Skákþáttur Morgunblaðsins: Danskurinn missti þann stóra

Evrópumót landsliða sem lauk í Hakildiki í Grikklandi um síðustu helgi markar tímamót í skáksögunni; í fyrsta sinn vinna Þjóðverjar sigur í meiri háttar flokkakeppni. Bestu skákmenn þeirra fóru í „verkfall" fyrir Ólympíumótið í fyrra en sættir hafa tekist og þeir mættu til leiks í sérsniðnum jakkafötum, með þjálfarann Uwe Bönsch og sérstaka aðstoð frá fyrrverandi FIDE-heimsmeistara, Kasimdhshanov. Í lokaumferðinni unnu Þjóðverjar Armena 2½:1½, hlutu 15 stig. Aserar komu næstir með 14 stig og 23 vinninga og Ungverjar fengu bronsið með 13 stig og 23 vinninga.

Íslendingar náðu bestum árangri Norðurlandaþjóða, hlutu 8 stig og 18 vinninga og voru vel yfir ætluðum árangri sem setti liðið í 32. sæti. Forföll háðu liðinu ekki og það náði vel saman. Undirbúningur á mótstað gekk vel en það er sláandi hvernig tölvutæknin hefur bylt öllum vinnubrögðum. Þrátt fyrir það stendur „gamli skólinn" enn fyrir sínu.

Mikið var um óvænt úrslit á Evrópumótinu. Búlgarar með Topalov og Cheprainov léku þar sérstætt hlutverk. Þegar þeir unnu Rússa 3:1 í 4. umferð spáðu margir þeim öruggum sigri. Í næstu umferð unnu þeir Þjóðverja með sömu tölum.

Formsatriði að klára þetta? Ó, nei!

Í 7. umferð var skyndilega úr þeim allur vindur og þeir töpuðu fyrir Aserum ½:3½ og í lokumferðinni 0:4 fyrir Ungverjum og enduðu í 7. sæti.

Gamla stórveldið Rússland var með langsterkasta liðið á pappírnum en tapaði fyrst fyrir Búlgörum og svo fyrir Aserum. Rússana hefur sárlega vantað leiðtoga eftir að Kasparov hætti að tefla.

Margar afar athyglisverðar skákir voru tefldar á mótinu. Óvæntustu úrslitin teljast þegar Hjövar Steinn lagði Shirov. En stundum slapp stóri fiskurinn og magnað dæmi má finna í viðureign Dana við Armena í fimmtu umferð.

Lev Aronjan kom hingað til lands á Reykjavíkurmótið 2004 og vakti síðan mikla athygli þegar hann vann hraðskákhluta Reykjavík rapid sem fram fór í kjölfarið, varð þar fyrir ofan sjálfan Kasparov. Hann hefur haldið sér í hópi fimm stigahæstu skákmanna heims undanfarin misseri en merki oflætis komu fram á Evrópumótinu og ekki síst í eftirfarandi skák. Hann tefldi alltof hratt og hafði ekkert fram að færa. Sune Berg tefldi hinsvegar af miklum þrótti og og átti nægan tíma á klukkunni þegar Aronjan hafði leikið sínum 37. leik.

EM landsliða 2011:

Sune Berg Hansen - Lev Aronjan

Ítalskur leikur

1. e4 e5 2. Rf3 Rc6 3. Bc4 Bc5 4. c3 Rf6 5. d3 a6 6. Bb3 d6 7. O-O O-O 8. Bg5 Ba7 9. Rbd2 Kh8 10. h3 h6 11. Be3 Bxe3 12. fxe3 Re7 13. Rh4 Rg6 14. De1 a5 15. a4 c6 16. d4 Bd7 17. Dg3 Kh7 18. Rf5 Be6 19. Bc2 Re8 20. Hf2 f6 21. Df3 Rh8 22. Haf1 Db6 23. b3 Dc7 24. g4 b5 25. h4 bxa4 26. bxa4 Dd8 27. Dg3 g6 28. g5 gxf5 29. exf5 Bc8 30. dxe5 dxe5 31. Re4 Ha7 32. Dg4 Db6 33. Kh1 Ba6 34. Hg1 Hg7 35. Dh5 Rf7 36. g6 Kh8 37. gxf7 Dxe3

-Sjá stöðumynd-

Í reynd er það sérstakt afrek að finna ekki vinningsleik í þessari stöðu; ég hef fundið fimm leiki sem allir vinna að mati tölvuforritsins „Houdini" 38. Hg6 +16,30, 38. Rg5 +9,15, 38. Kh2 +6,59, 38. Hg5 +4,38, 38. Hxg7+2,18.

En Sune Berg var of veiðibráður:

38. fxe8(D)?? Dh3+ 39. Hh2 Hxg1+

- og hvítur gafst upp því að eftir 40. Kxg1 kemur 40. .... Df1 mát!

Við fundum sárlega til með Sune Berg. Heppnin fylgir þeim sterka, sagði Capablanca.

Helgi Ólafsson [e-mail]

-------------------------------------------

Skákþættur Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 20. nóvember 2011.

Skákþættir Morgunblaðsins

[Event "EM 2011"] [Site "Hewlett-Packard"] [Date "2011.11.07"] [Round "5"] [White "Hansen, Sune Berg"] [Black "Aronian, Levon"] [Result "0-1"] [ECO "C54"] [WhiteElo "2566"] [BlackElo "2802"] [Annotator ",Thomas"] [PlyCount "78"] {462MB, Fritz11.ctg} 1. e4 e5 2. Nf3 Nc6 3. Bc4 Bc5 4. c3 Nf6 5. d3 a6 6. Bb3 d6 7. O-O O-O 8. Bg5 Ba7 9. Nbd2 Kh8 10. h3 h6 11. Be3 Bxe3 12. fxe3 Ne7 13. Nh4 Ng6 14. Qe1 a5 15. a4 c6 16. d4 Bd7 17. Qg3 Kh7 18. Nf5 Be6 19. Bc2 Ne8 20. Rf2 f6 21. Qf3 Nh8 22. Raf1 Qb6 23. b3 Qc7 24. g4 b5 25. h4 bxa4 26. bxa4 Qd8 27. Qg3 g6 28. g5 gxf5 29. exf5 Bc8 30. dxe5 dxe5 31. Ne4 Ra7 32. Qg4 Qb6 33. Kh1 Ba6 34. Rg1 Rg7 35. Qh5 Nf7 36. g6+ Kh8 37. gxf7 Qxe3 38. fxe8=Q Qh3+ 39. Rh2 Rxg1+ 0-1