Suðurlandsmótið fer fram á sunnudag

Næstkomandi sunnudag hinn 26.maí fer fram Suðurlandsmótið í skák, mótið hefst kl 11:00 og má áætla að því ljúki um kl 16:00.  Teflt verður í Selinu á Selfossi.

Mótið verður með sama sniði og síðasta ár þ.e. 7 atskákir með umhugsunartímanum 20 mín.

Mjög góð verðlaun sem og veitingar í boði, venju samkvæmt!

Öllum er opin þátttaka ein einungis þeir sem lögheimili eiga í Suðurkjördæmi geta orðið Suðurlandsmeistarar.

Þátttökugjald 1500.-kr.

Núverandi Skákmeistari Suðurlands er Ingvar Örn Birgisson.

Hægt er að skrá sig til leiks með athugasemd við samskonar færslu á heimasíðu SSON eða með því að hafa samband við formann SSON:[e-mail]

á myndinni má sjá yfir keppnissalinn á mótinu í fyrra en þá tóku 25 keppendur þátt.  Hér má sjá valinkunna snillinga s.s. Erling Jensson, Ingimund Sigurmundar fremsta, þar fyrir aftan glittir í Erling Atla að tafli við Kjartan Má Másson og Rimskælingurinn knái Jón Trausti er íbygginn meðan Sverrir Unnars er á spekingslegu rölti.

Heimasíða SSON

Meistaramót Skákskóla Íslands hefst á föstudag

Meistaramót Skákskóla Íslands fyrir starfsárið 2012/2013 hefst föstudaginn 24. maí. Tefldar verða sjö umferðir eftir svissneska kerfinu. Þátttökurétt hafa nemendur skólans og allir þeir sem tekið hafa þátt í námskeiðum á vegum  skólans eða hlotið þjálfun á vegum skólans.  

Núverandi meistari Skákskóla íslands er Mikhael Jóhann Karlsson

 Þátttökuréttur:

Allir nemendur skólans og þeir sem tekið hafa þátt í námskeiðum á vegum skólans.

Að öðru leyti áskilur skólastjóri/mótsnefnd sér rétt til að bjóða völdum einstaklingum til þátttöku.

Dagskrá mótsins verður með eftirfarandi hætti:

Umferðafjöldi: Sjö umferðir. Í þrem fyrstu umferðunum verða tefldar atskákir en fjórar lokaumferðirnar eru kappskákir.

Tímamörk: Atskákir 25 10  þ.e 25 mínútur að viðbættum sekúndum fyrir hvern leik. 

Kappskákir:  90 30 þ.e. 90 mínútur á alla skákina og 30 sekúndur bætast við eftir hvern leik.

Fyrirkomulag: Svissneska kerfið - swiss perfect.

Skákstig: Mótið verður reiknað til skákstiga.  Fjórar síðustu umferðirnar eru reiknaðar til íslenskra- og alþjóðlegra stiga. At-skákirnar eru ekki reiknaðar til stiga. 

Verðlaun:

A:

1. verðlaun:

Meistaratitill Skákskóla Íslands 2012/2013 og farandbikar. Einnig  flugfar m/Flugleiðum á Evrópuleið* og uppihalds kostnaði kr. 30 þús.

2. verðlaun: Flugfarmiði á leiðum Flugfélags Íslands innanlands.  

3. - 5. verðlaun: Vandaðar skákbækur.

Sérstök stúlknaverðlaun:

Farmiði á leiðum Flugfélags Íslands innanlands.

 

Aldursflokkaverðlaun. 

1. Tvenn verðlaun fyrir þá keppendur sem ná

bestum árangri í hópi 14 ára og yngri

2. Tvenn verðlaun fyrir þær

stúlkur sem bestum árangri ná í mótinu.

Verðlaun fyrir keppendur 12 ára og yngri.

1. - 3. verðlaun: Vandaðar skákbækur.

 

* ^{Mótshaldarinn áskilur sér rétt til að finna hagstæðasta fargjald sem hægt er að fá enda verði tilkynnt um ferðir með góðum fyrirvara.} 

* Verðlaunahafi verður að nýta sér farmiða innan 12 mánaða frá lokum mótsins.

