N1 Reykjavíkurskákmótið: Navara náði jafntefli gegn Friðrik - Hjörvar meðal efstu manna með fullt hús

Friðrik Ólafsson, fyrsti stórmeistari Íslendinga, var maður 3. umferðar á N1 Reykjavíkurskákmótinu í Hörpu. Friðrik, sem er 78 ára, mætti David Navara, 27 ára ofurstórmeistara frá Tékklandi og var með mun betri stöðu eftir um 30 leiki. Í miklu tímahraki tók Friðrik þann kost að bjóða jafntefli, sem var snarlega þegið. Friðrik hefur farið afar vel af stað á mótinu, en hann var meðal keppenda þegar fyrsta Reykjavíkurskákmótið var haldið árið 1964.

Þröstur Þórhallsson hélt kínverska snillingnum Bu Xingzhai í mikilli klemmu, og aðeins mjög nákvæm vörn Kínverjans tryggði honum jafntefli.
 
Fimmtán skákmenn eru efstir og jafnir með 3 vinninga eftir þrjár umferðir. Í þeim hópi er Hjörvar Steinn Grétarsson, stigahæsti Íslendingurinn á mótinu, sem lagði bandaríska meistarann Bob Beeke. Tuttugu og tveir skákmenn hafa 2,5 vinning og í þeim hópi eru stórmeistararnir Þröstur Þórhallsson, Hannes Hlífar Stefánsson og Stefán Kristjánsson. Hannes, sem hefur sigrað fimm sinnum á Reykjavíkurskákmótinu, fór á kostum í glæsilegri fórnarskák.
 
Fleiri athyglisverð úrslit litu dagsins ljós. Ivan Sokolov, tvöfaldur sigurvegari á Reykjavíkurmótinu, steinlá fyrir bandaríska FIDE-meistaranum Jayakumar, og var hollenski meistarinn hreint ekki sáttur við taflmennsku sína. Heiðursfélagi Skáksambandsins, Gylfi Þórhallsson, gerði jafntefli við þýskan alþjóðameistara og Dagur Ragnarsson, 15 ára, gerði þriðja jafnteflið í röð við mun stigahærri meistara. Þá vann hinn ungi TR-ingur Jakob Alexender Petersen hollenskan skákmeistara, sem var til muna stigahærri.
 
Þá vakti ánægjulega athygli að Böðvar Böðvarsson, næstelsti keppandi mótsins sem jafnframt teflir nú á fyrsta alþjóðlega skámótinu sínu, á 77. aldursári, gerði jafntefli við argentínskan meistara sem er 400 stigum hærri en Böðvar.
 
Keppendur á N1 Reykjavíkurskákmótinu eru alls 227 frá 37 löndum. Mótið hefur aldrei verið fjölmennara og mjög er með því fylgst víða um heim. Búið er að tefla þrjár umferðir af tíu, en mótinu lýkur miðvikudaginn 27. febrúar. Aldrei hafa fleiri stórmeistarar teflt á skákmóti á Íslandi og er Reykjavíkurmótið nú hið fjölmennasta í hálfrar aldar sögu.
 
Meðal þeirra 15 skákmanna sem hafa sigrað í fyrstu þremur umferðunum eru Anish Giri frá Hollandi, sem er stigahæsti skákmaður mótsins, og kínversku snillingarnir Wei Yi og Yu Yangyi, sem fóru á kostum í landskeppninni gegn Íslandi um síðustu helgi. Í þessum hópi eru líka Wesley So, 19 ára frá Filippseyjum og einn besti skákmaður Asíu, og Frakkinn Maxime Vachier-Lagrave.
 
Fjórða umferð hefst í Hörpu klukkan 16.30. Meðal áhugaverðra viðureigna má nefna skák Hjörvars Steins Grétarssonar og Wesley So; Hannes Hlífar Stefánsson teflir við Bu Xiangzhi, en Friðrik Ólafsson mætir þýska skákmanninum Frank Drill. Þá verður án efa gaman að fylgjast með viðureign Íslandsmeistarans Þrastar Þórhallssonar og og Gawain Jones, en alls verða tefldar um 113 skákir á mótinu  á morgun.

• Heimasíða mótsins
• Chess-Results
• Beinar útsendingar
• Myndaalbúm frá þriðju umferð

Athugasemdir

[Smári R (IP-tala skráð) 21.2.2013 kl. 13:33]

Gegn Friðriki (þgf).