eftir 15...d5 hjá Hrund.

16. Bb5! dxe4? (svartur mátti alls ekki opna d-línuna. Mun betra hefði verið 16...Kb8). 17. Bxc6! Hxd1+ 18. Hxd1 bxc6 19. Dxa7 Db4 20. Ra5! Bd5 21. Da8+ og svartur gafst upp. 21...Kd7 er svarað með 22. Dxc6+. Kraftmikil taflmennska hjá Liss. 

Veronika Steinunn Magnúsdóttir (1785) vann Batel Goitom Haile (1270). 

 

• Heimasíða mótsins
• Chess-Results
• Beinar útsendingar á Chess24 (kl. 11 og 17)

 

Kynningarfundur um breytingar á hraðskákreglum

Breytingar urðu á hraðskákreglum FIDE 1. júlí. Omar Salama mun halda kynningarfund um nýju reglurnar fimmtudaginn 31. ágúst kl. 17:30. Áætlað er að kynningarfundinum ljúki um kl. 19:30. Efni um reglurnar verður dreift til fundargesta. 

Allir skákstjórar eru hvattir til að sækja þennan fund. Að sjálfsögðu er allir áhugasamir skákmenn einnig velkomnir. 

Síðar um kvöldið, kl. 20, verður svo kynningarfundur um ný valfrjáls aðildargjöld SÍ. Allir velkomnir.

Skákæfingar Hugins hefjast í dag

Barna- og unglingaæfingar Skákfélagsins Hugins í Mjóddinni hefjast aftur eftir sumarfrí mánudaginn 28. ágúst 2017. 

 

Æfingarnar byrja kl. 17:15 og þeim lýkur yfirleitt rétt fyrir kl. 19. 

 

Æfingarnar eru opnar öllum 15 ára og yngri en skipt verður í tvo flokka eftir aldri og styrkleika á flestum æfingum. 

 

Engin þátttökugjöld. 

 

Æfingarnar verða haldnar í félagsheimili Hugins í Álfabakka 14a, Mjódd. Inngangur er milli Fröken Júlíu og Subway en salur félagsins er á þriðju hæð hússins. 

 

Á æfingunum verða 5 eða 6 umferðir með umhugsunartíma 10 eða 7 mínútur. Einnig verður farið í dæmi og endatöfl eins og tími vinnst til. 

 

Þegar starfsemin verður komin vel af stað verður unnið í litlum verkefnahópum á einni æfingu í mánuði og þannig stuðlað að því að efla einingu og samstöðu innan hópsins.  Þær æfingar verða eingöngu fyrir félagsmenn og verða kynntar síðar. Jafnframt verður þegar tímabilið er komið  af stað í boði kennsla fyrir félagsmenn utan hefðbundins æfingatíma. 

 

Umsjón með æfingunum hefur Vigfús Ó. Vigfússon

Viltu prófa skákforrit í HR?

Við erum enn að prófa fyrst augnhreyfinga skákforritið í heimi í Háskólanum í Reykjavík. 40 manns hafa litið við hjá okkur, þar af nokkrir stórmeistarar og alþjóðlegir meistarar. Við viljum gjarnan fá fleiri, sérstaklega á aldrinum 7-15 ára. Einnig mega fleiri titilhafar gjarnan líta við. Þetta snýst fyrst og fremst um að leysa fjölbreyttar skákþrautir. Þrautirnar eru hannaðar bæði með fjölbreytni í huga og einnig eiga þær að vera ákveðin áskorun. Enn sem komið er hefur enginn náð að leysa allar rétt í fyrstu tilraun.

Hægt að senda mér línu [e-mail] eða 8465500 og við finnum tíma.

Lenka með vinningsforskot fyrir lokaumferðina

Lenka Ptácníková (2212) hefur vinningsforskot fyrir lokaumferð Íslandsmóts kvenna sem hófst nú fyrir stundu. Lenka vann Sigurlaug R. Friðjófsdóttur (1738) fyrr í dag og hefur fullt hús eftir fjórar umferðir. Guðlaug Þorsteinsdóttir (2010) og Jóhanna Björg Jóhannsdóttir (1862) eru í 2.-3. sæti með 3 vinninga og mætast í mikilvægri skák. 

Lenka þjarmaði jafnt og þétt að Sigurlaugu og vann góðan sigur í 38 leikjum. Fjórði sigur Lenku í röð og þar með ljóst að hún hefði vinningsforskot fyrir lokaumferðina.

Guðlaug Þorsteinsdóttir (2010) tefldi afar kraftmikið gegn Lissith Acevedo Mendez (1893). Eftir 15 leiki kom þessi staða upp.

