Mótaáætlun SÍ starfsárið 2012-13 - Íslandsmótið 2013 verður galopið í tilefni 100 ára afmæli mótsins

Ný mótaáætlun Skáksambands Íslands fyrir starfsárið 2012-13 liggur nú fyrir samþykkt af stjórn.  Áætlunina í heild sinni má finna hér.

Skákmótahald á vegum SÍ er nokkuð hefðbundið að þessu sinni. Þó má nefna þrennt óhefðbundið. Reykjavíkurskákmótið verður haldið fyrr nú en venjulega og Íslandsmót skákfélaga í Hörpu í kjölfarið. Unglingameistaramót Íslands (20 ára og yngri) fer einnig fram sömu helgi og Drengja- og telpnameistaramót Íslands (15 ára og yngri).

Langstærsta breytingin er sú að Íslandsmótið (Skákþing Íslands) verður með allt öðru sniði á næsta ári en venja er.  Teflt verður í einum flokki fyrri hluta júnímánaðar 2013, þar sem allir geta tekið þátt; innlendir sem erlendir skákmenn. Þetta er gert í ljósi þess að mótið á 100 ára afmæli á komandi ári.  Í því tilefni hefur stjórn SÍ jafnframt ákveðið að bjóða Taflfélagi Reykjavíkur að standa að mótinu í samvinnu við SÍ en TR hélt fyrsta Íslandsmótið (sem hét þá Skákþing Íslendinga) árið 1913 og reyndar í um aldarfjórðung eftir það er SÍ tók við mótshaldinu.