 

B:

Dagskrá:

1. umferð: Föstudagurinn 24. maí kl. 18  

2. umferð: Föstudagurinn 24. maí kl. 19

3. umferð. Föstudagurinn 24. maí kl. 20.

4. umferð: Laugardagurinn 25.maí kl. 10-14  

5. umferð: Laugardagurinn 25. maí kl. 15 - 19

6. umferð: Sunnudagurinn 26.maí kl. 10.-14.

7. umferð: Sunnudagurinn 26. maí kl. 15-19.

^{* Hljóti einhver stúlka 1. eða 2. verðlaun mun 2. sæti meðal stúlkna gilda til sérstakra stúlknaverðlauna.}

Verðlaunaafhending fer fram strax að móti loknu.

Þátttöku skal tilkynna í síma SÍ 568 9141, netfangið [e-mail] eða [e-mail].

Mótsnefnd áskilur rétt til að gera breytingar á fyrirfram boðaðri dagskrá.

Hannes Hlífar með fjöltefli í Víkinni í dag

Hannes Hlífar Stefánsson stigahæsti íslenski skákmaður Víkingaklúbbsins verður með fjöltefli í Víkinni Víkingsheimilinu í dag miðvikudagin 22. mai kl. 17.00-18.30.  Allir krakkar velkomnir að tefla við meistarann meðan næg töfl eru til staðar (öruggast að taka tafl og dúk með sér).  Víkingaklúbburinn og Knattspyrnufélagið Víkingur hafa verið með barnaæfingar kl. 17.00 á miðvikudögum í vetur, en síðusta æfingin fyrir sumarfrí verður miðvikudaginn 29. mai.

Skákgleði á Laufásborg

Mjög öflug skákkennsla hefur verið á Laufásborg í vetur undir styrkri leiðsögn þeira hjóna Lenku og Omars. Þess má til gamans geta að Lenka er Íslandsmeistari í skák. Skákkennslunni lauk með skákmóti elstu barnanna og tefldu þær svokallaða peðaskák en þar vinnur sá sem fyrr kemur peði upp í borð eða drepur alla menn andstæðingsins. Alls tóku 73 krakkar þátt í kennslunni, 37 stúlkur og 36 drengir.

og hér eru vinkonur og vinir að heilsa í upphafi "velkomin í skákina" og í lok hverrar skákar er þakkað fyrir "takk fyrir skákina" þau eru svo miklir snillingar:)

Ein leið til að vinna í skák er að halda einbeitt er þetta ekki líka í lífinu?

    

Hér er allur hópurinn saman komin ásamt Lenku og Omari, glöð og stolt öll sem eitt með medalíuna sína.

Gunnar Björnsson, forseti SÍ, setti mótið og lék fyrsta leikinn fyrir hana Ninu en hún lék g4 í fyrsta leik.

Heimasíða Laufásborgar

Vesturbæjarbiskupinn fer fram á föstudag

Vesturbæjarbiskupinn verður haldinn föstudaginn 24. maí í Hagaskóla. Mótið byrjar klukkan 14:00 og tefldar verða sex umferðir með sjö mínútum á mann í umhugsun. Teflt verður í þremur aldursflokkum: 1.-3. bekk, 4.-7. bekk og 8.-10. bekk. Sá skóli úr vesturbæ sem sendir flesta keppendur fær að launum farandbikar til varðveislu í eitt ár.

Mótið er opið öllum grunnskólanemendum en nemendur vesturbæjarskólanna er sérstaklega boðnir velkomnir.

Skráning fer fram hér. Upplýsingar um þegar skráða keppendur má finna hér. Skráningarfrestur er á miðnætti á miðvikudeginum 22. maí.

Mótshaldarar eru Vesturgarður og Skákakademían.

Össur efstur í Ásgarði í dag

Össur Kristinsson endaði í efsta sæti  í Ásgarði í dag eftir baráttu um það sæti við Ara Stefánsson. Fyrir síðustu umferð voru þeir kappar jafnir með 7½ vinning en í síðustu umferð vann Össur Jón Víglundsson en Ari tapaði fyrir Guðfinni R. Kjartanssyni, þannig að Össur varð einn efstur með 8½ vinning.

