Skákþing Norðlendinga - Haustmót SA hefst á föstudaginn

Skákþing Norðlendinga - Haustmót Skákfélags Akureyrar verður haldið 18-20. september nk. í Skákheimilinu á Akureyri 

Fyrirkomulag:

Telfdar verða sjö umferðir eftir svissnesku kerfi. Fyrst fjórar atskákir (25 mín) og svo þrjár kappskákir (90 mín + 30 sek fyrir hvern leik).

Dagskrá:

• 1-4. umferð, föstudaginn, 18. september, kl. 20.00
• 5. umferð, laugardaginn, 19. september, kl. 11.00
• 6. umferð, laugardaginn 19. september, kl. 16.30
• 7. umferð, sunnudaginn, 20. september, kl. 10.00.

Mótinu lýkur með hraðskákmóti sem hefst kl. 15.00 (eða a.m.k. 25 mín eftir lok 7. umferðar).

Verðlaun:

• Fyrstu verðlaun               kr. 40.000
• Önnur verðlaun                kr. 30.000
• Þriðju verðlaun               kr. 20.000
• Stigaverðlaun                 kr. 10.000

Norðurorka er aðalstyrktaraðili mótsins.

Meistaratitlar og skipting verðlauna:

Peningaverðlaun skiptast jafn milli þeirra sem eru jafnir að vinningum. Sami keppandi getur fengið bæði stigaverðlaun og verðlaun fyrir sæti.

Skákmeistari Norðlendinga verður sá keppandi sem fær flesta vinninga og á lögheimili á Norðurlandi. Verði fleiri en einn jafnir að vinningum munu stig ráða.

Skákmeistari Skákfélags Akureyrar verður sá félagsmaður í Skákfélaginu sem fær flesta vinninga. Verði tveir eða fleiri jafnir að vinningum þarf að aukakeppni um titilinn.

Þátttökugjöld eru kr. 2.500, en kr. 1.500 fyrir keppendur yngri en 18 ára.

Skákstjóri er Áskell Örn Kárason og tekur hann við skráningum í mótið ([e-mail]).

Nöfn skráðra þáttakenda má finna hér.

Viltu vera sjálfboðaliði á EM?

Skáksamband Íslands mun í vetur ráðast í eitt stærsta verkefni íslenskrar skáksögu þegar Evrópumeistaramót landsliða verður haldið í Laugardalshöllinni dagana 12. – 22. nóvember. Framkvæmdin er gríðarlega umfangsmikil. Skáksambandið leitar um þessar mundir að sjálfboðaliðum til að starfa við mótið. Ýmis störf eru í boði og verður unnið á tveimur vöktum. Önnur vaktin er frá 14:00 – 18:00 og hin frá 18:00 – 21:00. Sjálfboðaliðarnir munu m.a. vinna við miðasölu, móttöku keppenda, veitingasölu, vörslu verðmæta,uppsetningu og frágang, upplýsingagjöf og öryggisgæslu.

Óskað er eftir 50 sjálfboðaliðum en nú þegar eru sjálfboðaliðar komnir vel á annan tuginn. Skráning verður opin til 8. október. Þeir sem skrá sig fyrir 21. september fá boðsmiða á bíómyndina Pawn Sacrifice. Fundir með sjálfboðaliðum verða haldnir sunnudaginn 11. október. Annar klukkan 13:00 og hinn 20:00 en farið verður yfir sömu atriði á fundunum og geta sjálfboðaliðar valið hvorn fundinn þeir sækja.

Skáksambandið mun leggja mikla áherslu á góðan aðbúnað sjálfboðaliða. Þeir munu fá góða leiðsögn og þjálfun svo störfin verði sem auðveldust að vinna. Sérstakt herbergi í Höllinni verður tekið frá fyrir sjálfboðaliða þar sem þeir geta hvílst og notið veitinga. Þeir sjálfboðaliðar sem taka sjö vaktir eða fleiri fá boð á lokhóf mótsins, veglega gjöf frá Skáksambandinu að móti loknu og boð á uppskeruhátíð mótsins í desember þar sem landsliðsmenn munu koma í heimsókn og fara yfir þátttöku sína á mótinu. Allir sjálfboðaliðar fá gefins minjagrip mótsins.

