Valdimar eðalskákmaður Ása

Í gær tefldu Æsir sitt Eðalskákmót. Það var hugmynd Magnúsar V Péturssonar að hafa eitt slíkt skákmót á ári þannig að til þess að fá verðlaun á slíku móti þyrftu menn að hafa náð 75 ára aldri. Maggi P er þekktur fyrir að fá skemmtilegar hugmyndir við skákborðið og þar fyrir utan líka en Magnús segir oft "Maggi er sterkur" og eru það orð með sönnu.

Í gærvar það nú þannig að unglingarnir eins og við köllum þá, sem eru innan við sjötugsaldurinn, röðuðu sér í þrjú efstu sætin, þótt þeir fengju enga verðlauna peninga.

Þetta voru þeir Björgvin Víglundsson, Ingimar Halldórsson og Guðfinnur R Kjartansson eins og sést nánar í meðf. töflu.

Efsti öðlingurinn kom svo í fjórða sæti með 6 ½ vinning, það var Valdimar Ásmundsson. hann fékk gullpening og farandbikarinn til varðveislu í eitt ár.

Valdimar var Eðalskákmeistari 2014 líka. Silfureðalmeistari varð Páll G Jónsson með 6 vinninga og bronseðalmeistari varð Gísli Sigurhansson með 5 vinninga.

Síðan fékk efsti maður 85 ára og eldri gullpening, aðeins einn þátttakandi í gær hafði náð þeim aldri, það var Friðrik Sófusson sem hreppti þau verðlaun.

Magnús Pétursson afhenti öll verðlaun.

Finnur Kr sá um skákstjórn. 

Sjá nánari úrslit og myndir frá ESE

Jón Kristinn efstur fyrir lokaumferð Norðurorkumótsins

 

Sjöttu og næstsíðustu umferð Norðurorkumótsins, Skákþings Akureyrar, lauk í gær með fimm frestuðum skákum. Helst bar til tíðinda að tveir efstu menn mótsins, Jón Kristinn og Áskell, gerðu jafntefli á fyrsta borði. Áskell, sem hafði svart, hrifsaði til sín frumkvæðið og svo fór að Jón þurfti að gefa drottningu fyrir hrók og riddara. Þá stöðu tókst honum að verja og jafntefli varð niðurstaðan.

Andri tapaði fyrir Haraldi, Ulker vann Sigurð glæsilega, Eymundur lagði Loga og Oliver gerði stutt jafntefli við Gabríel.

Staðan fyrir síðustu umferð er því þessi:

• Jón Kristinn 5,5 vinningar
• Áskell 5 vinningar
• Ólafur 4,5 vinningar
• Símon, Haraldur og Smári 4 vinningar
• Ulker 3,5 vinningar
• Andri, Haki, Jakob, Eymundur og Hreinn 3 vinningar
• Karl, Sigurður og Kristján 2.5 vinningar
• Logi, Benedikt og Oliver 2 vinningar
• Hjörleifur og Sveinbjörn 1,5 vinningar
• Gabríel 1 vinningur

Pörun í lokaumferðina má nálgast hér.

• Heimasíða SA
• Chess-Results

Lokaskráning á tabula gratulatoria (þakkarlista) fyrir Reykjavíkurmótsbók á morgun

Eins og kunnugir vita hefur Skáksamband Íslands ráðist í ritun bókar um sögu Reykjavíkurskákmótsins. Helgi Ólafsson, stórmeistari og skólastjóri Skákskóla Íslands, er höfundur bókarinnar. Ljóst má vera að fáir valda því hlutverki eins vel. Helgi er hafsjór fróðleiks um mótið og var sjálfur staddur í hringiðu þess um 30 ára skeið.

Saga Reykjavíkurmótsins er jafnframt saga skáklistarinnar á Íslandi, þar sem mótið hefur myndað þungamiðju skáklífs og veitt íslenskum skákmönnum tækifæri til þess að etja kappi við erlenda skákmeistara á heimavelli og þjóðinni ánægju af því að geta fylgst með skák á heimsmælikvarða úr návígi. Reykjavíkurmótið er elsti viðburður sem ber í titli nafn höfuðborgarinnar og er enn starfræktur og haldinn reglulega. Sagan er einnig aldarspegill, þar sem Helgi hefur ekki einatt næmt auga fyrir því sem gerist á skákborðinu heldur einnig utan þess. 