Gísli Sigurhansson vann líka í seinustu umferð og endaði með 7½ vinning eins og Ari, en hærri á stigum. Fast á hæla þeirra komu svo Guðfinnur og Stefán Þormar með 7 vinninga hvor.

Næsta þriðjudag er svo síðasti skákdagur þessarar vertíðar, þá verður Vorhraðskákmót með sjö mínútna umhugsunartíma og tefldar 9 umferðir. Allir skákmenn sem verða 60 ára á árinu og eldri, velkomnir til leiks. Þá verða líka veitt verðlaun fyrir bestan samanlagðan árangur á skákdögum vetrarins.

Nánari úrslit dagsins:

1       Össur Kristinsson                                     8.5 v

2-3    Gísli Sigurhansson                                    7.5

         Ari Stefánsson                                 7.5

4-5    Guðfinnur R Kjartansson                          7

         Stefán Þormar                                  7

6       Sigurður Kristinsson                       6

7-9    Þorsteinn K Guðlaugsson                         5.5

Óli Árni Vilhjálmson                       5.5

Kristján Guðmundsson                   5.5

10-15          Páll G Jónsson                                 5

         Jón Víglundsson                              5

         Ágúst Ingimundarson                      5

         Ásgeir Sigurðsson                                     5

         Baldur Garðarsson                                    5

         Egill Sigurðsson                               5

Næstu níu skákmenn voru svo með aðeins færri vinninga.

Skákakademían fimm ára

 

 

Friðrik og Nansý - Fjöltefli Friðriks í Hörpu.

Það var bjartur og fagur dagur fyrir fimm árum þegar fríður hópur fyrirmanna og annarra skákmanna mætti í Höfða, 21. maí 2008. Tilefnið var stofnun Skákakademíu Reykjavíkur. Unnið hafði verið að stofnuninni um nokkra mánaða skeið og var sú vinna leidd af þeim hógværa kraftaverkamanni Hrafni Jökulssyni. Nú á fimm ára afmælisdegi Akademíunnar er gaman að líta um öxl. Margt hefur verið brallað en án efa stendur skákkennslan í grunnskólum Reykjavíkur upp úr. Skákkennslan hefur á síðustu árum fest sig í sessi sem hluti af námi nemenda. Síðustu vikur hef ég hitt skólastjórnendur í Reykjavík til að skipuleggja skákkennslu næsta skólaárs. Í stuttu máli sagt hafa viðtökurnar aldrei verið betri og útlit fyrir metfjölda skóla sem líta á skák sem góða viðbót við sífellt fjölbreyttara nám nemenda sinna.

 

Björn Þorfinnsson og Björgvin Kristbergsson á 17. júní á útitaflinu.

 

Margt fleira má tína til; Reykjavíkurskákmótið er haldið á hverju ári með fjölmörgum skemmtilegum viðburðum, skákhátíðir á 17. júní og Menningarnótt hafa fest sig í sessi, skákin blómstrar í Hringnum og VIN, sumarnámskeiðin, skákkennslan í leikskólunum, skák út um allt og sundlaugarskák, skákkvöldin, skákklúbburinn Ósk, heimsóknir út á land, Skákdagurinn síðustu ár, fjársafnanir fyrir góð málefni, fyrirtækjaheimsóknir og stór og lítil skákmót af öllu tagi.

 

 

Skákstelpur á skákhátíð á Menningarnótt.

Allt þetta gæti ekki hafa gerst nema fyrir aðkomu fjölmargra aðila sem ég þakka hér kærlega fyrir samstarfið síðustu ár. Gaman og gott hefur verið að starfa með taflfélögum borgarinnar og því kraftmikla fólki sem þau skipa. Ekki síst við framkvæmdina á Afmælismóti aldarinnar síðasta haust þegar um 300 keppendur tefldu í Laugardagshöll í tilefni af 40ára afmæli Einvígi aldarinnar.

Skáksambandið og Skákskólinn hafa sameinast í viðburðum með Skákakademíunni, og stendur Fjöltefli Friðriks Ólafssonar við meistara framtíðarinnar upp úr.

