Vinjarmót á mánudag

Á mánudaginn, 14. febrúar, heldur Skákfélag Vinjar mót að Hverfisgötu 47 og hefst það klukkan 13:00.   Tilefnið er tvöfalt og ekki af verri endum, Valentínusardagurinn og átján ára afmæli Vinjar, en 8. feb. sl voru semsagt liðin 18 ár frá opnun athvarfsins.

Bragi Kristjóns og félagar hjá Bókinni ehf hafa tekið til bækur með blússandi kærleik og allir þátttakendur fá vel valda bók af sannkölluðum sérfræðingum bókmenntanna og reyndum rómantíkerum.

Og ekki nóg með það, því allir kvenkyns þátttakendur munu í upphafi móts fá sérvaldar kærleiksríkar ljóðabækur. Eru þær á misjöfnum aldri, en allar með fallega sál og fagurt innihald.

Þeir félagar, Ari Gísli og Eiríkur Ágúst frá Bókinni ehf setja mótið.

Tefldar verða sjö umferðir með sjö mínútna umhugsunartíma og skákstjóri verður sjálfur Valentínus okkar Íslendinga, herra Robert Lagerman.

Eftir fjórðu umferð verður boðið upp á kaffi og eitthvað huggulegt, í anda dagsins.

Kostar ekkert, bara mæta tímanlega og skrá sig.

Vin er athvarf Rauða kross Íslands fyrir fólk með geðraskanir, staðsett að Hverfisgötu 47.