Ipatov með fyrirlestur í Hörpu í hádeginu

Alexander Ipatov frá Tyrklandi mun flytja hádegisfyrirlestur í Hörpu á fimmtudaginn kemur. Alexander sem nú teflir á Reykjavíkurskákmótinu er ríkjandi heimsmeistari 20ára og yngri og hefur nálægt 2600 ELO-stig.

Alexander kemur afar vel fyrir og er prúður piltur, talar góða ensku og hefur mikinn áhuga á fótbolta. Í fyrirlestri sínum mun hann fara yfir mörg atriði sem hafa komið honum þangað sem hann er í dag.

Hversu mörg mót fór hann á þegar hann var yngri? Hve mikið æfði hann sig sjálfur þegar hann var 12ára gamall? Hefur skákin hjálpaði honum í námi?

Fyrirlesturinn er afar fróðlegur fyrir alla þá sem koma að skákiðkun barna; foreldra, félagsfólk, kennara, þjálfara og fleiri.

Fyrirlesturinn verður í skákskýringarsalnum í Hörpu og hefst um 12:00 fimmtudaginn 21. febrúar.

N1 Reykjavíkurskákmótið: Navara náði jafntefli gegn Friðrik - Hjörvar meðal efstu manna með fullt hús

Friðrik Ólafsson, fyrsti stórmeistari Íslendinga, var maður 3. umferðar á N1 Reykjavíkurskákmótinu í Hörpu. Friðrik, sem er 78 ára, mætti David Navara, 27 ára ofurstórmeistara frá Tékklandi og var með mun betri stöðu eftir um 30 leiki. Í miklu tímahraki tók Friðrik þann kost að bjóða jafntefli, sem var snarlega þegið. Friðrik hefur farið afar vel af stað á mótinu, en hann var meðal keppenda þegar fyrsta Reykjavíkurskákmótið var haldið árið 1964.

Þröstur Þórhallsson hélt kínverska snillingnum Bu Xingzhai í mikilli klemmu, og aðeins mjög nákvæm vörn Kínverjans tryggði honum jafntefli.
 
Fimmtán skákmenn eru efstir og jafnir með 3 vinninga eftir þrjár umferðir. Í þeim hópi er Hjörvar Steinn Grétarsson, stigahæsti Íslendingurinn á mótinu, sem lagði bandaríska meistarann Bob Beeke. Tuttugu og tveir skákmenn hafa 2,5 vinning og í þeim hópi eru stórmeistararnir Þröstur Þórhallsson, Hannes Hlífar Stefánsson og Stefán Kristjánsson. Hannes, sem hefur sigrað fimm sinnum á Reykjavíkurskákmótinu, fór á kostum í glæsilegri fórnarskák.
 
Fleiri athyglisverð úrslit litu dagsins ljós. Ivan Sokolov, tvöfaldur sigurvegari á Reykjavíkurmótinu, steinlá fyrir bandaríska FIDE-meistaranum Jayakumar, og var hollenski meistarinn hreint ekki sáttur við taflmennsku sína. Heiðursfélagi Skáksambandsins, Gylfi Þórhallsson, gerði jafntefli við þýskan alþjóðameistara og Dagur Ragnarsson, 15 ára, gerði þriðja jafnteflið í röð við mun stigahærri meistara. Þá vann hinn ungi TR-ingur Jakob Alexender Petersen hollenskan skákmeistara, sem var til muna stigahærri.
 
Þá vakti ánægjulega athygli að Böðvar Böðvarsson, næstelsti keppandi mótsins sem jafnframt teflir nú á fyrsta alþjóðlega skámótinu sínu, á 77. aldursári, gerði jafntefli við argentínskan meistara sem er 400 stigum hærri en Böðvar.
 
Keppendur á N1 Reykjavíkurskákmótinu eru alls 227 frá 37 löndum. Mótið hefur aldrei verið fjölmennara og mjög er með því fylgst víða um heim. Búið er að tefla þrjár umferðir af tíu, en mótinu lýkur miðvikudaginn 27. febrúar. Aldrei hafa fleiri stórmeistarar teflt á skákmóti á Íslandi og er Reykjavíkurmótið nú hið fjölmennasta í hálfrar aldar sögu.
 
Meðal þeirra 15 skákmanna sem hafa sigrað í fyrstu þremur umferðunum eru Anish Giri frá Hollandi, sem er stigahæsti skákmaður mótsins, og kínversku snillingarnir Wei Yi og Yu Yangyi, sem fóru á kostum í landskeppninni gegn Íslandi um síðustu helgi. Í þessum hópi eru líka Wesley So, 19 ára frá Filippseyjum og einn besti skákmaður Asíu, og Frakkinn Maxime Vachier-Lagrave.
 