Góður stuðningur hefur fengist hjá fyrirtækjum og opinberum aðilum. Sérstaklega má þakka Reykjavíkurborg fyrir góðan stuðning frá upphafi.

 

 

 Íslandsmót framhaldsskólasveita 2012.

Erfitt væri að nefna alla þá einstaklinga sem hafa komið að starfinu, en langar mig sérstaklega að þakka eftirfarandi fólki: skákkennurunum Siguringa Sigurjónssyni og Ingu Birgisdóttur, Ásdísi Bragadóttur framkvæmdastjóra SÍ, skólastjórunum Helga Árnasyni og Helga Ólafssyni, forvera mínum í starfi honum Birni Þorfinnssyni, tæknigúrúinu og skákkennaranum Ingvari Þór Jóhannessyni,  Gunnari Björnssyni forseta Skáksambandsins, hjarta og sál Skákakademíunnar honum Róberti Lagerman, vinnuþjarkinum Birni Ívari Karlssyni, þungarokkaranum og þingmanninum Óttarri Proppé og hugmyndasmiðnum og guðföðurnum Hrafni Jökulssyni. Andrea Margrét Gunnarsdóttir hefur svo veitt okkur öllum andagift og kraft með sinni óbilandi trú á málstaðinn.

Afreksmenn hafa alltaf verið tilbúnir að taka þátt í starfinu, má nefna þá helsta Jóhann Hjartarson, Hjörvar Stein Grétarsson, Jón Viktor Gunnarsson, Stefán Kristjánsson og Braga Þorfinnsson. Ekki má gleyma starfsfólki grunnskólanna, velvilji og viðmót þeirra hefur verið lykilatriði. Snoturt afmæliskaffi verður haldið síðar í sumar um leið og starfsemi  næsta vetrar verður kynnt ásamt nýjum kennurum.

Skákakademían lengi lifi.

Stefán Steingrímur Bergsson,

 framkvæmdastjóri Skákakademíunnar.               

Nýtt fréttabréf SÍ

Nýtt fréttabréf Skáksambands Íslands kom út í kvöld en bréfið kemur út tvisvar á mánuði yfir vetrarmánuðina en einu sinni á mánuði yfir sumarið. Bréfið er sent í tölvupósti til viðtakenda. Hægt er að skrá sig fyrir fréttabréfinu hér á Skák.is (ofarlega til vinstri).

Meðal efnis er:

• Opna Íslandsmótið í skák hefst 31. maí
• Gunnar endurkjörinn forseti SÍ
• Birgir kjörinn heiðursfélagi SÍ
• Skýrsla um landsliðsmál
• Úrslitaeinvígi Íslandsmótsins í atskák á RÚV
• Meistaramót Skákskólans fer fram 24.-26. maí
• TR fékk 2. deildar bikarinn
• Guðmundur og Dagur stóðu sig vel á EM
• Karjakin sigurvegari í Noregi
• Þorvarður öðlingameistari
• Nýjustu skráningar á Opna Íslandsmótið í skák
• Niðurtalning N1 Reykjavíkurmótsins 2014
• Mót á döfinni

Fréttabréfið má nálgast hér.

Hægt er að nálgast eldri fréttabréf hér.

Skákþáttur Morgunblaðsins: Sóknarhugur

Fulltrúar Íslands á einu sterkasta opna móti ársins, Evrópumóti einstaklinga, sem fer fram í Legnica í Póllandi, Guðmundur Kjartansson og Dagur Arngrímsson hófu mótið með látum og unnu tvo 2600+ stiga stórmeistara. Skákáhugamenn hafa fylgst spenntir með frammistöðu gömlu félaganna sem undirbjuggu sig saman í Búdapest þar sem Dagur hefur búið síðan í haust. Eftir þrjár umferðir var Guðmundur með 2 vinninga og Dagur 1 ½ vinning. Þeir tefldu báðir á „Fyrsta laugardagsmótinu" í apríl og þar vann Guðmundur flokk alþjóðlegu meistaranna.

