VIII. Strandbergsmótið - Æskan og ellin: Bragi bestur

Það var þröng á þingi á skákmótinu ÆSKAN OG ELLIN sem fram fór í gær í Hásölum Strandbergs, safnaðarheimili Hafnarfjarðarkirkju á vegum RIDDARANS, skákklúbbs eldri borgara á Stór-Hafnarfjarðarsvæðinu, eins og þeir segja suður þar. 

 Einar S. Einarsson, formaður mótsstjórnar bauð hina  nærri 80 keppendur um 30 öldunga og 50 ungmenni ásamt fríðu fylgdarliði velkomin en Helgi Ólafsson, stórmeistari setti síðan mótið og lék fyrsta leikinn b3 (að eigin vild) fyrir Braga Halldórsson, sem síðan gerði sér lítið fyrir og vann mótið.  Páll Sigurðson var mótstjóri og fórst það vel úr hendi að vanda.  

Segja má að samfelld orrahríð hafi ríkt á hvítum reitum og svörtum á meðan á mótinu stóð, en tefldar voru 9 umferðir með 7 mínútna umhugsunartíma og margur gamlinginn mátti játa sig mátaðan af hinni uppvaxandi æsku.  Í raun ótrúlegt hvað 60-70 ára aldursmunur hefur stundum lítið að segja þegar hughvæmni og snilli á skákborðinu er annars vegar.

Aðalúrslit mótsins urðu þau að Bragi Halldórsson var sigur úr bítum með 8 vinninga af 9 möguleikum, Gunnar Kr. Gunnarsson varð í öðru sæti með 7.5 v. og Júlíus Friðjónsson þriðji með 7 v. , örlítið hærri á stigum en Jón Þ. Þór og Þór Valtýsson, sem voru jafnir honum að vinningum.  Í 6 sæti var svo fulltrú ungu kynslóðarinnar, Birgir Karls Sigurðsson með 6.5 v.  Jóhann Örn Sigurjónsson, sigurvegari 2ja síðustu móta forfallaðist á síðustu stundu og náðí því ekki þrennunni, þó ekkert sé gefið í þeim efnum.  Nánari úrslit skv. töflu.

Elstu keppendurmótsins voru þeir Sverrir Gunnarsson og Sigurberg H. Elentínusson, báðir 84 ára, en sá yngsti Joshua Davíðsson aðeins 6 ára að aldri.

Aldursflokkaverðlaun hlutu:

80 ára og eldri:  Björn Víkingur Þórðarson; 75-80 ára: Sigurður Herlufsen; 70-75 ára: Einar S. Einarsson; 60-70 ára: Jón Þ. Þór

15 ára og yngri: 1. Birkir Karl Sigurðsson; 2. Jón Trausti Harðarson; 3. Oliver Aron Jóhannesson (Dagur Ragnarsson var einnig með 6 vinninga en lægri á stigum)

12 ára og yngri: 1. Símon Þórhallsson; 2. Hilmar Freyr Heimisson; 3. Kristófer Jóel Jóhannesson (Sóley Lind Pálsdóttir, Gauti Páll Jónsson, Hildur Berglind Jóhansdóttir voru jöfn þeim að vinningum, en aðeins lægri á stigum)

 9 ára og yngri: 1. Nansý Davíðsdóttir; 2. Vignir Vatnar Stefánsson; Ásdís Birna Þórarinsdóttir

Aðalstuðningsaðilar mótsins auk Hafnarfjarðarkirkju voru: POINT á Íslandi sem gaf peningaverðlaun; JÓI ÚTHERJI sem gaf alla verðlaunagripi; HAMBORGARABÚLLAN og URÐUR bókafélag, sem gáfu gjafir í vinningahappdrætti.

• Chess-Results 
• Myndaalbúm (ESE)