Bragi vann aðra skákina - leiðir 1,5-0,5

 

Bragi Þorfinnsson (2449) vann aðra skákina í úrslitaeinvígi hans og Þrastar Þórhallssonar (2425) um Íslandsmeistaratitilinn í skák.   Bragi leiðir í einvíginu 1,5-0,5.

 

Bragi leitaði í smiðju Gelfand í heimsmeistaraeinvíginu og fékk fljótlega töluvert betra tafl.  Þröstur greip til þess ráðs að fórna peði til að blíðka goðin en kraftmikil taflmennska Braga tryggði honum laglegan sigur í 30 leikjum.   

Þriðja skák einvígisins fer fram á morgun og hefst kl. 14.  Þá hefur Þröstur hvítt.   Teflt er í Stúkunni við Kópavogsvöll. 

Hægt er að fylgjast með skákunum á heimasíðu mótsins og einnig er hægt að fylgjast með skákunum á risaskjá á skákstað og hlusta um leið á skýringar skákspekinga.  

Mikið er í húfi í einvíginu.  Ekki nóg með að sigurvegarinn verði Íslandsmeistari heldur fær hann sjálfkrafa sæti í Ólympíulandsliði Íslands, sem keppir í Tyrklandi í haust, og keppnisrétt fyrir Íslands hönd á EM einstaklinga sem fram fer í Póllandi í apríl 2013. 

Hvorki Þröstur né Bragi hafa hampað Íslandsmeistaratitlinum, og því er ljóst að nýr Íslandsmeistari verður krýndur eftir nokkra daga.  Alls tefla þeir 4 skákir um hvítasunnuhelgina og verði jafnt að þeim loknum tefla þeir til þrautar með skemmri umhugsunartíma á miðvikudag.  

• Heimasíða Íslandsmótsins í skák
• Myndaalbúm (HÁ)
• Chess-Results