Gúmmi, Jokko og Einar efstir Íslendinga í höll læksins

Tvær umferðir voru tefldar í dag á alþjóðlega mótinu í Rúnavík sem tefld er í Lækjarhöllinni. Það eru Guðmundur Kjartansson (2435), sem gerði í dag tvö jafntefli við stórmeistara, Jón Kristinn Þorgeirsson (2319) og Einar Hjalti Jensson (2372). Hinir tveir síðarnefndu lögðu landa sína í síðari skák dagsins. Þrír stórmeistarar eru efstir með 3½ vinning og tveir þeirra eru indverskir!

Fimmta umferð fer fram á morgun. Þá teflir Guðmundur við belgíska stórmeistarann Vadim Malakhatko (2540), Jón Kristinn við kínverska stórmeistarann og sigurvegara Norðurljósamótsins, Yinglun Xu (2518) og Einar Hjalti við indverska undradrenginn Nihal Sarin (2487).

Umferðin á morgun hefst kl. 15.

 

• Heimasíða mótsins
• Chess-Results
• Beinar útsendingar

Tómas atskákmeistari Reykjavíkur og Kristján atskákmeistari Hugins

Tómas Björnsson sigraði á jöfnu og spennandi Atskákmóti Reykjavíkur sem fram fór síðast liðið mánudagskvöld. Tómas tefldi vel og af öryggi á mótinu og fékk 5,5v í sex skákum og varð atskákmeistari Reykjavíkur í fyrsta sinn. Jafnteflið kom í fimmtu umferð gegn Erni Leó Jóhannssyni. Örn Leó var þá búinn að gera jafntefli við Hilmir Freyr Heimisson og þurfti á sigri að hald til að hafa sætaskipti við Tómas sem ekki tókst. Bæði Tómas og Örn Leó unnu í lokaumferðinni og varð Örn Leó því í öðru sæti með 5v. Þriðja sætinu náði svo Kristján Halldórsson með góðum endaspretti sem skilaði honum 4,5v í hús. Kristján var jafnframt efstur Huginsmanna og atskákmeistari Hugins 2017.

Þátttakendur voru 22 sem telst all góð þátttaka í þessu móti.

Lokastaðan í Chess-Results.

Hraðskákmót Garðabæjar fer fram á mánudaginn

Hraðskákmót Garðabæjar og verðlaunaafhending fyrir Skákþing Garðabæjar.
Mánudaginn 27. nóvember kl. 20.00.

1. verðlaun 15 þús.

Verðlaunum er skipt eftir Hort Kerfi.

Aukaverðlaun
Efsti TG ingur 5000 (óskipt eftir stigum)

Besti árangur miðað við eigin stig ) 5000 kr.
(performance - eigin stig - stigalausir reiknast með 1500 stig)

Tímamörk 3 mínútur + 2 sek á leik.

Þátttökugjöld 2000 kr.
Frítt fyrir félagsmenn Taflfélags Garðabæjar og þátttakendur í Skákþingi Garðabæjar 2017.

Ef þátttaka utanfélagsmanna verður góð verður aðalverðlaunum fjölgað. (Yfir 20 manns greiða þátttökugjöld)

Mótsstaður
Golfskáli GKG. Golfklúbbur Kópavogs og Garðabæjar.

Smellið á hlekkinn til að sjá þá sem þegar eru skráðir.
https://docs.google.com/spreadsheets/d/18NBIUzMXqqFbPoW9q-17Agw5PrMGTxOKnmWmx3uJ41Q/edit?usp=sharing

Rúnavík: Guðmundur með fullt hús - Vignir gerði jafntefli við stórmeistara

Önnur umferð alþjóðlega mótsins í Lækjarhöll í Rúnavík í Færeyjum fór fram í dag. Guðmundur Kjartansson (2435), sem sigraði á mótinu í fyrra, er efstur ellefu Íslendinga með fullt hús en hann vann heimamanninn Rana í Bæ í dag. Vignir Vatnar Stefánsson (2294), sem einnig átti gott mót í fyrra, gerði í dag jafntefli við moldóska stórmeistarann Vladimir Hamitevici (2519).

