Ólafur Gauti Ólafsson - f. 5. janúar 1985 d. 21. ágúst 2012

Ólafur Gauti kynntist skáklistinni sem barn í Rimaskóla á fyrstu starfsárum skólans. Mikill skákáhugi myndaðist meðal nemenda allt frá stofnun skólans árið 1993. Meðal efnilegustu skákmanna Rimaskóla fyrstu árin voru bekkjarbræðurnir Ólafur Gauti, Sigurjón Kjærnested og Agnar Darri Lárusson. Ólafur Gauti var mikill keppnismaður, metnaðarfullur og baráttuglaður.

Auk þess að æfa skák á grunnskólaárum sínum þá varð Ólafur Gauti fremstur jafnaldra sinna í öllum íþróttum sem hann kom nálægt og æfði með Fjölni hlaup og fótbolta. Í síðasttöldu greininni var hann valinn í yngri landslið. Ásamt tvíburasystur sinni Kristínu Birnu, margföldum Íslandsmeistara og landsliðskonu í frjálsum íþróttum, stóð Gauti fremstur í flokki nemenda Rimaskóla að vinna Íslandsmót grunnskóla í frjálsum íþróttum nokkur ár í röð og kom skólanum rækilega á kortið.

Ólafur Gauti vann skákmót Rimaskóla þrjú ár í röð á árunum 1999 - 2001, árin sem  hann var í 8. - 10. bekk. Eftir að Gauti útskrifaðist frá Rimaskóla 2001 tók annar efnilegur skákmaður við keflinu sem skákmeistari Rimaskóla,  innblásinn baráttuanda Ólafs Gauta við skákborðið, en þar var á ferðinni sjálfur Hjörvar Steinn Grétarsson sem fór fyrir skáksveitum Rimaskóla næstu árin og náði skólinn þá þeim markmiðum sem Gauti og félagar höfðu lagt grunninn að.

Ólafur Gauti var harðsnúinn keppnismaður og frábær skákmaður með stáltaugar. Andstæðingum hans reyndist nánast ókleift  að vinna Gauta þegar Íslandsmót grunnskóla voru annars vegar. Ólafur Gauti gekk í Helli og tefldi með félaginu í nokkur ár en frá blautu barnsbeini sló Fjölnishjartað hjá Gauta og því gekk hann til liðs við skákdeild Fjölnis stuttu eftir að hún var stofnuð árið 2004.

Ólafur Gauti tefldi með skáksveitum Fjölnis reglulega þegar heilsa og tími leyfði. Það var ánægjulegt og gefandi að endurnýja kynni sín við Gauta á starfsvettvangi skákarinnar, bæði innan skákdeildar Fjölnis og einnig  í kringum alla helstu skákviðburði landsins því oftar en ekki var Ólafur Gauti mættur til að fylgjast með og hitta skákvini.

Í hópi skákmanna var Ólafur Gauti mjög vel kynntur og vinamargur. Ljúf Framkoma og jákvæðni voru hans helstu kostir. Ósjaldan ræddum við Gauti saman síðustu árin og alltaf var þá horfið á vit minninganna til þeirra daga sem hann var í Rimaskóla og vann hver afrekin af öðrum. Það var engin hógværð í þessum upprifjunum okkar enda engin ástæða til. Þegar litið er til baka þá er það mér ljóst og tært að Ólafur Gauti lagði þung lóð á vogarskálarnar við uppbyggingu skákstarfs í Rimaskóla sem hefur allt frá hans námsárum staðið í miklum blóma.

Sem skólastjóri Rimaskóla og sem formaður skákdeildar Fjölnis vil ég þakka þessum afreksnemanda og ljúfa vini fyrir allt það sem hann lagði á sig til árangurs  með baráttu sinni , jákvæðni og vilja. Skákdeild Fjölnis kveður yndislegan félaga og sendir fjölskyldu Ólafs Gauta Ólafssonar einlægar samúðarkveðjur, það er skarð fyrir skyldi í hópnum en minningarnar um þennan góða dreng mun lifa og lýsa okkur í framtíðinni.

Helgi Árnason

Myndatextii:

Tvíburasystkinin Kristín Birna og Ólafur Gauti hampa Barnasmiðjubikarnum vorið 1996 fyrir sigur Rimaskóla í Grafarvogshlaupinu, árlegri keppni grunnskóla í Grafarvogi  

Ólafur Gauti að tafli fyrir Skáksveit Fjölnis á Íslandsmóti félagsliða haustið 2010