Rússar með fullt hús í báðum flokkum

Rússar í miklum ham á EM landsliða og eru í forystu í báðum flokkum með fullt hús eftir fjórar umferðir. Í opnum flokki unnu þeir 3-1 sigur á Úkraínu þar sem Svidler vann Ivanchuk á fyrsta borði. Í kvennaflokki unnu þeir stórsigur á Georgíu 3½-½. Íslenska kvennaliðið náði góðu 2-2 jafntefli gegn Svíum en bæði karlaliðin töpuðu í dag.

Opinn flokkur

Í opnum flokki eru Rússar efstir með fullt hús. Aserar, Ungverjar, Spánverjar, Frakkar, Úkraínumenn, Serbar og Georgíumenn hafa 6 stig. Það verður svaka viðureign á fyrsta borði á morgun en þá mætast Rússar og Aserar. 

Íslenska liðið tapaði 1½-2½ fyrir sveit Ítalíu. Hannes Hlífar Stefánsson tapaði á fyrsta borði en öðrum skákum lauk með jafntefli. Sveitin hefur 3 stig og mætir Grikkjum á morgun. 

Gullaldarliðið tapaði 1-3 fyrir Lettum. Helgi Ólafsson gerði jafntefli við Alexei Shirov. Margeir Pétursson gerði einnig jafntefli en aðrar skákir töpuðust. Sveitin hefur 2 stig og mætir Austurríki á morgun.

Magnus Carlsen mætti aftur til leiks í dag og gerði jafntefli við Sune Berg Hansen. Norðmenn unnu engu að síður góðan 3-1 sigur á Dönum.

Færeyingar, sem eru að taka þátt í sínu fyrsta Evrópumóti, yfirspiluðu Skota 3½-½ í dag. 

Kvennaflokkur

Rússar eru eins og áður sagði í forystu með fullt hús. Frakkar og Rúmenar koma í öðru sæti með 7 stig.

Kvennaliðið gerði 2-2 jafntefli í spennandi viðureign við Svía. Lenka Ptácníková og Guðlaug Þorsteinsdóttir unnu. Sú síðarnefnda sýndi mikinn karakter þegar hann hafnaði jafntefli með tapaða stöðu þegar Svíar voru 2-1 yfir. 

Kvennaliðið hefur 2 vinninga og mætir sveit Noregs á morgun. 

RÚV birtir næsta daga EM-samantekt að loknum 10-fréttum næstu daga í umsjón Samúels Arnar Erlingssonar og Björns Þorfinnssonar. Samantektina má finna hér.

Kátt verður í Höllinni á morgun. Skákskýringar á morgun hefjast kl. 17:00 og verða í umsjón stórmeistaranna Þrastar Þórhallssonar og Helga Áss Grétarssonar. Áhorfendur boðnir sérstaklega velkomnir!

• Heimasíða mótsins
• Chess-Results
• Beinar útsendingar