Flest úrslit umferðarinnar voru í samræmi við bókina góðu - það er hinir stigahærri unnu almennt hina stigalægri. 

Tvær umferðir fara fram á morgun og hefst sú fyrri kl. 9. Guðmundur teflir við spænska stórmeistarann Olev Korneev (2553) og Vignir mætir þýska stórmeistaranum Igor Khenkin (2552).

• Heimasíða mótsins
• Chess-Results
• Beinar útsendingar

 

Skemmtikvöld Hollvina Vinaskákfélagsins

Skemmtikvöld Hollvina Vinaskákfélagsins verður haldið fimmtudaginn 23. nóvember í Skákskóla Íslands í Faxafeni 12, gengið inn hjá Billiardbarnum og hefst klukkan 20.

Dagskrá kvöldsins:

Við fáum Ingvar Þór Jóhannesson til að vera með skákskýringar og tekur hann kannski einhverja skák frá EM landsliða nú í haust.

Veitingar verða og mun Þorvarður Fannar Ólafsson sjá um þær.

Hollvinur ársins verður veitt viðurkenningu og í ár er það Tómas Veigar Sigurðarson.

Að sjálfsögðu verða töfl þarna á staðnum og geta gestir gripið í skák.

Allir eru velkomnir og fá Hollvinir frítt inn. Aðgangseyrir er stillt í hóf og er aðeins 500 kr. Hægt er að skrá sig á viðburðinn hér:

https://www.facebook.com/events/316275785518813/

Jólaskákmót grunnskóla Reykjavíkur fer fram sunnudaginn 3. desember

 

Jólaskákmót grunnskóla Reykjavíkur verður haldið í húsnæði TR að Faxafeni 12 sunnudaginn 3.desember. Mótið er sem fyrr samstarfsverkefni Skóla- og frístundasviðs Reykjavíkurborgar og Taflfélags Reykjavíkur. Mótinu verður skipt í þrennt að þessu sinni; 1.-3.bekkur, 4.-7.bekkur og 8.-10 bekkur.

Tefldar verða 6 umferðir með umhugsunartímanum 5 mínútur fyrir hverja skák og bætast 3 sekúndur við eftir hvern leik (5+3). Allir grunnskólar Reykjavíkurborgar eru hvattir til þess að senda skáksveitir í mótið. Engar takmarkanir eru á fjölda skáksveita og er skáksveitum hvers skóla styrkleikaraðað með bókstöfum (a-sveit, b-sveit, c-sveit og svo framvegis). Í hverri skáksveit tefla 4 keppendur og má hver sveit hafa 0-2 varamenn. Keppanda er heimilt að tefla í eldri flokki en aldur hans segir til um, en þó má einungis tefla í einum flokki (sem dæmi þá má keppandi í 3.bekk tefla í flokki 4.-7.bekkjar, en hann getur þá ekki teflt í flokki 1.-3.bekkjar). Mikilvægt er að liðsstjóri fylgi liðum hvers skóla og er æskilegt að hver liðsstjóri stýri ekki fleiri en þremur liðum.

Dagskrá mótsins:

• Sun 3.des kl.09:30 – 12:00 – 1.-3.bekkur.
• Sun 3.des kl.12:30 – 15:00 – 4.-7.bekkur.
• Sun 3.des kl.15:30 – 18:00 –  8.-10.bekkur.

Veitt verða verðlaun fyrir þrjú efstu sætin í hverjum flokki. Einnig fær efsta stúlknasveit hvers flokks verðlaun.

Skráning fer fram í gegnum skráningarform sem finna má í gula kassanum á skak.is. Skráningu lýkur laugardaginn 2.desember klukkan 20:00. Ekki verður hægt að skrá lið á mótsstað.