Skáksambandið hvetur fólk á öllum aldri til að skrá sig sem sjálfboðaliða og taka þátt í því skákævintýri sem framundan er.

Bragi Halldórsson og Donika Kolica ætla bæði að vera sjálfboðaliðar á EM!  Viltu slást í hópinn?

Skráning hér.

 

Haustmót TR hófst í gær

Haustmót Taflfélags Reykjavíkur hófst í gær. Alls taka 49 skákmenn þátt í mótinu. Teflt er 10 manna í a-, b-, og c-flokkum auk opins flokks (19 keppendur). A-flokkurinn er sterkur þar sem Bragi Þorfinnsson (2414) og Einar Hjalti Jensson (2392) fara langfremstir í flokki.

Önnur umferð Haustmótsins fer fram á miðvikudagskvöldið.

A-flokkur:

Oliver Aron Jóhannesson (2198) vann Lenku Ptácníková (2235). Öðrum skákum lauk með því að hinn stigahærri hefði betur. Einn skák frestað.

Meðalstig eru 2202 skákstig.

Úrslit má nálgast á Chess-Results.

B-flokkur:

Keppendur eru á mjög litlu stigbili eða frá 1854-2033 skákstigum. Meðalstig eru 1933 skákstigum. Erfitt verður að tala um óvænt úrslit í b-flokki. 

Þremur af fjórum skákum lauk með hreinum úrslitum. Einni skák frestað.

Úrslit má nálgast á Chess-Results.

C-flokkur:

Keppendur í c-flokki eru mun meira stigabili en b-flokkurinn eða frá 1488-1843 skákstigum. Meðalstig er 1631 skákstig.

Þremur skákum lauk með hreinum úrslitum. Einni skák frestað.

Úrslit má nálgast á Chess-Results.

Opinn flokkur:

19 keppendur á stigabilinu 1000-1488 skákstigum taka þátt. Vegna þriggja frestaðra er ekki búið að raða í aðra umferð.

Sjá nánar á Chess-Results

• Heimasíða TR
• Chess-Results

HT - Vinaskákmótið hefst kl. 13 í dag

Vinaskákfélagið og Hrókurinn bjóða til HT- Vinaskákmóts í Vin, Hverfisgötu 47, nk. mánudag klukkan 13. Tefldar verða sex umferðir með sjö mínútna umhugsunartíma. Heiðursgestur mótsins er Eygló Harðardóttir félagsmálaráðherra. 

Í leikhléi verður boðið upp á veglegar veitingar og vígt nýtt vöfflujárn sem Heimilistæki gefa í Vin. Er vöfflujárnið sömu gerðar og notað er í Karphúsinu til að fagna kjarasamningum!

Hróksmenn hafa staðið fyrir skáklífi í Vin, batasetri Rauða krossins, síðan árið 2003 og þar starfar hið fjörmikla Vinaskákfélag, sem m.a. tekur þátt í Íslandsmóti skákfélaga og hefur náð alla leið í efstu deild. Vinaskákfélagið hefur átt mikinn þátt í að auðga líf margra einstaklinga, rjúfa félagslega einangrun og auka lífsgæði.

Fastar æfingar eru í Vin á mánudögum kl. 13 en þar er teflt flesta daga. Allir eru hjartanlega velkomnir á æfingar og mót Hróksins og Vinaskákfélagsins.

Æfingar skákdeildar Fjölnis hefjast á miðvikudaginn

Vikulegar skákæfingar Skákdeildar Fjölnis fyrir börn og unglinga hefjast miðvikudaginn 16. september og verða þær framvegis alla miðvikudaga í vetur frá kl. 17:00 – 18:30. Æfingarnar eru í Rimaskóla og er gengið inn um íþróttahús skólans. Árangur þeirra barna sem sótt hafa reglulega skákæfingar Fjölnis hefur verið mjög góður á undanförnum árum og skákdeildin hlotið mörg verðlaun og viðurkenningar fyrir árangursríkt starf.

