Bréfskák: Íslenska landsliðið í úrslit Evrópumótsins

Nú stendur yfir gríðarlega spennandi lokasprettur í undanúrslitum Evrópumóts landsliða í bréfskák. Íslenska landsliðið hefur lokið öllum sínum skákum, er efst í riðlinum og hefur þegar tryggt sér sæti í úrslitamótinu sem er áætlað að hefjist á síðasta fjórðungi ársins.

Staðan í riðlinum er þessi:

1. Ísland 48½ v.

2. Slóvakía 48½ v.

3. Slóvenía 46½ v. (+4 skákum ólokið)

4. Þýskaland 46½ v. (+3 skákum ólokið)

5. Króatía 38½ v. (+6 skákum ólokið)

6. Svíþjóð 36 v., 7.-8. Eistland, Tyrkland 34½ v. (+2), 9. Noregur 33 v. (+1), 10. Búlgaría 31½ v. (+1), 11. Danmörk 30 v. (+5)

Það er ljóst að ýmis stórveldi í bréfskákinni verða að horfa á eftir Íslandi í úrslitin. Þótt Slóvakía sé jöfn Íslendingum að vinningum þá er efsta sætið Íslands, þar sem innbyrðis viðureign liðanna lauk með sigri okkar manna, 5-3. Þessi sigur skiptir sköpum þar sem þrjú efstu liðin komast áfram og Slóvenía og Þýskaland geta náð Íslandi að vinningum. Þótt sex skákum sé ólokið hjá Króatíu, þá dugir jafnvel ekki sigur í þeim öllum til að liðið komist áfram í úrslitakeppnina. Það fer því eftir úrslitunum í síðustu skákunum hjá Slóveníu og Þýskalandi hvort þau ná bæði í úrslitin ásamt Íslandi eða annað hvort þeirra situr eftir með sárt ennið.

Það verður spennandi að sjá hvort íslenska liðið standi uppi sem sigurvegar í þessum riðli og setji þannig punktinn yfir i-ið á frábærum árangri.

Til gamans má geta þess, að elsti liðsmaður íslenska landsliðsins, Jón Adolf Pálsson, er á níræðisaldri. Það eru ekki margar keppnisgreinar sem státa af landsliðsmanni á svo virðulegum aldri!