Útitafl vígt í Patreksskóla

Það var heldur kuldalegt um að litast í fyrradag þegar nemendur 10. bekkjar Patreksskóla vígðu útitafl skólans í tilefni Skákdags Íslands, en þau hafa unnið við að hanna og smíða útitaflmenn ásamt Einari Skarphéðinssyni smíðakennara.

Eins og sönnum vestfirskum víkingum sæmir þá létu nemendur, starfsfólk, Ásthildur Sturludóttir bæjarstjóri Vesturbyggðar, Henrik Danielsen stórmeistari og aðrir áhugasamir ekki rok og kulda stoppa sig í að mæta til skákhátíðarinnar og fylgjast með vígslu taflsins.

Það var Nanna Sjöfn Pétursdóttir skólastjóri Vesturbyggðar sem setti skákhátíðina meðan snjórinn var sópaður af taflinu. Fyrstu skákina tefldu stelpur á móti strákum og endaði sú skák með sigri strákanna. Því næst skoruðu þau á Henrik Danielsen stórmeistara sem vann krakkana í skemmtilegri skák þar sem gleðin var ríkjandi.

Myndaalbúm (Áróra Hrönn Skúladóttir)