Foreldrar áhugasamra barna í Grafarvogi og á höfuðborgarsvæðinu öllu eru hvattir til að nýta sér skemmtilegar og áhugaverðar skákæfingar Fjölnis sem bjóðast ókeypis.

Í fyrra mættu að jafnaði 30 krakkar á hverja æfingu. Æfingarnar miðast við að þátttakendur kunni góð skil á öllum grunnatriðum skáklistarinnar og tefli sér til ánægju. Foreldrar eru hvattir til að mæta með börnunum sínum og aðstoða sem alltaf er þörf fyrir. Reynt er að hafa æfingarnar fjölbreyttar og skemmtilegar, kennsla og skákmót til skiptis. Boðið er upp á veitingar á hverri æfingu svo sem ávexti, kexmeti og vatn. Öllum skákæfingum lýkur með verðlaunaafhendingu. Meðal leiðbeinenda í vetur verða m.a. afreksunglingar í skáklistinni úr úrvalsflokki Skákskóla Íslands.

Umsjón með skákæfingum Fjölnis í vetur hefur líkt og undanfarin ár Helgi Árnason formaður skákdeildarinnar. Munið fyrstu skákæfinguna 16. september.

Huginn sigraði örugglega í hraðskákkeppni taflfélaga

Það voru einbeittir liðsmenn Hugins sem mættu til leiks í gær og unnu öruggan sigur á Bolvíkingum með 52,5 vinningum gegn 19,5 vinningum í úrslitum hraðskákkeppni taflfélaga.

Helgarnir í liði Hugins fóru mikinn og slepptu einungis einum vinningi hvor. Þröstur, Stefán og Magnús Örn voru einnig allir mjög drjúgir. Jóhann Hjartarson stóð upp úr liði Bolvíkinga með 9 vinninga í 12 skákum.

Árangur einstakra liðsmanna Hugins

Helgi Ólafsson 11/12
Þröstur Þórhallsson 9,5/12
Stefán Kristjánsson 9/12
Helgi Áss Grétarsson 8/9
Magnús Örn Úlfarsson 8/12
Aðrir minna

Sjá nánari úrslit hér á Chess-results

Hörðuvallaskóli með silfur og Rimaskóli með brons!

Skáksveit Hörðuvallaskóla endaði með silfur á NM barnaskólasveita sem lauk fyrr í dag í Kaupamannahöfn. Kópavogsmenn unnu sænsku sveitina 2½-1½ í lokaumferðinni og hlutu 11½ í 20 skákum. Önnur danska sveitin vann mótið með 13 vinningum. Rimaskóli byrjaði keppnina hægt en tveir 4-0 sigrar í tryggðu sveitinni bronið. Sveitin hlaut 10½ vinning.

Silfurlið Hörðuvallaskóla skipuðu:

1. Vignir Vatnar Stefánsson
2. Sverrir Hákonarson
3. Arnar M. Hreiðarsson
4. Stephan Briem
5. Óskar Hákonarson

Liðsstjóri var Gunnar Finnsson.

Bronssveit Rimaskóla skipuðu:

1. Nansý Davíðsson
2. Jóhann Arnar Finnsson
3. Kristófer Jóel Jóhannesson
4. Joshua Davíðsson
5. Kristófer Halldór Kjartansson

Liðsstjóri var Jón Trausti Ragnarsson.

 

• Heimasíða mótsins
• Beinar útsendingar
• Myndaalbúm (HÁ)

 

Hörðuvallaskóli í öðru sæti fyrir lokaumferðina

Skáksveit Hörðuvallaskóla vann 2½-1½ sigur á annarri dönsku sveitinni á Norðurlandamóti barnaskólasveita í morgun. Hörðuvallaskóli hefur hlotið 9 vinninga af 16 mögulegum og er í öðru sæti fyrir lokaumferðina sem fram fer síðar í dag. Með góðum úrslitum í dag hefur Hörðuvallaskóli möguleika á gullinu en þá þarf allt að falla þeim í vil. 

