Úrslitaskák úrslitaeinvígis hefst í dag kl. 14 í Stúkunni

 

Fjórða og síðasta skák úrslitaeinvígis Braga Þorfinnssonar (2449) og Þrastar Þórhallssonar (2425) fer fram í dag í Stúkunni við Kópavogsvöll.  Skákin hefst nú kl. 14.  Staðan í einvíginu er 1,5-1,5 og dugar því báðum sigur í dag til að tryggja sér Íslandsmeistaratitilinn.  Verði jafnt verður hins vegar teflt til þrautar með styttri umhugsunartíma á miðvikudag.  

Ákaflega hraustlega hefur verið teflt í einvíginu og heldur annað yfirbragð á þessum skákum en í afar andlausu heimsmeistaraeinvígi Anand og Gelfand þar sem aðeins ein skák hefur náð 40 leikjum.  

Hægt er að fylgjast með skákunum á heimasíðu mótsins og einnig er hægt að fylgjast með skákunum á risaskjá á skákstað og hlusta um leið á skýringar skákspekinga.  Í gær var mikið fjör í skákskýringum í Stúkunni og meðal gesta voru Helgi Ólafsson, stórmeistari, Sævar Bjarnason, alþjóðlegur meistari og Ingvar Þór Jóhannesson, FIDE-meistari.

Mikið er í húfi í einvíginu.  Ekki nóg með að sigurvegarinn verði Íslandsmeistari heldur fær hann sjálfkrafa sæti í Ólympíulandsliði Íslands, sem keppir í Tyrklandi í haust, og keppnisrétt fyrir Íslands hönd á EM einstaklinga sem fram fer í Póllandi í apríl 2013. 

Hvorki Þröstur né Bragi hafa hampað Íslandsmeistaratitlinum, og því er ljóst að nýr Íslandsmeistari verður krýndur í dag eða á miðvikudag.

• Heimasíða Íslandsmótsins í skák
• Myndaalbúm (HÁ)
• Chess-Results