Fjórða umferð hefst í Hörpu klukkan 16.30. Meðal áhugaverðra viðureigna má nefna skák Hjörvars Steins Grétarssonar og Wesley So; Hannes Hlífar Stefánsson teflir við Bu Xiangzhi, en Friðrik Ólafsson mætir þýska skákmanninum Frank Drill. Þá verður án efa gaman að fylgjast með viðureign Íslandsmeistarans Þrastar Þórhallssonar og og Gawain Jones, en alls verða tefldar um 113 skákir á mótinu  á morgun.

• Heimasíða mótsins
• Chess-Results
• Beinar útsendingar
• Myndaalbúm frá þriðju umferð

Dúndurstuð á N1 Reykjavíkurskákmótinu!

Skákskýringar Ingvars Þórs og Helga Ólafssonar klukkan 18. 

Fjölmargar skemmtilegar og spennandi skákir standa nú yfir í 3. umferð N1 Reykjavíkurmótsins, sem hófst klukkan 17.30. Segja má að ósvikin dúndurstemmning ríki í Hörpu, því æfingar standa yfir á efri hæðinni, þar sem íslensku tónlistarverðlaunin verða veitt í kvöld.

Margir fylgjast með skák Friðriks Ólafssonar og David Navara, auk þess sem gaman er að fylgjast með glímu Íslandsmeistarans Þrastar Þórhallssonar við kíverska ofurstórmeistarann geðþekka, Bu Xiangzhi.

Boðið verður upp á skákskýringar klukkan 18 í umsjón skákmeistaranna Ingvars Þór Jóhannessonar og Helga Ólafssonar. Teflt verður fram eftir kvöldi og eru áhorfendur hjartanlega velkomnir.

Úrslit 3. umferðar

Myndaalbúm frá 2. umferð

Heimasíða N1 Reykjavíkurmótsins

Myndaalbúm frá 3. umferð

Tímaritið Skák komið út!

 

Tímaritið Skák er komið út. Áskrifendur, sem hafa þegar greitt fyrir áskrift, geta nálgast það í Hörpu í dag og á morgun þar sem það verður einnig selt í lausasölu.

Blaðið verður sent í pósti þeim áskrifendum sem svo kjósa og hafa og þeim sem ekki sækja það í Hörpu.

Hér er um ársrit að ræða - yfirlit yfir skákárið 2012-2013. Skyldulesning allra er láta sig íslenskt skáklíf einhverju varða. 

Í blaðinu kennir ýmissa grasa og víða verður drepið niður fæti. Þar má m.a. finna: 

• Viðtal við Friðrik Ólafsson
• Arabískt mát
• Jóhann Hjartarson fimmtugur
• Skákþing Íslands
• Ólympíumótið í Istanbúl
• Skákmaður ársins
• Og margt fleira.

 

Goðum líkir Mátar bjóða lesendum í tímaferðalag með greinarhöfundum um íslenskar skáklendur síðasta árs. Þar verður áð við helstu vörðurnar og hlaupið upp á fell og skimað yfir skáklífið.

 

Þrír Íslendingar með fullt hús á N1 Reykjavíkurmótinu: Friðrik mætir Navara í 3. umferð!

Þrír Íslendingar eru með fullt hús eftir tvær umferðir á N1 Reykjavíkurskákmótinu, en annarri umferð var að ljúka. Þetta eru Íslandsmeistarinn Þröstur Þórhallsson og alþjóðlegu meistararnir Hjörvar Steinn Grétarsson og Guðmundur Kjartansson. Í þriðju umferð, sem hefst í Hörpu klukkan 16.30 í dag, teflir Þröstur við kínverska ofurstórmeistarann Bu Xiangzhi, Guðmundur mætir hollenska stórmeistaranum Erwin L´ami og Hjörvar Steinn glímir við alþjóðameistarann Bob Beeke.

Augu flestra munu örugglega beinast að skák Friðriks Ólafssonar sem hefur hvítt gegn hinum unga og gríðarlega stigaháa David Navara frá Tékklandi.

2. umferð var bráðskemmtileg og spennandi. Dagur Arngrímssson tefldi við Anish Giri, stigahæsta keppanda mótsins, og tapaði eftir harða baráttu. Björn Þorfinnsson tefldi afar skemmtilega skák við Frakkann Vachier-Lagrave og varð líka að játa sig sigraðan.