Rimaskóli vann 4-0 sigur á finnsku sveitinni. Rimaskól1 er í 4.-5. sæti með 6½ vinning. Rimaskóli er aðeins hálfum vinningi frá verðlaunasæti.

Lokaumferðin hefst nú kl. 12 og ljóst er að mikið er í húfi fyrir báðar sveitir. 

• Heimasíða mótsins
• Beinar útsendingar
• Myndaalbúm (HÁ)

 

Bakú: Stór nöfn þegar fallin úr leik - teflt til þrautar í dag

40 einvígum af 64 lauk með hreinum úrslitum í fyrstu umferð heimsbikarmótsins í skák. 24 einvíganna halda áfram í dag þar sem teflt verður til þrautar með skemmri umhugsunartíma. Gata Kamsky er sennilega stærsta nafnið af þeim sem fallnir eru úr leik.

Flestir sterkustus skákmennirnir fóru áfram nokkuð auðveldlega. Meðal þeirra sem þurfa að tefla þó til þrautar í dag eru Grischuk og Gelfand.

Hægt er að fylgjast með fjörinu á heimasíðu mótsins en taflmennska hófst kl. 10 í morgun.

Sjá nánar á Chess.com.

 

• Heimasíða mótsins
• Beinar útsendingar

Skákþáttur Morgunblaðsins: Nakamura bauð skákreiknum birginn

Er Magnús Carlsen að gefa eftir? Úrslit tveggja síðustu stórmóta sem hann hefur tekið þátt í virðast benda til þess. Á Sinquefield Cup sem lauk í St. Louis í Missouri-ríki um helgina varð hann í 2. sæti með þrem öðrum. Hann er efstur á nýbirtum Elo-lista FIDE en liðin er sú tíð þegar hann bar höfuð og herðar yfir keppinauta sína. Armeninn Levon Aronjan sigraði nokkuð óvænt en lengi vel var útlit fyrir að Magnús Carlsen næði efsta sæti; eftir slæma byrjun komu þrír sigrar og hann var kominn á toppinn en tefldi kæruleysislega í jafnri stöðu og tapaði með hvítu fyrir Rússanum Alexander Grischuk. Um svipað leyti tók Aronjan sprett og vann mótið að lokum og hafði þá vinningi meira en næstu menn:

1. Aronjan 6 v. (af 9) 2.–5. Giri, Carlsen, Vachier-Lagrave, Nakamura 5 v. 6.–7. Topalov, Grischuk 4½ v. 8.–9. Caruana, Anand 3½ v. 10. So 3 v.

Beinar vefútsendingar eru í dag frá öllum helstu skákmótum og vefurinn chess24 leiðandi á því sviði. Í útsendingunum frá St. Louis var í aðalhlutverki skákdrottningin Jennifer Shahade, höfundur bókarinnar „Chess Bitch“, og hafði sér til aðstoðar Yasser Seirawan og Maurice Ashley. Meðal nýjunga í útsendingum var „skriftaklefi“, en skákmenninrir voru fengnir til að líta þar inn annað veifið og „leiða út“ um tilfinningar sínar sínar gagnvart stöðunni í skákum sínum svo áhorfendur gátu heyrt – þó ekki andstæðingurinn. Meðal gesta á skákstað var Garrí Kasparov, sem hrósaði Hikaru Nakamura sérstaklega fyrir að hafa boðið skákreiknum birginn er hann þræddi öngstræti kóngsindversku varnarinnar og vann glæsilegan sigur:

Saint Louis 2015; 6. umferð:

Wesley So – Hikaru Nakamura

Kóngsindversk vörn

1. d4 Rf6 2. c4 g6 3. Rc3 Bg7 4. e4 d6 5. Rf3 O-O 6. Be2 e5 7. O-O Rc6 8. d5 Re7

Klassíski kóngsindverjinn – „ekkert annað en brögð og brellur,“ hefur Vladimir Kramnik sagt.

