Skákþáttur Morgunblaðsins: Tveir nýliðar í kvennaliði Íslands á Ólympíumótinu í Baku

 

Tveir nýliðar eru í sveit Íslands sem tekur þátt í kvennaflokki Ólympíumótsins í Baku í Aserbaídsjan sem hefst 1. september nk. Sá háttur hefur verið hafður á undanfarin ár að þjálfari og liðsstjóri, sem í tilviki kvennaliðsins er Björn Ívar Karlsson, gerir tillögu um hópinn sem teflir fyrir Íslands hönd. Á 1. borði verður okkar langsterkasta skákkona, Lenka Ptacnikova, en aðrar í sveitinni eru Guðlaug Þorsteinsdóttir, Hallgerður Helga Þorsteinsdóttir og nýliðarnir Hrund Hauksdóttir og Veronika Steinunn Magnúsdóttir. Guðlaug tefldi síðast á Ólympíumótinu í Dresden árið 2008.

„Lokaæfingin“ fyrir Ólympíumótið fer fram þessa dagana í húsakynnum SÍ þar sem stendur yfir keppni í landsliðsflokki kvenna og allar í ólympíusveitinni eru með. Líklegt er að úrslit hafi ráðist á fimmtudagskvöldið en þá vann Lenka Ptacnikova Guðlaugu Þorsteinsdóttur. Þær höfðu báðar unnið fyrstu þrjár skákir sínar. Staðan fyrir síðustu umferð sem fram fer í dag er þessi:

1. Lenka Ptacnikova 4 v. (af 4) 2. Guðlaug Þorsteinsdóttir 3 v. 3. – 4. Hallgerður Helga Þorsteinsdóttir og Veronika Steinunn Magnúsdóttir 2 v. 5. Hrund Hauksdóttir 1 v. 6. Tinna Kristín Finnbogadóttir 0 v.

Í fjórðu umferð mættust einnig nýliðarnir Hrund og Veronika. Hrund vann Hallgerði í fyrstu umferð mótsins en í þessari skák var uppbygging hennar gegn sikileyjarvörn ekki nægilega markviss og Veronika leysti úr læðingi mikinn kraft í eftirfarandi stöðu:

Skákþing Íslands 2016:

Hrund – Veronika

25. ... f4!

26. Dxf4 Rf3+!

27. Kf1 Dxf4

28. gxf4 Bc4+!

29. Bd3

Ekki 29. Re2 Hg1 mát.

29. .. Bxd3+!

– og Hrund gafst upp þar sem hún verður hrók undir eftir 30. Hxd3 Hg1+ 31. Ke2 Rxd4+ og 32. ... Hxa1.

 

Minningarmót um Birnu Norðdahl

Það er vel við hæfi í aðdraganda ólympíumótsins og að loknu Íslandsmóti kvenna að halda minningarmót um merkan brautryðjenda, Birnu Norðdahl. Mótið fer fram laugardaginn 20. ágúst að Reykhólum við Breiðafjörð og hafa kunnir kappar á borð við Friðrik Ólafsson, Jóhann Hjartarson og Jón L. Árnason boðað komu sína og þátttöku. Tefldar verða átta umferðir með 10 mínútna umhugsunartíma. 

Birna Norðdahl, sem var bóndi og listamaður, dreif áfram af miklum krafti þá hugsjón sína að íslenskar konur tækju þátt í ólympíuskákmótum. Henni tókst ætlunarverk sitt og fyrsta íslenska kvennaliðið var sent á Ólympíumótið í Buenos Aires haustið 1978 Birna sem þá var tæplega sextug tefldi á 3. borði en aðrar í þessari ólympíusveit Íslands voru Guðlaug Þorsteinsdóttir, Ólöf Þráinsdóttir og Svana Samúelsdóttir.

Skákfélagið Hrókurinn er aðal-skipuleggjandi minningarmótsins en nánari upplýsingar má finna á skak.is og hrokurinn.is. 

So efstur á Sinquefield cup

Filippseyingurinn Wesley So vann Búlgarann Veselin Topalov í 6. umferð stórmótsins í St. Louis og komst við það í efsta sætið. Tíu skákmennt taka þátt í mótinu. Magnús Carlsen sá sér ekki fært að vera með vegna undirbúnings fyrir heimsmeistaraeinvígið við Karjakin í New York í haust en staðan þegar þrjár umferðir eru eftir er þessi:

 

1. So 4 v. (af 6) 2. – 3. Anand og Topalov 3 ½ v. 4. – 8. Vachier Lagrave, Aronjan, Nakamura og Liren Dind 3 v. 9. Giri 2 ½ v. 10. Svidler 1 ½ v.

Helgi Ólafsson [e-mail]

Grein þessi birtist í Morgunblaðinu 13. ágúst 2016

Skákþættir Morgunblaðsins