 

16. g4! fxg4 17. hxg4 Rf6 18. Rg5! Da5 19. Bf4! Hfb8 20. Dxg6 1-0.

Jóhanna Björg Jóhannsdóttir (1862) og Veronika Steinunn Magnúsdóttir (1785) tefldu spennandi skák. Hin krítíska staða kom upp eftir 33. leik hvíts 33. Kg1-g2.

 

 

Veronika hefði best varist með 33...Rg6 en kaus þess í stað að fara í sókn. og lék 33...Hc5? Jóhanna drap riddarann og e7 og hélt svo með kónginn á h5 og vann nokkru síðar. Lengsta skák umferðiarinnar var á milli Freyju Birkisdóttur (1325) og Batel Goitom Haile, langyngstu keppenda mótsins. Freyja hafði unnið skiptimun en Batel hélt sér fast. Freyja fann laglega leið í þessari stöðu.

 

47. H7xd5! cxd5 48. Hxd5. Freyja hefur nú miklu betri í stöðu í hróksendatafli sem hún vann nokkru síðar.

Fimmta og síðasta umferð hófst núna kl. 17

1. Lenka (4) - Freyja (2)
2. Jóhanna (3) - Guðlaug (3)
3. Lisseth (2) - Hrund (2)
4. Veronika (2) - Batel (1)
5. Sigurlaug (2) situr yfir.

 

 

• Heimasíða mótsins
• Chess-Results
• Beinar útsendingar á Chess24 (kl. 11 og 17)

 

Omar Salama (Sjóvá) sigraði á Kringluskákmóti Víkingaklúbbsins

Omar Salama sem tefldi fyrir Sjóvá sigraði á Kringluskákmótinu sem fram fór fimmtudaginn 24. ágúst. Omar fékk 6.5 vinninga af sjö mögulegum og leyfði aðeins eitt jafntefli gegn hinum unga Gauta Páli Jónssyni í síðustu umferð.  Annar varð alþjóðameistarinn Björn Þorfinnsson sem tefldi fyrir Bónus Kringlunni með 6 vinninga af 7. mögulegum.  Þriðji varð svo Gauti Páll Jónsson sem tefldi fyrir Jón og Óskar. 

Efstur Víkinga varð Gunnar Fr Rúnarsson með 5 vinninga og hlýtur hann því titilinn Hraðskákmeistari Víkingaklúbbsins. 2017.  Efst kvenna varð Lenka Ptcnikova. Gunnar Erik Guðmundsson varð efstur drengja og Sofía Berndsen varð efst stúlkna.  Alls tóku 45 keppendur og 29 fyrirtæki þátt í mótinu. 

Tefldar voru 7. umferðir með 7. mínútna umhugsunartíma og skákstjóri var Kristján Örn Elíasson. 

Úrslit Opinn flokkur:  1. Omar Salama 2. Björn Þorfinnsson 3. Gauti Páll Jónsson 

Úrslit konur: 1. Lenka Ptcnikova 2. Veronika Steinunn Magnúsdóttir3. Sofía Berndsen

Úrslit drengir: 1. Gunnar Erik Guðmundsson 2. Benedikt Þórisson 3. Bjartur Þórisson

Úrslit stúlkur: 1. Sofía Berndsen 2. Anna Katarína Thoroddsen 3. Bergþóra Helga Gunnarsdóttir 

Mótið á chess-Results hér

Nánar á heimasíðu Víkingaklúbbsins.

 

Hart barist í Bikarsyrpunni – Gunnar Erik leiðir

Ekkert var gefið eftir á degi tvö í Bikarsyrpunni þegar umferðir 2-4 fóru fram. Staða efstu keppenda er nú þannig að Gunnar Erik Guðmundsson (1350) leiðir með 3,5 vinning en skammt undan koma Benedikt Þórisson (1049), Magnús Hjaltason (1262) og Ingvar Wu Skarphéðinsson, allir með 3 vinninga. Ingvar skaut sér í toppbaráttuna eftir seiglusigur gegn Bjarti Þórissyni í fjórðu umferð þar sem hann varðist vel drottningu undir og náði að snúa tapaðri stöðu sér í vil.

Þrjár síðustu umferðirnar verða tefldar í dag sunnudag og hófst sú fimmta kl. 10. Þá mæstast á efstu borðum Gunnar og Magnús, Benedikt og Ingvar, sem og Ísak Orri Karlsson (1268) og Soffía Berndsen. Við hvetjum áhorfendur til að líta við og minnum á að handan gangsins í TR, í húsnæði Skáksambands Íslands, fer fram á sama tíma Íslandsmót kvenna.

Nánar á heimasíðu TR.

• Heimasíða TR
• Chess-Results