Afmælismót hjá Vin í dag

Tromp Skákfélags Vinjar, FIDE meistarinn og fjöllistamaðurinn Björn Sölvi Sigurjónsson, verður sextugur mánudaginn 26. janúar.  Af því tilefni er mót í Vin, Hverfisgötu 47, og hefst það klukkan 13:00.

Tefldar verða sex umferðir þar sem umhugsunartíminn er sjö mínútur.  Þegar stressið er í hámarki verður tekið kaffihlé, enda um afmæliskaffi að ræða og orkuríkar veitingar.

Björn Sölvi varð fyrsti Íslandsmeistari grunnskóla árið 1965.  17 ára varð hann Akureyrarmeistari, 19 ára Reykjavíkurmeistari og þótti einn alefnilegasti skákmaður landsins á sínum tíma. En Björn Sölvi dró sig í alllangt hlé en er nú kominn tilbaka. Fer hann nú fyrir sveit Skákfélags Vinjar sem í fyrsta sinn tekur þátt í Íslandsmóti taflfélaga þennan veturinn.

Skákstjóri er Fide meistarinn Róbert Lagerman.  Allir eru hjartanlega velkomnir og síminn í Vin er 561-2612