Nokkuð var um óvænt úrslit og íslensku krakkarnir á mótinu stóðu sig með sóma. Nansý Davíðsdóttir, 11 ára, sigraði þýskan skákmann, þrátt fyrir 400 skákstiga mun, og Gauti Páll Jónsson sigraði Bjarna Sæmundsson, þrátt fyrir mikinn stigamun. Dawid Kolka og Veronika Steinunn Magnúsdóttir gerðu jafntefli við mun stigahærri andstæðinga.

Íslensku stórmeisturunum gekk misjafnlega. Friðrik Ólafsson og Hannes Hlífar Stefánsson nýttu sér þann rétt að sitja yfir í eina umferð og spöruðu þannig kraftana fyrir síðdegisumferðina. Þröstur sigraði, sem fyrr sagði, en Henrik Danielsen tapaði óvænt fyrir Bob Beeke. Þá gerði Stefán Kristjánsson jafntefli við hinn unga og efnilega Wang Yiye frá Kína.

Aðstæður á N1 Reykjavíkurskákmótinu er frábærar og eru áhorfendur hvattir til að fjölmenna á 3. umferðina sem stendur fram á kvöld. Búast má við heilmiklu fjöri á öllum hæðum í Hörpu, enda verða íslensku tónlistarverðlaunin afhent í kvöld með tilheyrandi lúðraþyt og söng.

Úrslit 3. umferðar

Myndaalbúm frá 2. umferð

Heimasíða N1 Reykjavíkurmótsins

Æsispennandi skákir Íslendinga við erlendu ofurmeistarana

Spennan er rafmögnuð í Hörpu, nú þegar margar skákir 2. umferðar eru að ná hámarki. Dagur Arngrímsson og Anish Giri eru í hörkubaráttu á efsta borði, og Björn Þorfinnsson verst fimlega í erfiðri stöðu gegn franska ofurstórmeistarann Lagrave.

Tékkneski meistarinn David Navara (2710), þriðji stigahæsti maður mótsins, varð að sætta sig við jafntefli gegn hina ungu Gulnar Mammadova (2369) frá Azerbæjan, og kínverski snillingurinn Ding Liren komst á sigurbraut, með því að leggja Tinnu Kristínu Finnbogadóttur.

Íslenska heimavarnarliðið á enn eftir að leggja stórmeistara í þessari umferð, en hin 11 ára Nansý Davíðsdóttir (1479 stig) gladdi áhorfendur með sigri gegn Þjóðverjanum Joerg Mehringer, sem er 429 skákstigum hærri!

Myndir frá 2. umferð.

Úrslit á Chess Results.

 

Vetrarleyfisskákmót Fjölnis og Gufunesbæjar í Hlöðunni n.k. föstudag kl. 12:30

Pítsur, bíómiðar, skíðakort í Bláfjöll, sundlaugakort í Reykjavíkurlaugum og  nammipokar frá Nettó eru meðal þeirra 15 - 20  eftirsóttu vinninga sem í boði verða á þriðja Vetrarleyfisskákmóti Fjölnis og Gufunesbæjar sem fram fer í Hlöðunni við Gufunesbæ við hliðina á Ævintýragarðinum í Grafarvogi. Mótið hefst kl. 12:30 föstudaginn 22. febrúar. Allir grunnskólakrakkar í 1. - 7. bekk á landinu hafa þátttökurétt og eru þeir beðnir um að mæta tímanlega til skráningar.

Í Hlöðunni er góð aðstaða fyrir skákmót og tilvalið fyrir alla á barnaskólaaldri, stráka og stelpur, að skemmta sér í vetrarleyfinu og  vera með á Hlöðumótinu og freista þess að fá vinning. Tefldar verða 6 umferðir með 6 mínútna umhugsunartíma. Að vanda er þátttaka á skákmótum Fjölnis ókeypis. Hægt verður að kaupa veitingar á staðnum.

 

Harpar iðar af skáklífi: Bein útsending frá 2. umferð N1 Reykjavíkurmósins

2. umferð N1 Reykjavíkurskákmótsins hófst klukkan 9.30 í morgun og stendur nú sem hæst. Margar spennandi skákir eru í gangi. Á efsta borði glíma Anish Giri, stigahæsti maður mótsins, og Dagur Arngrímsson. Björn Þorfinnsson teflir við franska ofurstórmeistarann Vachier-Lagrave.

