EM ungmenna - pistill 8. umferðar

U-12 drengir:

Bozidar Kisic, MNE (0) - Friðrik Þjálfi Stefánsson (0) 1-0

Friðrik tefldi þessa skák mjög vel framan af.  Andstæðingurinn tefldi stíft upp á jafntefli og bauð jafntefli tvisvar sem Friðrik hafnaði.  Friðrik vann síðan peð og fékk unna stöðu í riddaraendatafli.  Andstæðingurinn lék síðan slæmum afleik, leik sem Friðrik hafði ekki reiknað með og taldi ekki hægt að leika.  Friðrik fann ekki besta framhaldið og lék stöðunni niður í tap í framhaldinu.  Hann átti svo sannarlega meira skilið í þessari skák.

U-14 stúlkur:

Zsuzsanna Kabai, HUN (1829) - Geirþrúður Anna Guðmundsdóttir (0) ½-½

Geirþrúður lék af sér í miðtaflinu í þessari skák og fékk slæma stöðu.  Henni tókst þó að jafna taflið fáeinum leikjum síðar og endaði skákin loks í jafntefli þegar báðir keppendur myndu enda með drottningu og kóng.  Enn og aftur vel teflt hjá Geirþrúði sem er að standa sig vel á sínu fyrsta móti.

U-14 drengir:

Dagur Andri Friðgeirsson (1812) - Milos Pecurica, MNE (1942) ½-½

Góð skák hjá Degi í dag.  Varðist vel í erfiðu endatafli og hélt jafntefli eftir mikla baráttu.

U-16 stúlkur:

Petra Papp, HUN (2118) - Hallgerður Helga Þorsteinsdóttir (1907)  ½-½

Skemmtileg skák sem endaði að lokum með jafntefli eftir mikla baráttu.  Hallgerður er að tefla mjög vel og teflir allar skákir í botn.

Hanne Goosens, BEL (1941) - Jóhanna Björg Jóhannsdóttir (1655)  ½-½

Jóhanna tefldi þessa skák mjög vel og fékk unna stöðu.  Hún fann ekki alveg bestu leiðina til að vinna úr stöðunni og niðurstaðan varð því jafntefli.

U-16 drengir:

Rosell Alvar Alonso, ESP (2393) - Hjörvar Steinn Grétarsson (2299)  ½-½

Athygliverð skák Hjörvari í dag.  Hann fékk fremur erfiða stöðu og andstæðingurinn seildist eftir peði.  Hjörvar fékk þá mikið mótspil en andstæðingurinn varðist vel og hélt að lokum jafntefli í hróksendatafli.

Srdjan Jefic, BIH (2095) - Patrekur Maron Magnússon (1872) ½-½

Ágætt skák hjá afmælisbarni dagsins.  Patrekur fékk erfiða stöðu en varðist gríðarlega vel og tókst að snúa á andstæðinginn.  Það munaði mjög litlu að Patreki tækist að vinna skákina í framhaldinu.

U-18 stúlkur:

Turan Nizami Qizi Asgarova, AZE (2008) - Tinna Kristín Finnbogadóttir (1655) 1-0

Tinna fékk ágætist stöðu út úr byrjuninni og vann peð.  Hún gerðist þó of bráð í sóknaraðgerðum sem snérust í höndunum á henni og staðan hrundi.

U-18 drengir:

Sverrir Þorgeirsson (2102) - Lazar Ivanovic, SRB (1718) 1-0

Öruggur sigur hjá Sverri í dag.  Ekkert vandamál í úrvinnslunni þarna.

Jure Plaskan, SLO (2149) - Daði Ómarsson (2029) 1-0

Þetta var náttúrulega bara slys!  Daði gjörsamlega yfirspilaði andstæðinginn og var kominn með gjörunna stöðu.  Hann missti síðan af gildru sem andstæðingurinn lagði fyrir hann og tapaði drottningunni.  Ömurlegt að tapa svona en þetta kemur víst fyrir alla einhver tíman á skákferlinum.

Davíð Ólafsson