Víkingaklúbburinn efstir eftir stórsigur - stórmeistarar lágu í valnum

Íslandsmót skákfélaga hófst í kvöld í Rimaskóla. Víkingaklúbburinn, sem spáð hefur verið Íslandsmeistaratitlinum, hófu mótið með miklum látum þegar KR-ingar voru lagðir af velli 8-0. Stórmeistararnir Helgi Ólafsson og Margeir Pétursson lágu báðir í valnum í kvöld. 

Það var fljótt ljóst í hvað stefndi í viðureign Víkinga og KR og innbyrti ofursveitin afar góðan og örugan sigur.

Íslandsmeistarar Hugins unnu 6½-1½ sigur á Skákdeild Breiðabliks og Bolungarvíkur. Þar vakti sigur Guðmundar Gíslasonar á Helga Ólafssyni óneitanlega mesta athygli. 

Aðrar viðureignir voru mun jafnari. Taflfélag Reykajvíkur vann Skákfélag Akureyrar með minnsta mun, 4½-3½, þrátt fyrir að Akureyringurinn Björn Ívar Karlsson ynni stórmeistarann Margeir Pétursson í afar vel útfærðri skák. 

Í uppgjöri b-sveitanna tveggja unnu Akureyringar Huginsmenn mið minnsta mun þrátt fyrir að hafa verið stigalægri á öllum borðum. Afar góð byrjun norðanmanna sem hafa fleiri vinninga en a-sveitin eftir fyrstu umferð. 

 

Viðureign Taflfélags Garðabæjar og Skákdeild Fjölnis lauk með skiptum hlut, 4-4, en þar voru Garðabæingar einnig stigalægri á öllum borðum.

Öll úrslit fyrstu umferðar má finna á Chess-Results. 

Önnur umferð fer fram á morgun og hefst kl. 20. 

Á morgun hefjast einnig aðrar deildir. Það verða því nærri 350 skákmenn sem setjast að tafli í Rimaskóla á morgun.

• Heimasíða mótsins
• Chess-Results