Glæsilegir sigrar þeirra í fyrstu umferð á EM voru náskyldir að því leyti til að mikill sóknarhugur fylgdi framrás h-peðsins í báðum skákunum. Guðmundur lagði að velli þrautþjálfaðan rússneskan stórmeistara en undanfarið hefur hann verið á mikilli siglingu upp elo-listann. Greinarhöfundur renndi yfir skákina með „Houdini" sem taldi að eftir að byrjuninni sleppti hafi Guðmundur nálega alltaf hitt á besta leikinn:

EM 2013: 1. umferð:

Guðmundur Kjartansson - Sergei Fedortsjúk

Enskur leikur

1. g3 c5 2. c4 Rc6 3. Bg2 g6 4. Rf3 Bg7 5. Rc3 Rh6 6. d4

Gamall leikur sem Svíinn Ulf Andersson kom í tísku.

6.... cxd4 7. Rxd4 Rxd4 8. Bxh6 Bxh6 9. Dxd4 O-O 10. h4 Bg7 11. Dd2 d6 12. h5 Be6 13. hxg6 hxg6 14. b3 Hb8?

Of hægfara, svartur átti 14.... d5! 15. cxd5 Hc8 með góðri stöðu.

15. Hc1 a6 16. Re4 Bd7 17. Rg5 Bc6 18. Kf1 e6 19. Df4 De7 20. Hd1 Hfd8 21. Bxc6 bxc6 22. Hd3!

Fyrst núna þarf svartur að hafa áhyggjur, hrókurinn stefnir á f3-reitinn.

22.... d5 23. Hf3 f5 24. Dh4 Kf8 25. g4 dxc4 26. gxf5 gxf5 27. e4!

Peð eru líka sóknarmenn! Nú fara að myndast glufur í varnargirðingu svarts.

27.... Hd1+ 28. Kg2 Hxh1 29. Kxh1 cxb3 30. axb3 Hb5 31. Dh5

Dugar en sterkara var sennilega 31. Hd3! sem hótar 32. Hd8+!

31.... De8 32. Dh7 De7?

Eina vonin var að leika 32.... He5.

33. Dg6! Kg8 34. Hh3 fxe4

35. Hh8+!

- Laglegur lokahnykkur, svartur verður mát, 35.... Kxh8 36. Dh7 mát.

Og ekki var sigur Dags í þessari umferð síðri:

Dagur Arngrímsson - Zdenko Kozul

Kóngsindversk vörn

1. d4 Rf6 2. c4 g6 3. Rc3 Bg7 4. e4 d6 5. f3 a6 6. Be3 O-O 7. Rge2 Rc6 8. Dd2 Ra5

Óvenjulegur leikur í þekktu afbrigði, venjulega er leikið 8..... Hb8 eða 8..... He8.

9. Rf4 Rd7 10. Hd1 e5 11. dxe5 dxe5 12. Rfd5 Rc6 13. h4 Rd4 14. h5 c6 15. hxg6!? cxd5?!

Það kemur dálítið á óvart að Kozul skuli þiggja manninn. Eftir 15.... fxg6 má svartur vel við una.

16. gxh7+ Kh8 17. Rxd5 Rc5 18. Bh6 Bxh6 19. Dxh6 a5

Þetta lítur allt saman ágætlega út, svartur hyggst leika 20.... Ha6. En Dagur kann að svara fyrir sig.

20. Rc7! Hb8 21. Hh5! f6

Sjá stöðumynd.

22. Hxd4!

Enn einn bráðsnjall leikur, hvítur vinnur lið til baka og stendur til vinnings.

22.... exd4 23. Hxc5 Hf7 24. Dg6 Df8 25. Dg8+ Dxg8 26. hxg8=D+ Kxg8 27. Rb5 b6 28. Hd5 Bd7 29. Rxd4 Kf8 30. Kf2 Ke7 31. e5! Hc8?

Kozul hefur verið grátt leikinn og uggir ekki að sér. Hann gat enn barist með 31.... fxe5 þó hvítur eigi að vinna með þrjú peð fyrir skiptamun.

32. Hxd7+! Kxd7 33. e6+ Ke7 34. exf7 Kxf7 35. Bd3 Ke7 36. a3 Kd6 37. b4 axb4 38. axb4 Ha8 39. Ke3 Ha2 40. g4 Hg2 41. Rb5 Kd7 42. Rc3

- og svartur gafst upp.

