Annþór sigraði á Jólamót Frelsingjans og Hróksins

Jólamót Frelsingjans, skákfélagsins að Litla Hrauni, og Hróksins, var haldið sunnudaginn 7. des.

18 manns tóku þátt og langt síðan svo margir skráðu sig síðast til leiks í skákmóti þar fyrir austan. Ekkert var gefið eftir í þeim sjö umferðum sem tefldar voru enda glæsilegir vinningar, bikar og heiður að veði.

Annþór Kristján Karlsson sýndi glæsileg tilþrif við borðið og stóð að lokum efstur á palli, með bikarinn á lofti en hann hlaut fimm vinninga. Þór Ólíver Gunnlaugsson varð annar með fjóra og Ari Kristján Runólfsson þriðji. Þeir Ingi Páll Eyjólfsson og Jónas Ingi Ragnarsson náðu fjórum vinningum einnig, en voru lægri á stigum.

Bóka- og tónlistarútgáfan SÖGUR gaf öllum þátttakendum glæsilega vinninga og fékk lof fyrir.

 Hrókurinn hefur staðið fyrir æfingum og mótum að Litla Hrauni í tæp fjögur ár og hefur verið farið tvisvar í mánuði. Stór hópur skákmanna og -kvenna hefur tekið þátt í ferðum þessum og að þessu sinni fóru þeir Magnús Matthíasson, varaforseti Skáksambandsins, Arnar Valgeirsson og meistararnir Róbert Harðarson og Hrannar Jónsson.

Tefldu þeir sem gestir og þó Frelsingjarnir hafi teflt af miklum krafti þá verður að geta þess að Róbert -sem á mótinu fékk viðurnefnið "Hakkavélin"- hafði flesta vinninga, sex og hálfan, Hrannar fimm og hálfan og Magnús kom á eftir Annþóri með fimm vinninga. Arnar var nær hinum endanum.

Nafnbirting er með fullu leyfi vinningshafanna.