Hægt er að fylgjast með beinum útsendingum frá 29 efstu borðunum. Á heimasíðu N1 Reykjavíkurmótsins er sömuleiðis útsending úr Hörpu, fréttir frá mótinu og upplýsingar um þetta stærsta skákmót ársins á Íslandi.

3. umferð hefst klukkan 16.30 í dag. Áhorfendur eru velkomnir í Hörpu og aðgangur er ókeypis. Aðstæður eru frábærar og mótið hefur farið mjög vel af stað.

Beinar útsendingar:

1. til 4. borð
5. til 13. borð
14. til 29. borð

• Heimasíða mótsins
• Chess-Results
• Beinar útsendingar
• Skemmtilegt myndaalbúm frá setningarathöfn og 1. umferð.

Heimsmeistari ungmenna - Alexander Ipatov með fyrirlestur í Hörpu

Alexander Ipatov frá Tyrklandi mun flytja hádegisfyrirlestur í Hörpu á fimmtudaginn kemur. Alexander sem nú teflir á Reykjavíkurskákmótinu er ríkjandi heimsmeistari 20ára og yngri og hefur nálægt 2600 ELO-stig.

Alexander kemur afar vel fyrir og er prúður piltur, talar góða ensku og hefur mikinn áhuga á fótbolta. Í fyrirlestri sínum mun hann fara yfir mörg atriði sem hafa komið honum þangað sem hann er í dag.

Hversu mörg mót fór hann á þegar hann var yngri? Hve mikið æfði hann sig sjálfur þegar hann var 12ára gamall? Hefur skákin hjálpaði honum í námi?

Fyrirlesturinn er afar fróðlegur fyrir alla þá sem koma að skákiðkun barna; foreldra, félagsfólk, kennara, þjálfara og fleiri.

Fyrirlesturinn verður í skákskýringarsalnum í Hörpu og hefst um 12:00 fimmtudaginn 21. febrúar.

Vignir Vatnar efstur á Hellisæfingu - Baldur Teodor og Hilmir Freyr unnu tvö síðustu sætin á Reykjavík Barnablitz

Hellisæfingin í gær mánudaginn 18. febrúar var engin venjuleg æfing. Auk þess að vera hefðbundin barna- og unglingaæfing var um að ræða forkeppni fyrir Reykjavik Barnabiltz sem gaf tvö síðustu sætin í þá keppni. Það sást líka á keppendalistanum en sennilega var um að ræða eina sterkustu æfingu sem haldin hefur verið lengi í Hellisheimilinu.

Tefldar voru sex umferðir með sjö mínútna umhugsunartíma. Að loknum þessum sex umferðum stóð Vignir Vatnar Stefánsson uppi sem sigurvegari með  fullu húsi eða 6 vinninga í jafn mörgum skákum. Annar varð Baldur Teodor Petersson með 5v. Baldur Teodor er systursonur hins ötula skákstjóra og formanns TG Páls Sigurðssonar og býr í Svíþjóð en er kominn gagngert til landsins til að tefla á Reykjavíkurskákmótinu ásamt vini sínum Milton Pantzar sem einnig tók þátt í æfingunni. Næstir komu svo Dawid Kolka og Hilmir Freyr Heimisson með 4,5v en Dawid fékk þriðja sætið eftir stigaútreikning.

Vignir Vatnar og Dawid höfðu áður tryggt sér sæti á Reykjavík Barnablitz þannig að tvö síðustu sætin komu í hlut Baldurs Teodors Petersson og Hilmis Freys Heimissonar. Það er því ljóst hverjir munu taka þátt í úrslitum á Reykjavik Barnabliz en það eru: Dawid Kolka, Felix Steinþórsson og Hilmir Freyr Heimisson úr Taflfélaginu Helli, Baldur Teodor Petersson úr TG, Björn Hólm Birkisson og Vignir Vatnar Stefánsson úr TR og Nansý Davíðsdóttir og Þorsteinn Magnússon úr Fjölni. Úrslitin í Reykjavík Barnablitz verða í Hörpunni laugardaginn 23. febrúar.

Næsta æfing verður svo mánudaginn 25. febrúar nk. og hefst kl. 17.15. Það breytir engu þótt margir sem hafa tekið þátt í og séð um æfingarnar séu fjarverandi meðan á Reykjavíkurskákmótinu stendur. Það kemur bara maður í manns stað. Æfingarnar eru haldnar í Álfabakka 14a í Mjóddinni, gengið inn á milli Subway og Föken Júlíu og salurinn er á þriðju hæð.