Verkið verður gefið út í tveimur bindum. Hið fyrra segir sögu mótanna frá 1964 til 1990 og kemur út nú í mars fyrir Opna Reykjavíkurskákmótið í umsjón Sagna útgáfu, en Menningarfélagið Mátar sá um yfirlestur ritsins. Sú ákvörðun hefur einnig verið tekin að fresta útgáfu tímaritsins Skákar en leggja þess í stað áherslu á Sögu Reykjavíkurskákmótsins í 50 ár. Seinna bindið kemur út að ári.

Það er von Skáksambands Íslands að bókin hljóti góðar viðtökur. Í því skyni býður SÍ skák- og skákáhugamönnum að fá skráð nafn sitt á sérstakan þakkarlista, tabula gratulatoria, gegn bindandi samningi um kaup á bókinni, en hvort bindi mun kosta 4.900 kr. Skákmenn eru hvattir til þess að skrá nafn sitt á þennan lista sem fyrst og ekki síðar en kl. 12 þann á morgun 18. febrúar.

Hægt er að skrá sig hér.

Lokapistill frá NM: Þrenn verðlaun og tæp 150 skákstig í hús Íslendinganna!

Gríðarlega spenna var fyrir lokaumferð Norðurlandamótsins í skólaskák sem lauk á sunnudaginn. Dagur Ragnarsson hlaut gullið eftir afar spennandi lokabaráttu í a-flokki. Baráttan var ekki síður spennandi í b-flokki en þar hlaut Jón Kristinn silfrið eftir magnaða lokaumferð. Óskar Víkingur Davíðsson náði svo silfrinu í e-flokki flokki með afar góðri skák. Almennt gekk vel hjá íslensku keppendum og koma alls 148 skákstig inn í íslenskt skákstigahagkerfi eftir mótið.

A-flokkur

Dagur var efstur ásamt hinum sænska Loar Olund fyrir lokaumferðina. Dagur tefldi við Mikael Jóhann en hinn sænski tefldi við Danann Rasmus Thorgeirsson. Samkvæmt útreikningum okkar benti flest til að hinn sænski myndi hljóta gullið eftir stigaútreikning yrðu þeir jafnir að vinningum.

Dagur fékk fljótt betra gegn Mikka og vann góðan sigur en Svíinn ólundarlegi lenti í ákveðnum vandræðum. Þó kom að því að því að á einum punkti gat hann nánast gert út um skákina. Honum yfirsást vinningsleikurinn, fórnaði þess í stað manni fyrir sókn en tapaði. Það var mikið fagnað þar sem íslensku keppendurnir komu saman saman og mælt með því að Rasmus þessi fengi orðu! 

Svíinn Olund var fremur ófarsæll á mótinu og tapaði niður unnum stöðum. Hann tók tapinu í lokaumferðinni með mikilli ólund og var alveg brjál að lokinni skák. Sló sjálfan sig hreinlega utan undir og sparkaði í vegg. Var hann meir og minna kallaður "ólundin" af Íslendingunum, sem minnir ef til vill á þegar Indónesískur skákmaður var kallaður "ótuktin" hér í den.

Frábær árangur hjá Degi sem var aðeins sjötti í stigaröð keppenda og hækkar um 92 stig fyrir frammistöðuna! Árangur hans á Skákþingi Reykjavíkur og Nóa Síríus-mótinu er greinilega engin tilviljun og sjálfsagt hjálpar það mikið til að koma sjóðheitur frá þessum tveimur af helstu lykilmótum íslensks skáklífs. Hugarfar Dags er til mikillar eftirbreytni, en það er einfaldlega hugarfar sigurvegarans!

Mikael Jóhann hlaut 3 vinninga og endaði í sjötta sæti. Tefldi um það bil á pari miðað við skákstig. Útsjónarsemi hans í jafnteflisskákinni gegn Olund var frábær. Síðasta mót Mikka á NM en hann var á elsta aldursári. Verður sárt saknað enda frábær félagi. 

B-flokkur

Spennan í b-flokkinum var gríðarleg. Lars Oskar Hauge, hinn norski, var efstur fyrir lokaumferðina með 4,5 vinning en Jón Kristinn og Oliver voru með vinningi minna. 

Jón Kristinn fékk verra tafl en eins og svo oft áður snéri hann taflinu sér í vil og hafði góðan sigur.

