Skákþáttur Morgunblaðsins: Kínverjar ólympíumeistarar í fyrsta sinn

Kínverjar eru Ólympíumeistarar í opnum flokki í Tromsö eftir afar sannfærandi frammistöðu frá byrjun til enda. Sigur þeirra kemur ekki á óvart en ýmis gömul vígi voru á fallanda fæti. Þar beinast sjónir manna að Rússum sem ekki hafa unnið gull síðan í Bled 2002 og hefðu kannski mátt koma fram af meiri virðingu við Garrí Kasparov en hann leiddi liðið til sigurs fjórum sinnum frá því í Manila 1992.

Kínverjar hlutu 19 stig og 31½ vinning. Í 2. sæti komu Ungverjar og Indverjar náðu 3. sæti. Bæði liðin hlut 17 stig. Íslenska liðið í opna flokknum hafnaði í 39. sæti en stórt tap í síðustu umferð fyrir Egyptum setti okkur niður um 12 sæti. Frammistaða liðsins var þrátt fyrir allt nokkuð góð en lokaúrslitin vissulega vonbrigði.

Íslenska kvennaliðið hafnaði í 55. sæti í sínum flokki og er sveitin á svipuðum slóðum og í Istanbul fyrir tveimur árum. Í kvennaflokknum sigruðu Rússar örugglega.

Það bar til tíðinda rétt áður en lokaumferðin hófst að Judit Polgar lýsti því yfir að hún væri hætt taflmennsku. Þá féll það í grýttan jarðveg hjá mörgum er heimsmeistarinn Magnús Carlsen yfirgaf Tromsö og hélt heim á leið eftir tap í 10. umferð.

Við höfum náð að rifja það upp hérna í Tromsö, greinarhöfundur og Jón L. Árnason, liðsstjóri Íslands í opna flokknum, að nú eru 36 ár síðan við tefldum fyrst saman á Ólympíumóti - í Argentínu 1978. Þeir eru teljandi á fingrum annarrar handar skákmennirnir hér sem sátu að tafli í stúkunni á „Leikvangi minnisvarðanna" í Buenos Aires þá en þar hafði fyrr um árið farið fram úrslitaleikur HM í knattspyrnu. Sumir þessara eru liðsstjórar nú, t.d. Zoltan Ribli og Ulf Anderson og svo auðvitað Jón L. Manngangurinn hefur svo sem ekkert breyst en samt finnst okkur eins og skáklistin nái alltaf að endurnýja sig. Það sem breytist hinsvegar ekki er að menn eru alltaf að leika af sér. Hér hafa gengið um gólf nær allir bestu skákmenn og hrist fram úr erminni afleiki eins og enginn væri morgundagurinn. Dæmi:

Ol, Tromsö, 5. umferð:

Perunovic - Radjabov

Radjabov er einn besti skákmaður Azera. Á ferlinum hefur hann unnið Kasparov og hefur lengi verið talinn heimsmeistaraefni. En í þessari stöðu lék hann ...

22. ... dxe5 ??

( Þessi leikur er svo slakur að undrum sætir. Hvítur getur leikið 23. Dxf7+ Kxf7 24. Rxe5 og 25. Rxc6 með auðunninni stöðu. Annar sterkur leikur er 23. Rxe5 og jafnvel 23. Rh8. Serbinn Perunovic valdi hinsvegar öruggasta leikinn

23. Rxe7+ Hexe7 24. Dxc5

Og með manni yfir vann hann létt í 32. leikjum.

Íslenska liðið í opna flokknum hefur ekki alltaf verið að finna bestu leikina eins og dæmin sann. Við hefðum unnið Tyrki í næstsíðustu umferð ef Hjörvar Steinn hefði hitt á rétta leikinn í þessari stöðu:

10. umferð:

Esen - Hjörvar

Hjörvar hafi réttilega fórnað skiptamun og sá fram á að fá tvö peð og gott spil. Esen lék síðast 24. Hc1-c2 en 24. h3 var nauðsynlegt. Hjörvar lék lék nú...

24. ... Dxh2+??

„Sjáir þú góðan leik sittu þá aðeins lengur á höndunum. Það er kannski einhver betri í boði," sagði Ingvar Ásmundsson stundum. Svartur átti 24. ... Dxe5! Og hvítur gæti gefist upp, t.d. 25. Hec1 Dxh2+ 26. Kf1 Dh1+ 27. Ke2 He8+ 28. Kd3 Re5+29. Kd2 Dh4 og vinnur létt.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Laugardagsmogganum, 16. ágúst 2014

Skákþættir Morgunblaðsins