Grænlenskir krakkar í heimsókn

Nú á dögunum var hér á landi hópur grænlenskra barna, ásamt kennurum og fylgdarliði, í boði Kalak vinafélags Íslands og Grænlands.  Krakkarnir frá Grænlandi koma frá litlum þorpum á austurströnd landsins, og eru þannig næstu nágrannar Íslendinga í heiminum. Á þessum slóðum eru engar sundlaugar og því kviknaði sú hugmynd fyrir fimm árum að bjóða þeim til Íslands og kynna þau fyrir heitu, íslensku sundlaugarvatni.

Krakkarnir sækja skóla í Kópavogi meðan á Íslandsdvölinni stendur, kynnast jafnöldrum sínum og íslensku samfélagi. Í flestum tilvikum er þetta fyrsta utanlandsferð grænlensku krakkanna og ógleymanleg upplifun.

Nokkur hluti hópsins hefur sótt skákkennslu síðustu ár á Grænlandi en þær heimsóknir hófust að frumkvæði Hrafns Jökulssonar ásamt öðrum meðlimum Hróksins. Skákakademía Reykjavíkur ákvað því að bjóða hópnum upp á skákkennslu og var það Björn Ívar, einn af kennurum Skákakademíunnar, sem heimsótti grænlenska hópinn síðastliðinn fimmtudag. Krakkarnir voru gríðarlega áhugasamir og þrátt fyrir töluverða tungamálaörðugleika, einkum vegna slakrar dönskukunnáttu kennarans og dræmrar enskukunnáttu nemendanna, tókst öllum að gera sig
skiljanlega með aðstoð eins af grænlensku kennurunum. Eftir kennsluna var slegið upp fjöltefli þar sem krakkarnir nutu samráðs hvors annars nokkrum borðum. Viðburðurinn tókst vel og er vonandi að við fáum að sjá meira af hinum bráðskemmtilegu grænlensku börnum við skákborðið í
framtíðinni.