Æskan & Ellin X. - Olís-Strandbergsmótið í skák 2013

 

Það var kátt í höllinni og mikið um dýrðir í félagsmiðstöð TR í Faxafeninu á laugardaginn var þegar hið vinsæla  skákmót  Æskan & Ellin fór þar fram.  Nærri 80 keppendur mættir til að brúa kynslóðabilið í hvítum reitum og svörtum.  Annars vegar um 30 eldhressir ellismellir  60 ára og eldri og hins vegar uppvaxandi æskumenn, meistarar framtíðarinnar, 15 ára og yngri. 

 

 

Þetta var í fyrsta sinn sem RIDDARINN, skákklúbbur eldri borgara og Taflfélag Reykjavíkur héldu mótið saman. Undanfarin 9 ár hefur mótið verið haldið í Strandbergi, safnaðarheimili Hafnarfjarðarkirkju, sem heiti mótsins er við kennt, þar sem liðsmenn Riddarans hittast til tafls á miðvikudögum allan ársins hring. Það var Sr. Gunnþór Ingason, fyrrv. sóknarprestur sem hafði frumkvæði að mótinu sem hluta af 90 ára afmælishátíðarhöldum kirkjunnar árið 2004 í samstarfi við þá Hrafn Jökulsson, forseta Hróksins og undirritaðan sem þá var þegar í fararbroddi Riddarans ásamt fleirum.

 

 

Til að tryggja mótið sem nú er var haldið í 10. sinn í sessi til framtíðar var brugðið á það ráð að fá TR, elsta og eitt öflugasta taflfélag landsins,  til samstarfs og til að auka veg þess einnig var leitað til hins rótgróna fyrirtækis á landsvísu Olíuverslunar Íslands, stofnað 1927, um að gerast aðalstyrktaraðili þess. Var myndarlegur styrktar- og samstarfssamningur þar um til 3ja ára undirritaður nýlega eins og kynning á mótinu hefur borið með sér.

Verðlaun í mótinu voru mjög aukin frá því sem áður var, bæði aðalverðlaun þess og eins aldursflokkaverðlaun. Sigurlaunin voru 50.000 krónur, 25.000 fyrir annað sætið og 15.000 fyrir það þriðja. Auk þess sem veitt voru aukaverðlaun til þeirra telpu sem bestum árangri náði.  Þess utan voru gjafabréf frá OLÍS fyrir flugmiðum með Icelandair á mót erlendis í fyrstu verðlaun aldursflokkum ungmenna og úttektarkort fyrir benzíni eða öðru hjá OLÍS fyrir gamlingjanna.  Auk þess sem bókaverðlaun voru veitt af aðstandendum mótsins.  Sportvöruverslunin JÓI ÚTHERJI gaf alla verðalaunagripi. Í mótslok  fór svo fram veglegt vinningahappdrætti fyrir þá sem ekki komust á pall, þar var í boði auk benzínúttekta, íslensk kjötsúpa fyrir tvo og kaffi með pönnukökum í eftirrétt hjá LITLU KAFFISTOFUNNI við Suðurlandsveg og Stjörnumáltíðir hjá hamborgarastaðnum METRÓ auk fleira. Sem sagt eitthvað fyrir alla.  

Að loknum nokkrum velvöldum inngangsorðum Einars S. Einarssonar, formanns  mótsnefndar og Riddarans, setti Björn Jónsson, formaður TR mótið formlega. Undirstrikuðu þeir báðir mikið uppeldislegt og þroskandi gildi skákarinnar yfir hina uppvaxandi æsku og  félagslega þýðingu og hollustu hennar fyrir þá sem eldri eru. Heilabrot eru jú heilsubót og skákin góð afþreying og kappleikur jafnt fyrir unga sem aldna.  

Skákstjóri mótsins hefur frá upphafi verið Páll Sigurðsson, núv. formaður Taflfélags Garðabæjar og svo var einnig nú og hefur stuðningur hans við mótið verið ómetanlegur.

 

 

Eftir að Páll hafði útskýrt reglur og keppnisfyrirkomulag mótsins og parað í fyrstu umferð lék Magnús V. Pétursson, forstjóri Jóa Útherja fyrsta leikinn fyrir  Braga Halldórsson (64) í skák hans við Gabríel Bjarnþórsson 6 ára.  Nokkur tár á hvarmi sáust í umferðunum níu hjá yngstu keppendunum en þó miklu fleiri bros enda var það gleðin og gamanið sem ríkti að mestu í þéttsetnum skáksalnum á hverju sem gekk.

 

 

 

Að lokinni tvísýnni keppni þar sem „hart var barist og hart var varist"  stóð hinn valinkunni meistari BRAGI HALLDÓRSSON uppi sem sigurvegari með 8 vinninga af 9 mögulegum. OLIVER ARON JÓHANNESSON (15)  varð í öðru sæti með 7.5 vinning en hann sigraði á mótinu í fyrra og þá varð Bragi þriðji.  Sérstaka athygli vakti yngissveinninn VIGNIR VATNAR STEFÁNSSON, 10 ára, gerði sér lítið fyrir og náði þriðja sæti með 7 vinninga og varð hærri á stigum en hinar öldnu kempur Þór Valtýsson og Gunnar Kr. Gunnarsson. Mörg önnur„undraverð ungstirni" náðu góðum árangri og má þar sértaklega nefna þá bræður Óskar Víking og Stefán Orra Davíðssyni, sem eru aðeins 9 og 7 ára.

 

 

Helstu úrslit í þremur aldursflokkum ungra og aldinna sem að auki var keppt í urðu þessi:  

80 ára og eldri: 1. Gunnar Kr. Gunnarsson 7v.; 2. Páll G. Jónsson 6v.; 3. 2.-3. Magnús V. Pétursson 6v.; (Einu stigi á undan kappanum Birni Víkingi Þórðarsyni, með sama vinningafjölda).

70-79 ára: 1. Þór Már Valtýsson 7v.; 2. Sigurður Herlufsen 6,5v.; 3. Gísli Gunnlaugsson 6v.

60-69 ára: 1. Bragi Halldórsson 8v.; 2. Júlíus L. Friðjónsson 6,5v; 3. Guðfinnur R. Kjartansson 6v.

13-15 ára: 1. Oliver Aron Jóhannesson 7,5v.; 2. Gauti Páll Jónsson 6,5v.; 3. Jóhann Arnar Finnsson 5,5v.

10-12 ára 1. Vignir Vatnar Stefánsson 7v.; 2. Nansý Davíðsdóttir 5,5v.;3. Mykhaylo Kravchuk 5,5v.

9 ára og yngri: 1. Óskar Víkingur Davíðsson 5,5v., 2. Stefán Orri Davíðsson 5v.; 3. Joshua Davíðsson 4v.

 

 

Elsti keppandi mótsins var Sverrir Gunnarsson 86 ára og sá yngsti Adam Omarsson 6 ára. All margir 6 ára krakkar tóku þátt, aldursmunurinn 80 ár. Fengu þeir báðir sérstakan verðlaunapening til minja. Nansý Davíðsdóttir 11 ára hlaut sérstök aukaverðlaun sem sú telpa sem bestum árangri náði, en hún varð í 17. sæti af 74 þátttakendum sem luku keppni. 

 

 

Sjá má nánari úrslit og einstaklingsskor á Chess-Results og fjölmargar myndir frá mótinu í myndasafni.

Aðra grein um mótið er einnig að finna á heimasíðu TR^.

ESE