Oliver hafði hvítt gegn Hauge og tefldu þeir afar flókna skák. Oliver virtist hafa mjög vænlegt tafl og ef hann hefði unnið hefðu þeir orðið allir þrír orðið efstir. Hauge lagði hins vegar djöfullega gildru fyrir Oliver sem uggði ekki að sér og vann með útsmoginni drottningarfórn. 

Það var smá huggun harmi gegn að Hauge hefði samt náð gullinu eftir stigaútreikning þótt Oliver hefði unnið skákina. 

Jokkó varð annar með 4,5 vinning en Oliver endaði í fjórða sæti með 3,5 vinning. Sannarlega góður árangur hjá þessum efnilegu skákmönnum sem verður afar gaman að fylgjast með á næstu árum.

C-flokkur.

Björn Hólm vann öruggan sigur í lokaumferðinni og endaði með 3,5 vinning og í sjötta sæti. Það er afar góður árangur hjá skákmanni á sínu fyrsta NM. Eins og tvíburabróðir sinn hefur Björn verið í mikilli framför síðustu misserin og á enn eftir að eflast. Í senn vandaður og taktískur skákmaður. Hilmir Freyr bjargaði gjörtapaðri stöðu í jafntefli og endaði með 1 vinning. Góð barátta hjá Hilmi en þegar svo illa gengur eins og gekk hjá Hilmi geta menn auðveldlega lyppast niður. Hann stóð hins vegar í lappirnar og gat gengið beinn í baki frá mótinu. Hann getur hins vegar miklu miklu meira en hann sýndi og vonandi búinn að tefla sig í gang fyrir Reykjavíkurskákmótið. Hilmi er sérstaklega þakkað fyrir framlag sitt í fótboltamótinu þar sem hann var yfirburðamaður. 

D-flokkur

Vignir tapaði fyrir sigurvegara flokksins í lokaumferðinni. Komst aldrei almennilega í takt í skákinni en sýndi þó fína baráttu.

Micha lék af sér manni og tapaði örugglega. Báðir fengu þeir 3 vinninga. Þeir félagarnir enduðu í 6. og 7. umferð.

Vignir getur meira en hann sýndi enda verið á palli á NM síðustu þrjú árin. Flokkurinn var þó afar þéttur núna og andstæðingar hans einfaldlega sterkir skákmenn. Vignir er afar taktískur skákmaður og þarf ef til vill að reyna að komast í taktískari stöður út úr byrjununum. Micha er á gríðarlegri uppleið í skákinni og sýndi fína endataflstakta. Hann þarf þó að slípast nokkuð til. Sérstaklega skemmtilegur piltur sem brosir við hvert tækifæri.

E-flokkur

Óskar Víkingur vann góðan sigur í lokaumferðinni þar sem hann sýndi afburðaskilning á endatafli. Hlaut 4 vinninga og annað sætið staðreynd. Glæsilegt hjá Óskari sem á enn eitt ár eftir í flokknum.

Róbert Luu hlaut 2,5 vinninga og endaði í áttunda sæti. Róberti vantar smá reynslu en er mjög vandaðan skákstíl og á örugglega oft eftir að tefla fyrir Íslands hönd. 

Árangurinn

Árangurinn var heilt yfir ágætur. 33 vinningar af 60 mögulegum og 148 stig í plús segja margt um það! 

Ekki tókst samt að verja gullið sem fór í hendur Dana. Það er samt engu að síður nokkuð merkilegt að sjö af tíu keppendum Íslands eiga eitt ár til góða í sínum flokki - sem segir að við ættum að geta komið afar sterkir til leiks að ári!

Lokahófið

Í lok mótsins var haldin lokaathöfn. Færeyingarnir buðu upp á ljúffengt nautakjöt og ís í eftirrétt. Sjónvarpið (Kringvarpið) mætti á staðinn og tók m.a. viðtal við Dag Ragnarsson sem sýnt var í sjónvarpinu í kvöld. Tengil frá umfjölluninni má finna hér.

Í lokahófinu var boðið upp á færeyska þjóðdansa og tókum við Erla mamma Óskars Víkings, Micha og Óskar Víkingur þátt í þeim.

Rúnar Berg kom og kíkti á okkur og gaf ráð við stúderingar. Rúnar sækir sjóinn frá Klakksvík um þessar mundir.

Mótshaldið var flott hjá Færeyingum. Boðið upp á fínar aðstæður og allar skákir mótsins sýndar beint. Hluti Íslendinganna bjuggu við fínan kost í einbýlishúsi rétt hjá hótelinu á meðan aðrir bjuggu þar. 

