N1 Reykjavíkurskákmótið hefst í dag í Hörpu kl. 16

 

Margir af sterkustu skákmönnum heims tefla á alþjóðlega Reykjavíkurskákmótinu sem fram fer í Hörpu 6. til 13. mars. Um 200 keppendur frá um 40 löndum eru skráðir til leiks og hafa aldrei verið fleiri í næstum hálfrar aldar sögu mótsins.  Mótið er það 27. röðinni. 

 

Augu skákheimsins munu beinast að Hörpu, því tvö efnilegustu ungmenni veraldar verða meðal keppenda: Kínverska stúlkan Hou Yifan, 18 ára, sem varð heimsmeistari kvenna aðeins 15 ára, og Fabiano Caruana, sem kominn er í 7. sæti heimslistans, þrátt fyrir að vera aðeins 19 ára. Caruana er jafnframt stigahæsti skákmaður sem nokkru sinni hefur teflt á Reykjavíkurmótinu.

Af öðrum gestum má nefna Tékkann David Navara, sem er næststigahæstur, og Bosníumanninn Ivan Sokolov sem er sá erlendur meistari sem unnið hefur flesta sigra á Íslandi.

Enn má nefna pólska meistarann  Piotr Dukaczewski sem komist hefur í fremstu röð, þrátt fyrir að vera blindur. Það sannar að skákin er fyrir alla - og íslenski keppendalistinn endurspeglar það.  

Flestra augu beinast að Hannesi Hlífari Stefánssyni sem sigrað hefur 5 sinnum á Reykjavíkurmótinu og Hjörvari Steini Grétarssyni efnilegasta skákmanni Íslands. Fjölmargir áhugamenn á öllum aldri etja kappi við meistarana, allt frá grunnskólabörnum til kennara, prentara og lækna.

Skáksamband Íslands stendur að mótinu og er mikil vinna lögð í að umgjörð mótsins verði sem glæsilegust.  Góð aðstaða verður fyrir áhorfendur sem geta fylgst með skákum meistaranna á risaskjá, og stórmeistararnir Friðrik Ólafsson, Helgi Ólafsson, Jóhann Hjartarson og Jón L.  annast skákskýringar.  Í lok hverrar umferðar verða pallborðsumræður í  umsjón stórmeistarans Simon Williams sem þykir einn skemmtilegasti skákskýrandi heims.

Ýmsir sérviðburðir verða samhliða mótinu.  Má þar nefna opið hraðskákmót í Viðey, málþing um skákkennslu, spurningakeppni um skák, barnaskákmót og fyrirlestrar um skákrannsóknir, svo nokkuð sé nefnt.

Mótið hefst í dag kl. 16.  Í setningarathöfn mótsins spilar KK tvö lög og ræður flytja Gunnar Björnsson, forseti Skáksambands Íslands,  Katrín Jakobsdóttir, menntamálaráðherra, og Óttarr Ólafur Proppé, borgarfulltrúi og stjórnarformaður Skákakademíu Reykjavíkur sem jafnframt setur mótið og leikur fyrsta leikinn í skák Hou Yifan, heimsmeistara kvenna.   

• Heimasíða mótsins
• Beinar útsendingar (12 skákir beint og pallborð kl. 21)
• Myndaalbúm mótsins (Hrafn Jökulsson)
• Chess-Results

Athugasemdir

[Óttar Felix Hauksson, 6.3.2012 kl. 15:38]

,,Margir af sterkustu skákmönnum heims tefla á alþjóðlega Reykjavíkurskákmótinu sem fram fer í Hörpu 6. til 13. mars."

Það eru aðeins 2 með af þeim 46 skákmönnum sem hafa yfir 2700 elo-stig og teljast sterkustu skákmenn heims. Varla teljast það ,,margir". 

Svona skreytni í opinberri kynningu er nátturulega hjákátleg og setur ritstjórann í skrýtið ljós. Hefur Skáksambandsforsetinn, sem er ritstjóri síðunnar, ekki meiri trú á áhuga fólks á mótshaldinu en svo, að hann þurfi að skrökva til um þátttökuna? 

[Ólafur Týr (IP-tala skráð) 6.3.2012 kl. 21:50]

Sælir skákforkólfar.

Nú er klukkan rétt að verða tíu að kveldi fyrsta dags og ég get ekki séð úrslit allra skáka. Beinu útsendingarnar eru flottar en hvað með allar hinar...?

Vonandi verða einhver úrslit á síðunni þegar nýr dagur rís en það er náttúrlega óþolandi á tækniöld að geta ekki sett inn niðurstöður jafnóðum.

Kæru forustumenn, það er víðar ahugi á skák en í höfuðborginni.

Kveðja úr Eyjum

[Sigurbjörn J. Björnsson (IP-tala skráð) 6.3.2012 kl. 22:36]

Ég held að það sé óumdeilanlegt að fjölmargir sterkir skákmenn taka þátt í mótinu þannig að þetta orðalag telst varla hjákátlegt.  Í fljótu bragði taldi ég 11 margreynda landsliðsmenn og þá taldi ég íslensku skákmennina ekki með, þannig að mótið er vissulega mjög sterkt. 

Hvort menn þurfi að vera með yfir 2700 til að teljast meðal "sterkustu skákmanna heims", eða hvort það sé nóg að vera landsliðmaður fyrir þjóð sem reglulega er á topp 15 í helstu liðakeppnum heims er umdeilanlegt, en ekki hjákátleg.