Upplýsingar um þegar skráða sveitir má finna hér. 

Rúnavík Open hófst í gær

Alþjóðlega mót Rúnavík hófst í gær í Færeyjum. Af 55 keppendum eru 11 keppendur íslenskir en afar gott samstarf er á milli skáksambandanna tveggja og fjölmenntu t.a.m. Færeyingar á síðasta GAMMA Reykjavíkurskákmót. Mótið er sterkt - en tólf keppendanna eru stórmeistarar. 

Öll úrslit fyrstu umferðar voru eftir "bókinni góðu". Hinir stigahærri unnu þá stigalægri. Guðmundur Kjartansson (2435), Einar Hjalti Jensson (2372), Jón Kristinn Þorgeirsson (2319), Vignir Vatnar Stefánsson (2294), Áskell Örn Kárason (2239) og Kristján Eðvarðsson (2192) unnu sínar skákir en  Gauti Páll Jónsson (2125), Bragi Halldórsson (2103), Símon Þórhallsson (2059), Haraldur Haraldsson (2004) og Sigurður Eiríksson (1911) töpuðu.

Önnur umferð hefst kl. 15. Einar Hjalti teflir þá á fyrsta borði við indverska stórmeistarann Deep Senguta (2587), Jón Kristinn mætir rússneska stórmeistaranum Nikita Majorov (2521), Vignir Vatnar sest andspænis moldóska stórmeistaranum og Íslandsvininum Vladimimir Hamitevici (2519), Áskell keppir við rússneska stórmeistarann Evegeny Gleizerov (2503) og Kristján við indverska undrabarnið Nihal Sarin (2487). 

Skák.is mun fylgjast vel með árangri íslensku keppendanna í Lækjarhöllinni í Rúnavík.

• Heimasíða mótsins
• Chess-Results

 

Íslandsmót öldunga 65 fer fram á laugardaginn

Íslandsmót öldunga  65 ára og eldri  verður haldið laugardaginn 25. nóvember  nk. í Ásgarði félagsheimili  FEB að Stangarhyl 4, Reykjavík. Eins og í fyrra standa skákklúbbar eldri borgara á Höfuðborgarsvæðinu  sameiginlega að mótshaldinu. Þetta er í fjórða sinn sem slíkt Íslandsmót með atskákarsniði er haldið í þessum elsta aldursflokki virkra  skákmanna. 

Tefldar verða 9 umferðir með tímamörkunum  10+5; þ.e. 10 mínútna umhugsunartíma á skákina plús 5 sekúndna viðbótartíma á leik. Fjórar umferðir verða tefldar fyrir hádegi en lokaumferðirnar fimm að loknu hádegisverðarhléi. 

     

Mótið hefst kl. 10 árdegis og lýkur um kl. 16.30  með verðlaunaafhendingu. 

Þátttökugjald er kr. 1.500 og innifelur kaffi og og með því meðan á mótinu stendur og pizzusneið/ar í hádeginu. Björgvin Víglundsson er núverandi Íslandsmeistari og  hefur unnið sæmdartitilinn "Íslandsmeistari 65 ár og eldri" í öll þrjú skiptin sem um hann hefur verið keppt.  

Aðalverðlaun mótsins er kr. 50.000 ferðastyrkur til þátttöku á skákmóti erlendis.  

Auk verðlaunagripa og peninga verða veitt vegleg bókaverðlaun og aldursflokkaviðurkenningar (65-70;  71-75; 76-80; 81 og eldri).    

Vænst er góðrar þátttöku  sem víðast hvar að af landinu. Skráning á tengli á www.skak.is ; eða með smáskilaboðum  í síma 690-2000. Annars gildir bara að mæta tímanlega á mótsstað. 

Mótsnefndina skipa þeir: Einar S. Einarsson, Finnur Kr. Finnsson og Garðar Guðmundsson.

Upplýsingar um þegar skráða keppendur má finna hér.