Helgi Ólafsson [e-mail]

 

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 12. maí 2013.

Skákþættir Morgunblaðsins

[Event "European Individual Championships"] [Site "Legnica POL"] [Date "2013.05.05"] [EventDate "2013.05.05"] [Round "1.27"] [Result "1-0"] [White "Gudmundur Kjartansson"] [Black "Sergey Fedorchuk"] [ECO "A37"] [WhiteElo "2446"] [BlackElo "2660"] [PlyCount "69"] 1. g3 c5 2. c4 Nc6 3. Bg2 g6 4. Nf3 Bg7 5. Nc3 Nh6 6. d4 cxd4 7. Nxd4 Nxd4 8. Bxh6 Bxh6 9. Qxd4 O-O 10. h4 Bg7 11. Qd2 d6 12. h5 Be6 13. hxg6 hxg6 14. b3 Rb8 15. Rc1 a6 16. Ne4 Bd7 17. Ng5 Bc6 18. Kf1 e6 19. Qf4 Qe7 20. Rd1 Rfd8 21. Bxc6 bxc6 22. Rd3 d5 23. Rf3 f5 24. Qh4 Kf8 25. g4 dxc4 26. gxf5 gxf5 27. e4 Rd1+ 28. Kg2 Rxh1 29. Kxh1 cxb3 30. axb3 Rb5 31. Qh5 Qe8 32. Qh7 Qe7 33. Qg6 Kg8 34. Rh3 fxe4 35. Rh8+ 1-0

[Event "14th Euro Indiv 2013"] [Site "Legnica POL"] [Date "2013.05.05"] [Round "1.57"] [White "Arngrimsson, Dagur"] [Black "Kozul, Zdenko"] [Result "1-0"] [WhiteElo "2390"] [BlackElo "2624"] [WhiteTitle "IM"] [BlackTitle "GM"] [ECO "E83"] [Opening "King's Indian"] [Variation "Saemisch, Panno formation"] [WhiteFideId "2301288"] [BlackFideId "14502879"] [EventDate "2013.05.05"] 1. d4 Nf6 2. c4 g6 3. Nc3 Bg7 4. e4 d6 5. f3 a6 6. Be3 O-O 7. Nge2 Nc6 8. Qd2 Na5 9. Nf4 Nd7 10. Rd1 e5 11. dxe5 dxe5 12. Nfd5 Nc6 13. h4 Nd4 14. h5 c6 15. hxg6 cxd5 16. gxh7+ Kh8 17. Nxd5 Nc5 18. Bh6 Bxh6 19. Qxh6 a5 20. Nc7 Rb8 21. Rh5 f6 22. Rxd4 exd4 23. Rxc5 Rf7 24. Qg6 Qf8 25. Qg8+ Qxg8 26. hxg8=Q+ Kxg8 27. Nb5 b6 28. Rd5 Bd7 29. Nxd4 Kf8 30. Kf2 Ke7 31. e5 Rc8 32. Rxd7+ Kxd7 33. e6+ Ke7 34. exf7 Kxf7 35. Bd3 Ke7 36. a3 Kd6 37. b4 axb4 38. axb4 Ra8 39. Ke3 Ra2 40. g4 Rg2 41. Nb5+ Kd7 42. Nc3 1-0

Vesturbæjarbiskupinn fer fram 24. maí í Hagaskóla

Vesturbæjarbiskupinn verður haldinn föstudaginn 24. maí í Hagaskóla. Mótið byrjar klukkan 14:00 og tefldar verða sex umferðir með sjö mínútum á mann í umhugsun. Teflt verður í þremur aldursflokkum: 1.-3. bekk, 4.-7. bekk og 8.-10. bekk. Sá skóli úr vesturbæ sem sendir flesta keppendur fær að launum farandbikar til varðveislu í eitt ár.

Mótið er opið öllum grunnskólanemendum en nemendur vesturbæjarskólanna er sérstaklega boðnir velkomnir.

Skráning fer fram hér. Upplýsingar um þegar skráða keppendur má finna hér. Skráningarfrestur er á miðnætti á miðvikudeginum 22. maí.

Mótshaldarar eru Vesturgarður og Skákakademían.