Rússarnir koma!

Rússneski björninn tilkynnti í dag komu sína á Evrópukeppni landsiða sem fram fer í Laugardalshöll 13.-22. nóvember nk. Rússarnir mæta með 17 manna sendinefnd á mótið. Fjölmennasta sendinefndin. Fyrir utan tíu skákmenn telur liðið tvo liðsstjóra, fjóra þjálfara sem og lækni. Rússarnir hafa ótvírætt á að skipa sterkasta og sigurstranglegasta liði mótsins. Fyrir liði karlanna fer enginn annar Alexander Grischuk.

Lið Rússa skipa:

1. Grischuk (2771)
2. Tomashevsky (2758)
3. Svidler (2727)
4. Vitiugov (2725)
5. Artemiev (2675)

Það segir mikið um styrkleika Rússa að þrátt fyrir að þeir hvíli Kramnik og Karjakin er lið þeirra engu að síður það langsterkasta á pappírnum. Þeim hefur reyndar gengið bölvanlega á EM síðustu ár. Unnu síðast árið 2007 (mótið fer fram á tveggja ári fresti) þrátt fyrir að vera ávallt sterkastir á pappírnum. 

Þátttaka varamannsins, Artemiev, vekur sérstaka athygli en hann er aðeins 17 ára. Rússar gefa þarna ungum og efnilegum skákmanni sénsinn. Artemiev er aðeins 16. í stigaröð Rússa.

Kvennalið Rússa er gríðarlega sterkt. Það skipa 5 af 6 stigahæstu skákkonum Rússa:

1. Kosteniuk (2530)
2. Gunina (2529)
3. Lagno (2523)
4. Goryachkina (2497)
5. Girya (2483)

Allar nema Goryachkina voru í liði Ólympiumeistara Rússa í Tromsö í fyrra. 

Nánar verður sagt frá einstökum liðunum á EM landsliða fram að móti. Eins og er stefnir í þátttöku 36-38 liða í opnum flokki og 28-30 liða í kvennaflokki.  Nánast allir sterkustu skákmenn Evrópu taka þátt.

Heimasíða mótsins