Hjörvar hraðskákmeistari Hugins

Það var hart barist á hvitu og svörtu (brúnu) reitunum í Huginsheimilinu í Breiðholti síðastliðið mánudagskvöld 16. október. Þá fór fram hraðskákmót Hugins í 26 sinn með 17 þátttakendum og þar af tveimur stórmeisturum og góðri blöndu af eldri og yngri skákmönnum. Tefldar voru 7 umferðir, tvöföld við við hvern andstæðing þannig að mest var hægt að fá 14 vinninga. Það vafðist ekki fyrir sigurvegara mótsins Hjörvari Steini Grétarssyni sem lagði alla andstæðinga sína tvisvar að velli og sigraði örugglega með fullu húsi 14 vinningum. Hjörvar vann mótið þar með í fimmta sinn og hafa ekki aðrir unnið mótið oftar. Hjörvar hefur jafnframt hapað titlinum hraðskákmeistari Hugins í öll þessi fimm skipti. Björn Þorfinnsson hefur hins vegar ennþá fleiri hraðskákmeistaratitla eða sjö þótt hann hafi bara unnið mótið fjórum sinnum.

Í öðru sæti varð Jóhann Hjartarson með 11,5v. Annað sætið var honum jafn fast í hendi og fyrsta sætið Hjörvari því auka tveggja vinninganna sem féllu í baráttunni um fyrsta sætið, þá var það aðeins Örn Leó sem náði að merkja við Jóhann með jafntefli í annarri skák þeirra.

Örn Leó Jóhannsson varð nokkuð örugglega þriðji með 10v og sýndi fram á það að sigurinn á Geðheilbrigðismótinu í síðustu viku var engin tilviljun.

Að loknu hraðskákmótinu fór fram verðlaunaafhending bæði vegna þess og Meistaramóts Hugins sem lauk fyrir skömmu. Það vantaði að vísu nokkra verðlaunahafa sem voru að tefla á Skákþingi Garðabæjar og eins var Björn Þorfinnsson ókominn frá Evrópukeppni taflfélaga. Hvað sem þvi leið þá voru Loftur Baldvinsson (3.-4. sæti) og Hjörvar Steinn Grétarsson (1. sæti) bara nokkuð kátir með sín verðlaun.

Það voru fjölbreytt verðlaun á Meistaramóti Hugins. 

Lokastaðan í chess-results.

Nánar á heimasíðu Hugins.