Skákþáttur Morgunblaðsins: Hannes Hlífar og Björn Þorfinnsson meðal efstu manna

Hannes Hlífar Stefánsson og Björn Þorfinnsson voru í hópi fimm efstu manna á Norðurljósamótinu, „Reykjavik Northern lights open 2017“ sem Skáksambands Íslands stendur fyrir í samvinnu við Taflfélag Reykjavikur en mótið fer fram í húsakynnum þessa elsta starfandi skákfélags landsins. Tengingin við Norðurljósin er við hæfi þar sem maðurinn sem „seldi“ norðurljósin, skáldið Einar Benediktsson, var einn af stofnendum TR aldamótaárið 1900. Tefldar verða níu umferðir og dagskrá þess er stíf þar sem tefld var tvöföld umferð um helgina en úrslit fimmtu umferðar sem lauk seint í gærkvöldi lágu ekki fyrir þegar þetta var ritað. Þá mættust m.a. Hannes og Björn. Staða efstu manna eftir fjórar umferðir var þessi.: 1. – 5. Xi Yingu (Kína), Aloyzas Kveinys (Litháen), Xu Yi (Kína),Hannes Hlífar Stefánsson og Björn Þorfinnsson 3 v. ( af 4) 6.-10. Nihal Sarin (Indland), Mark Hebden (England), Torbjörn Ringdal (Danmörk), Hjörvar Steinn Grétarsson og Vignir Vatnar Stefánsson 2½ v.

Keppendur eru 22. talsins en SÍ réðst í framkvæmdina til að mæta óskum margra af bestu skákmönnum þjóðarinnar sem hafa bent á að hið mikla styrkleika/elo-stigabil sem er á keppendum hins árlega Reykjavíkurskákmóts, geri sókn að titiláföngum torsótta. Ekki verður betur séð en að Björn og Vignir Vatnar ætli sér að nýta tækifærið vel.

Hjörvar Steinn Grétarsson er stigahæsti keppandinn en hann tapaði í fyrstu umferð fyrir Einar Hjalta Jenssyni. Mesta athygli allra keppenda vekur hinn 13 ára Indverji, Nihal Sarin, sem hefur teflt víða um heim á undanförnum mánuðum og er talinn eitt mesta efni sem Indverjar eiga í dag. Sarin hefur lent í basli í nokkrum skákum og var með tapað tafl gegn Hjörvari Steini í 2. umferð en slapp með jafntefli.

Hannes Hlífar og Hjörvar Steinn eru þrátt fyrir allt líklegastir okkar manna til að keppa um efsta sætið og sá fyrrnefndi virðist í góðu formi ef marka má sigur hans yfir Englendingnum Hebden á laugardaginn:

Norðurljósamótið 2018; 3. umferð:

Hannes Hlífar Stefánsson – Mark Hebden

Ítalskur leikur

1. e4 e5 2. Rf3 Rc6 3. Bc4

Ítalski leikurinn er sennilega vinsælli í dag meðal toppskákmanna en spænski leikurinn sem kemur upp eftir 3. Bb5.

3....Rf6 4. d3 Be7 5. 0-0 0-0 6. He1 d6 7. a4 Be6 8. Bxe6 fxe6 9. c3 Dd7 10. Db3 b6 11. d4 Rh5 12. Be3 exd4 13. cxd4 d5 14. Rc3 Had8 15. Hac1

Hótar 16. exd5 exd5 17. Rxd5 með peðsvinningi. Stöðuuppbygging svarts er ekki góð og riddarinn á c6 verður að skreppa frá en þá lendir h5-riddarinn í vanda.

15....Ra5 16. Dd1 c6 17. Re5 De8 18. Dg4 Bd6 19. Rf3 Dg6 20. Dxg6 hxg6 21. Rg5 Hde8 22. e5 Bb4 23. g3! 

