Úrslitaeinvígið um íslandsmeistaratitilinn: Þriðja skákin hafin - bóksala á skákstað

Þriðja skák úrslitaeinvígis Þrastar Þórhallssonar (2425) og Braga Þorfinnssonar (2449) um Íslandsmeistaratitilinn hófst nú kl. 14.  Þröstur hefur hvítt og beitti Evans-bragði.  Teflt er í Stúkunni við Kópavogsvöll.  Sigurbjörn Björnsson verður með bóksölu á staðanum.  Þar geta m.a. nálgast bókina Bobby Fischer Comes Home eftir Helga Ólafsson og nýjasta New In Chess-tímaritið þar sem fjallað er um N1 Reykjavíkurskákmótið á 20 blaðsíðum.  

Hægt er að fylgjast með skákunum á heimasíðu mótsins og einnig er hægt að fylgjast með skákunum á risaskjá á skákstað og hlusta um leið á skýringar skákspekinga.  

Mikið er í húfi í einvíginu.  Ekki nóg með að sigurvegarinn verði Íslandsmeistari heldur fær hann sjálfkrafa sæti í Ólympíulandsliði Íslands, sem keppir í Tyrklandi í haust, og keppnisrétt fyrir Íslands hönd á EM einstaklinga sem fram fer í Póllandi í apríl 2013. 

Hvorki Þröstur né Bragi hafa hampað Íslandsmeistaratitlinum, og því er ljóst að nýr Íslandsmeistari verður krýndur eftir nokkra daga.  Alls tefla þeir 4 skákir um hvítasunnuhelgina og verði jafnt að þeim loknum tefla þeir til þrautar með skemmri umhugsunartíma á miðvikudag.  

• Heimasíða Íslandsmótsins í skák
• Myndaalbúm (HÁ)
• Chess-Results