Ólympíuskákmótið hefst eftir viku í Istanbul - upphitunarmót í Kringlu á laugardag

Skáksamband Íslands sendir tvö lið á Ólympíuskákmótið sem fram fer í Istanbul í Tyrklandi dagana 27. ágúst - 10. september. Bæði er um að ræða lið í opnum flokki og svo í kvennaflokki.

Fjórir stórmeistarar eru í sveit Íslands í opnum flokki. Héðinn Steingrímsson leiðir sveitina en auk hann skipa sveitina Hannes Hlífar Stefánsson, Henrik Danielsen, Hjörvar Steinn Grétarsson, sem er aðeins 19 ára, og Þröstur Þórhallsson, Íslandsmeistari í skák. Liðsstjóri liðsins er Helgi Ólafsson, stórmeistari og skólastjóri Skákskóla Íslands.

Kvennaliðið er einnig þrautreynt þrátt fyrir ungan aldur en fyrir því fer Lenka Ptácníková, stórmeistari kvenna en liðið skipa auk hennar; Hallgerður Helga Þorsteinsdóttir, Jóhanna Björg Jóhannsdóttir, Tinna Kristín Finnbogadóttir og Elsa María Kristínardóttir, Íslandsmeistari kvenna. Liðsstjóri kvennaliðsins er Davíð Ólafsson.

Fararstjóri hópsins er Gunnar Björnsson, forseti SÍ.

Ólympíuliðin ætla að hita upp í á Blómatorginu í Kringlu á laugardag á milli 13 og 15:30 þar sem skákáhugamönnum gefst tækifæri á að fylgjast með einu sterkasta hraðskákmóti ársins en meðal keppenda verða landsliðmenn og kvennalandsliðið og fjöldi sterkra skákmanna á öllum aldri. Skákáhugamenn eru hvattir til að fjölmenna á skemmtilegan viðburð og sýna Ólympíuförunum samstöðu.

Opnað verður fyrir skráningu í mótið síðar í kvöld eða í fyrramálið hér á Skák.is en er þátttaka takmörkuð við 50 manns.  Mikilvægt er því fyrir áhugasama að skrá sig sem fyrst til leiks.