Ólafur hraðskákmeistari SA

Hausthraðskákmót Skákfélags Akureyrar var háð í dag. Þung undiralda var í upphafi móts, enda hafði fráfarandi meistari haft uppi stór orð um að verja meistaratitil þriggja síðustu ára.  Sumir töldu hann víst orðinn of gamlan fyrir slík afrek, en einnig kom fram í umræðum fyrir mótið að maðurinn væri síungur og gefið í skyn að hann þættist bara vera gamall til þess að slá ryki í augu keppinauta sinna.  Það kom reyndar í ljós á mótinu að aldurinn skipti máli. Sérstaklega gekk mönnum sjötugs- og áttræðisaldri vel.

Ólafur Kristjánsson hóf mótið með öruggum sigri á fráfarandi meistara og leit aldrei til baka eftir það, vann allar skákir sínar, 13 að tölu.   Þrátt fyrir hrakfarir í upphafi móts tókst Áskatli að hreppa annað sætið, sjónarmun á undan Sigurði Eiríkssyni. Fjórði varð svo aldursforsetinn Ingimar Jónsson, gamall félagi sem er snúinn aftur á heimaslóðir. Það var svo fyrst í fimmta sæti vart var við fulltrúa ungu kynslóðarinnar, sem að þessu sinni var Símon Þórhallsson.

Mótstöflu má nálgast á heimasíðu SA.