9. Re1 Rd7 10. f3 f5 11. Be3 f4 12. Bf2 g5

Afbrigði „...sem hefur verið reiknað til þvingaðs máts,“ stóð skrifaði í frægri bók, „60 minnisverðar skákir“ – Kannski fullmikið sagt en á vel við um þessa viðureign!

13. Rd3 g6 14. c5 Rf6 15. Hc1 Hf7 16. Kh1 h5 17. cxd6 cxd6 18. Rb5 a6 19. Ra3 b5 20. Hc6 g4 21. Dc2 Df8 22. Hc1 Bd7 23. Hc7?!

So skaut byrjunarleikjunum út undrahratt en „vélarnar“ mæla þó með 23. Hb6 og telja stöðu hvíts betri. Ekki er að sjá að þreföldun á c-línunni gefi mikið.

23. ... Bh6 24. Be1 h4! 25. fxg4?

Peðaflaumur svarts var orðinn ógnandi en nú fyrst fer skriðan af stað.

25. ... f3! 26. gxf3 Rxe4!

Með hugmyndnni 27. gxf3 Hf1+! 28. Kg2 Be3 o.s.frv

27. Hd1 Hxf3 28. Hxd7 Hf1+ 29. Kg2

Getur hvítur varið þessa stöðu?

29. ... Be3!

„Kóngsindverski biskupinn“ hefur gegnt lykilhlutverki í þessari skák. Eftir 30. Bxf1 kemur 30. ... h3+! 31. Kxh3 Dxf1+ 32. Dg2 Rg5 mát.

30. Bg3

Hann gat farið með biskupinn í aðra átt, 30. Ba5 og þá kemur þvingað mát í fimm leikjum: 30. ... h3+! 31. Kxh3 Dh6+ 32. Kg2 Rf4+ 33. Kxf1 Rg3+! og mát í næsta leik, 34. Ke1 Rg2 mát eða 34. hxg3 Dh1 mát.

30. ... hxg3! 31. Hxf1 Rh4+ 32. Kh3 Dh6 33. g5 Rxg5+ 34. Kg4 Rhf3! 35. Rf2 Dh4+ 36. Kf5 Hf8+ 37. Kg6 Hf6+! 38. Kxf6 Re4+ 39. Kg6 Dg5 mát.

Glæsilegur endir á frábærri sóknarskák.

 

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu 

Grein þessi birtist í Morgunblaðinu 29. ágúst 2015

Skákþættir Morgunblaðsins

[Event "Sinquefield Cup"] [Site "Saint Louis USA"] [Date "2015.08.29"] [EventDate "2015.08.23"] [Round "6.4"] [Result "0-1"] [White "Wesley So"] [Black "Hikaru Nakamura"] [ECO "E99"] [WhiteElo "2779"] [BlackElo "2814"] [PlyCount "78"] 1. d4 Nf6 2. c4 g6 3. Nc3 Bg7 4. e4 d6 5. Nf3 O-O 6. Be2 e5 7. O-O Nc6 8. d5 Ne7 9. Ne1 Nd7 10. f3 f5 11. Be3 f4 12. Bf2 g5 13. Nd3 Ng6 14. c5 Nf6 15. Rc1 Rf7 16. Kh1 h5 17. cxd6 cxd6 18. Nb5 a6 19. Na3 b5 20. Rc6 g4 21. Qc2 Qf8 22. Rc1 Bd7 23. Rc7 Bh6 24. Be1 h4 25. fxg4 f3 26. gxf3 Nxe4 27. Rd1 Rxf3 28. Rxd7 Rf1+ 29. Kg2 Be3 30. Bg3 hxg3 31. Rxf1 Nh4+ 32. Kh3 Qh6 33. g5 Nxg5+ 34. Kg4 Nhf3 35. Nf2 Qh4+ 36. Kf5 Rf8+ 37. Kg6 Rf6+ 38. Kxf6 Ne4+ 39. Kg6 Qg5# 0-1