Íslandsmótið í skák fer fram í Hafnarfirði 10.-20. maí

Íslandsmótið í skák 2017 fer fram í Hraunseli (húsnæði Félags eldri borgara), Flatahrauni 3, í Hafnarfirði dagana 10.-20. maí næstkomandi. 

Það er mikil ánægja innan Skáksambands Íslands að mótið skuli vera haldið í Hafnarfirði, eftir 14 ára hlé. Á næsta skólaári fyrirhugar Skáksamband Íslands að auka mjög kraftinn við skákkennslu í Hafnarfirði í samvinnu við Skákdeild Hauka og Hafnarfjarðarbæ. 

Keppendalistinn í ár er hvorttveggja í senn sterkur og afar athyglisverður. Íslandsmeistarinn frá því í fyrra, Jóhann Hjartarson, mun þó ekki verja titil sinn í ár. 

Meðal keppenda eru stórmeistararnir Hannes Hlífar Stefánsson, tólffaldur Íslandsmeistari, og Héðinn Steingrímsson, þrefaldur Íslandsmeistari. Tveir aðrir fyrrverandi Íslandsmeistarar taka þátt en það eru Guðmundur Kjartansson (2014) og Þröstur Þórhallsson (2012). Alþjóðlegi meistarinn Björn Þorfinnsson lætur sig ekki vanta nú frekar en endranær, enda margfaldur verðlaunahafi á mótinu, og til alls líklegur. 

Meðal annarra keppenda má nefna efnilegasta skákmann landsins, Vigni Vatnar Stefánsson, sem er aðeins 14 ára og einn sá yngsti sem teflt hefur í landsliðsflokki. Vignir komst í fréttirnar fyrir skemmstu þegar hann varð sá yngsti í skáksögunni hérlendis til þess að fara yfir 2400 skákstig.   

Heimamenn eiga sinn fulltrúa en meðal keppenda er Hafnfirðingurinn Sigurbjörn Björnsson.

Aðrir keppendur eru Vestfirðingurinn knái, Guðmundur Gíslason, sem oft hefur náð eftirtektarverðum árangri á Íslandsmótinu, ungmennin Dagur Ragnarsson og Bárður Örn Birkisson, eru báðir tefla nú á sínu fyrsta Íslandsmóti. Sá síðarnefndi er unglingameistari Íslands. 

Keppendalistinn (skákstig í sviga) 

1. Hannes Hlífar Stefánsson (2566) - stórmeistari
2. Héðinn Steingrímsson (2562) - stórmeistari
3. Guðmundur Kjartansson (2437) – alþjóðlegur meistari
4. Þröstur Þórhallsson (2420) - stórmeistari
5. Björn Þorfinnsson (2407) – alþjóðlegur meistari
6. Guðmundur Gíslason (2336) – FIDE-meistari
7. Vignir Vatnar Stefánsson (2334) – FIDE-meistari
8. Dagur Ragnarsson (2320) – FIDE-meistari
9. Sigurbjörn Björnsson (2268) – FIDE-meistari
10. Bárður Örn Birkisson (2162) 

Mótið verður sett miðvikudaginn 10. maí kl. 16:45. Forseti bæjarstjórnar Guðlaug Kristjánsdóttir mun setja mótið fyrir hönd Hafnarfjarðar og leika fyrsta leik þess. Dregið verður um töfluröð degi fyrir mótið eða þann 9. maí kl. 12:30.  

Góð aðstaða verður á skákstað fyrir áhorfendur. Hægt verður að fylgjast með skákunum þar á tjaldi. Auk þess verða beinar útsendingar á vefsíðu mótsins, http://icelandicchesschampionship.com/.