Gott jafntefli gegn Þjóðverjum - Aronian vann heimsmeistarann

A-lið Íslands mætti liði Þýskalands í 3.umferð Evrópumóts landsliða í dag. Þrátt fyrir að vera stigalægri á öllum borðum þá enduðu allar skákirnar fjórar með jafntefli. Niðurstaðan varð því 2-2 jafntefli sem hlýtur að teljast viðunandi úrslit gegn sterkum andstæðingi.

A-liðið byrjar því mótið afar vel þrátt fyrir skellinn í fyrstu umferð gegn Armenum. Sigur á Rúmenum og jafntefli við Þjóðverja er gott veganesti fyrir rimmu morgundagsins. Þá mæta strákarnir Ítölum í viðureign tveggja áþekkra liða.

Gullaldarliðið mætti vel mönnuðu Tyrknesku liði í dag þar sem munaði 100-150 stigum á borðunum fjórum. Kempurnar okkar létu þó engan bilbug á sér finna og tefldu vel. Helgi Ólafsson og Jóhann Hjartarson gerði jafntefli í sínum skákum en Jón L. Árnason tapaði sinni skák. Friðrik Ólafsson tefldi skínandi vel framan af og vildu gárungarnir í kaffiteríunni meina að Friðrik stæði til vinnings á tímabili gegn hinum stigaháa Tyrkja. Tyrkinn snéri þá á Friðrik sem varð að bíta í það súra epli að gefast upp. 3-1 tap gegn Tyrkjum var því staðreynd. Í 4.umferð mætir Gullaldarliðið Lettum sem skarta sjálfum Alexei Shirov á 1.borði.

Áhorfendur í Laugardalshöll stóðu sem límdir við gólfið hvar heimsmeistarinn Magnus Carlsen sat gegnt Armenanum Levon Aronian. Úr varð spennandi viðureign þar sem Aronian gerði sér lítið fyrir og lagði heimsmeistarann að velli með svörtu mönnunum. 

Úkraína lagði Azerbaijan að velli 2,5-1,5 í æsispennandi viðureign þar sem mikla athygli vakti að Úkraína skyldi hvíla sinn helsta hugsuð, Vassily Ivanchuk. Þetta herbragð virkaði því Pavel Eljanov vann Shakhriyar Mamedyarov á 1.borði. Rússar sýndu einnig klærnar í dag og lögðu Spán að velli með minnsta mun þar sem Ian Nepomniachtchi vann Ivan Salgado Lopez á 3.borði. Rússland og Úkraína eru í forystu ð loknum þremur umferðum og eru einu liðin sem hafa unnið allar þrjár viðureignir sínar. Þjóðirnar mætast einmitt í næstu umferð og ætti ekki nokkur einasti skákáhugamaður að láta þann viðburð framhjá sér fara. 

Kvennasveit Íslands mætti Belgum í dag þar sem tvær skákir unnust. Lenka Ptacnikova og Guðlaug Þorsteinsdóttir unnu andstæðinga sína en Elsa María Kristínardóttir og Veronika Steinunn Magnúsdóttir töpuðu sínum skákum. Á morgun mæta stelpurnar liði Svía þar sem án efa verður hart tekist á. 

Fjórða.umferð hefst klukkan 15 og eru áhorfendur hvattir til að líta við í Laugardalshöll. Skákskýringar verða á sínum stað um klukkan 17 og munu áhorfendur að þessu sinni vera í öruggum höndum stórmeistarans Þrastar Þórhallssonar. Einnig geta áhorfendur fylgst með gangi mála á skjám á skákstað.

Bæði RÚV og Stöð 2 fjölluðu um umferð dagsins. Heimir Már Pétursson tók viðtal við Hannes Hlífar Stefánsson sem er sennilega eini Íslendurinn sem hefur unnið Carlsen.

Bent er jafnframt á góða umfjöllun Björn Þorfinnssonar umferð um umferð dagsins á DV.is.

• Heimasíða mótsins
• Chess-Results
• Beinar útsendingar