Afhjúpar mislukkaða byrjun, riddarinn á h5 á engan reit! Í næstu leikjum reynir svartur að leysa um hann.

23....c5 24. He2 Rb3 25. Hd1 cxd4 26. Bxd4 Hf5 27. h4 Rf4?!

Hebden mat það svo að besta tækifærið til a losa um riddarann væri að fórna honum akkúrat núna. Mannsfórnin gefur viss færi en Hannes er vandanum vaxinn.

28. gxf4 Hxf4 29. Be3 Hxh4 30. Rb5 Bc5 31. Rc7! d4 32. Rxe8 dxe3 33. Hd8 Hg4+ 34. Kf1 Hxg5

 

35. Rd6+!

Snjall lokaleikur sem gerir út um allar vonir svarts, 35....Kh7 er svarað með 36. Rf7! sem hótar hróknum og máti á h8. Hebden gafst því upp.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 13. nóvember 2017

Skákþættir Morgunblaðsins

TR ingar fjölmennastir og bestir á Hraðskákmóti taflfélaga 2017

Hraðskákmót taflfélaga 2017 var háð með breyttu sniði í ár frá því sem áður hefur tíðkast. Mótið var nú ekki með útsláttarfyrirkomulagi heldur tefldu þátttökusveitirnar hraðskákmót sjö umferðir skv. svissneska kerfinu og tímamörkin 3 2. Skákdeild Fjölnis bauðst fyrr í vetur til að halda mótið og ljúka því á einum degi. Það voru alls 13 skáksveitir sem mættu til leiks á skákstað í hátíðarsal Rimaskóla. Öll fjölmennustu taflfélögin sendu sveitir til keppni. Þrátt fyrir að talsvert væri um forföll hjá liðunum miðað við skipan á Íslandsmóti skákfélaga fyrr í haust þá voru sveitirnar þéttar og ljóst strax í upphafi að skemmtilegt og spennandi mót væri í aðsigi. 

Sú varð raunin og mótið var allt frá byrjun afar jafnt og spennandi. Aðeins A sveit TR skar sig nokkuð úr, tók fljótlega örugga forystu sem sveitin lét aldrei af hendi. Í næstu sætum skiptust sex lið á um að verma silfur og bronssætin; Huginn, SA, Víkingaklúbburinn , Fjölnir og A sveit Breiðabliks og Bolungarvíkur. Mótið gekk hratt og vel fyrir sig undir styrkri skákstjórn þeirra Ríkharðs Sveinssonar og Ingibjargar Birgisdóttur. 

Eftir þriggja tíma skáksetu, sjö umferðir og fjórtán skákir var komið að verðlaunaafhendingu. A sveit TR vann allar seturnar nokkuð örugglega og enduðu með 61 vinning af 84 mögulegum eða 73% vinningshlutfall. Tæpasti sigurinn var gegn Akureyringum en norðanmenn lyftu sér upp í annað sæti með góðum sigri á Fjölnismönnum í síðustu umferð og fengu silfrið með 52,5 vinninga eða aðeins hálfum vinningi meira en Skákdeild Hugins sem endaði með 52 vinninga. Víkingasveitin varð í 4. sæti (49) og í 5.-7. sæti komu nær hnífjöfn í mark Skákdeild Breiðabliks og Bolungarvíkur (45,5), Skákdeild Fjölnis (45) og efsta  b- sveitin TR (44,5). Þrjár efstu sveitirnar unnu til veglegra eignarbikara sem Helgi Árnason formaður Skákdeildar Fjölnis afhenti í mótslok.

Þrátt fyrir nokkuð stífa dagskrá og stutt hlé á milli umferða virtist almennt ríkja afar góð liðsandi og mikil stemmning. Flestir lýstu ánægju með breytt fyrirkomulag hraðskákmótsins og  væntingar um að áframhald verði á næstu árum með ennþá fleiri sveitum frá fleiri félögum og fleiri B og C liðum. 

Lokastaðan á Chess-Results