Bárður Örn, Joshua og Batel unnu Rótarýbikarana

Sumarskákmót Fjölnis var frá upphafi til enda afar jafnt, skemmtilegt og spennandi. Það var haldið í Rimaskóla á hátíðarsvæði Grafarvogshverfis á sumardaginn fyrsta. Bárður Örn Birkisson Smáraskóla varð sigurvegari mótsins líkt og í fyrra með 5,5 vinninga af 6 mögulegum en nýir sigurvegarar voru krýndir í yngri- og stúlknaflokk. Joshua Davíðsson í 5. bekk Rimaskóla sem fór hamförum á Íslandsmóti grunnskóla um síðustu helgi hélt áfram beittri taflmennsku og vann yngri flokkinn með 5 vinninga og hin kornunga Batel G. Haile varð efst stúlkna í hnífjafnri keppni með 3 vinninga líkt og þrjár aðrar stúlkur, en Batel reyndist hærri á stigum.

Þessi þrjú hlutu glæsilega eignarbikara sem Gylfi Magnússon félagi í Rótarýklúbb Grafarvogs afhenti. Gylfi er mikill skákáhugamaður og hefur oft stutt barna-og unglingastarf skákdeildar Fjölnis. Sumarskákmótið var afar velmannað og mjög fjölmennt. Mótið var liður í dagskrá Barnamenningahátíðar í Reykjavík 2016. Góðir vinningar voru í boði 20 bíómiðar frá SAMbíóunum sem reka kvikmyndahús víða um höfuðborgarsvæðið.

Flestir sterkustu skákkrakkar landsins, 16 ára og yngri, tóku þátt í  sumarskákmótinu en helmingur 52 þátttakenda voru félagar í Skákdeild Fjölnis. Teflt var í einum flokki en verðlaunað í þremur. Næstir í röðinni á eftir sigurvegurunum Bárði Erni og Joshua voru liðsmenn sterkustu skólaskáksveita grunnskóla; Davíð Kolka Álfhólsskóla, Björn Hólm tvíburabróðir Bárðar Arnar, Jóhann Arnar Rimaskóla, Laugalækjarstrákarnir Daníel Ernir, Aron Mai og Alexander Mai, Árni Ólafsson Hlíðaskóla og Kristján Dagur Langholtsskóla. Stefán Bergsson og Helgi Árnason voru skákstjórar og hrósuðu þeir þátttakendum óspart fyrir góða frammistöðu og hegðun. 

Lokastöðuna má nálgast á Chess-Results.

Samhliða Sumarskákmótinu var haldið fyrsta peðaskákmót Fjölnis fyrir Leikskólakrakka og þar urðu efst Emil Kári Jónsson, Jósef Ómarsson og Svandís María Gunnarsdóttir leikskólanum Lyngheimum, miklir peðaskákmeistarar sem urðu einnig í efstu sætum á Jólapeðaskákmóti Hugins í des. sl. Í verðlaun fengu þau glæsilegar húfur frá 66°N. Lenka Patcnikova stórmeistari hélt utan um peðaskákmótið.