Oliver Aron og Nansý sigurvegarar TORG-skákmótsins

Grunnskólanemendur fjölmenntu í Hlöðuna í Gufunesbæ til að taka þátt í TORG-skákmóti Fjölnis. Þátttakendur voru 64, táknrænt, einn fyrir hvern skákborðsreit. Mótið var ekki bara fjölmennnt heldur mjög sterkt og umferðirnar fáar. Oliver Aron Jóhannesson,13 ára gamall fyrirliði Norðurlandameistara barnaskólasveita Rimaskóla, reyndist ótvíræður sigurvegari mótsins og vann hann einn allar sínar skákir. Oliver Aron vann mótið einnig í fyrra.

Í fyrsta sinn gerðist það að sama manneskjan sigraði bæði í yngri flokk og í stúlknaflokki og var það Rimaskólastúlkan unga Nansý Davíðsdóttir sem aðeins er 9 ára gömul. Rimaskólakrakkarnir fjölmenntu á mótið og voru áberandi í efstu saætunum. Aðrir í topp 20 manna hóp komu nánast allir úr Kópavogi.

Það var Óttar Ólafur Proppé borgarfulltrúi sem setti TORG-skákmótið og lék fyrsta leikinn fyrir Dag Ragnarsson stigahæsta mann mótsins. Síðan hófst mótið af krafti og gamla hlaðan í Gufunesi iðaði af lífi, þegar skákmennirnir flugust á á taflborðunum og áhugasamir skákkrakkar börðust til sigurs í hverri umferð. Margir foreldrar voru viðstaddir og þáðu kaffisopa á meðan krakkarnir nutu hagstæðra veitinga í skákhléi frá NETTÓ í Hverafold.

Helgi Árnason formaður skákdeildar Fjölnis og Stefán Bergsson frá Skákakademíu Reykjavíkur höfðu goða stjórn á mótinu sem mörgum fannst líða allt of hratt og vera of stutt. Mótinu lauk með mikilli verðlaunahátíð. Fyrirtæki í verslunarmiðstöðinni Torginu við Hverafold gáfu um og yfir 30 verðlaun. NETTÓ bikararnir glæsileu lentu í höndum meistaranna Olivers og Nansýjar eins og áður sagði.

Fyrirliði Salaskóla og tvöfaldur Árnamessumeistari Birkir Karl Sigurðsson lenti í öðru sæti með 5 vinninga og Dawid Kolka fyrirliði Álfhólsskóla í því þriðja einnig með 5 vinninga. Jón Trausti Harðarson Íslandsmeistari drengja og Nansý Davíðsdóttir fengu líka 5 vinninga sem er frábær árangur á svona stuttu móti. Í 6. - 10. sæti komu Donika Kolica skákdrottning úr Hólabrekkuskóla, Sóley Lind Pálsdóttir úr Hvaleyrarskóla í Hafnarfirði, Hrund Hauksdóttir margfaldur Íslandsmeistari stúlkna úr Rimaskóla, Felix Steinþorsson sá ungi og efnilegi skákmaður úr Álfhólsskóla og Jóhann Arnar Finnsson enn einn Norðurlandameistarinn úr barnaskólaskáksveit Rimaskóla.

Til að sýna hversu baráttan var hörð og mótið sterkt þá urðu hinir öflugu Evrópumeistarafarar, Dagur Ragnarsson og Vignir Vatnar Stefánsson að gera sér að góðu 11. - 20. sæti. Eins og sjá má á Chess-Results þá voru líka ný nöfn í efstu sætum eins og Kormákur Máni í Kársnesskóla, Viktor Ásbjörnsson úr Rimaskóla Bárður Örn og Björn Hólm í Smásraskóla og síðast en ekki síst hinn sex ára Joshua Davíðsson Rimaskóla sem líkt og Nansý systir hans er mikið efni í góðan skákmann.

• Myndaalbúm (HÁ)
• Chess-Results