Vinum vorum Færeyingum færi ég miklar þakkir fyrir flott mótshald. Íslensku keppendum þakka ég skemmtilega helgi. Hópurinn sem fór út samanstendur af flottum strákum sem standa saman allir sem einn og stóðu þétt við bak hvers annars. Það er alls ekki sjálfsagt að hópur tíu ungmenna á mismunandi aldri passi jafnvel saman og ekkert vesen á einum eða neinum. 

Eldri drengjunum má sérstaklega hrósa fyrir faglega og metnaðarfulla nálgun við skákina.

Gunnar Björnsson

Minningargrein um Jorge Fonseca

Fyrir tæpum tíu árum síðan bárust fréttir af kátum Spánverja sem bakaði menn í hraðskák á öldurhúsum bæjarins með bros á vör. Það voru okkar fyrstu kynni af hinum ævintýragjarna og brosmilda eðaldreng frá Salamanca, Jorge Rodriguez Fonseca. Það rann hægt í honum blóðið en allir sem kynntust honum voru fljótir að átta sig á því að þar var á ferð einstök mannvera.

Jorge var fæddur 16. september 1976 og ólst upp í Salamanca og flutti á unglingsárum til Madrid þar sem faðir hans starfaði sem kennari. Hann menntaði sig á Spáni og í Belgíu og útskrifaðist sem stærðfræðingur. Hann starfaði síðan sem forritari og sá um gagnagrunna, mestmegnis hjá Applicon. Hann lætur eftir sig unnustu, systur og foreldra.

Hann var gallharður aðdáandi Real Madrid og hélt ávallt með því landsliði sem skipaði fram flestum leikmönnum félagsins. Hann bjó alla sína Íslandstíð í Vesturbænum, fyrst á Víðimel og svo Flyðrugranda. Hann var mikill Vesturbæingur og ekki kom annað til greina en að styðja KR og mætti hann gjarna á körfuboltaleiki í Frostaskjólinu.

Jorge var mikill rokkunnandi og eftir bílferð á hraðskákmót Íslands í Bolungarvík þar sem hann réð tónlistinni eftir að hafa heyrt Airport með Ham lét hann það ganga það sem eftir lifði ferðar (frá Borgarnesi til Bolungarvíkur og aftur til baka) og varð í kjölfarið mikill aðdáandi þessarar mætu sveitar.

Hann var þrefaldur sigurvegari Íslandsmótsins í kotru og var jafnframt stigahæsti kotruspilari landsins. Hann tók þátt í mörgum skákmótum hérlendis og lenti m.a. í 2.-6. sæti Áskorendaflokks Skákþings Íslands 2009 og háði aukakeppni við mikla meistara um sæti í landsliðsflokki. Hann sigraði líka b-flokk Haustmóts TR árið 2008. Helst vann hann það sér þó til frægðar við skákborðið að sigra Jóhann Hjartarson á Íslandsmóti skákfélaga árið 2009.

Með miklum trega kveðjum við kæran vin, litla fína Salamancaboddíið Jorge Fonseca. Hann mun alltaf eiga sér stað í hjarta okkar. Bless kæri vinur.

Erfidrykkja fer fram á miðvikudagskvöld kl. 18.00 á Rio Sportbar Hverfisgötu 46 og eru allir sem vilja votta Jorge virðingu sína hvattir til að mæta.

Fyrir hönd Kotrusambands Íslands, Skákdeildar Hauka og Vinaskákfélagsins,

Árni Þorvaldsson

Bjarni Freyr Kristjánsson

Ingi Tandri Traustason

Stefán Freyr Guðmundsson

Jóhann Arnar sigraði á þriðja móti Bikarsyrpunnar.

 

Það var hart barist í lokaumferðum þriðja mótsins í Bikarsyrpu Taflfélags Reykjavíkur sem lauk í dag. Fyrir lokaumferðina var Aron Þór Mai, sigurvegarinn úr Bikarsyrpu 2 einn efstur með fullt hús, fjóra vinninga af fjórum mögulegum. Tveir keppendur þeir Jóhann Arnar Finnsson og Halldór Atli Kristjánsson komu næstir hálfum vinning á eftir. Átta keppendur voru með þrjá vinning fyrir lokaumferðina og því ljóst að margir áttu kost á verðlaunasæti.

Það var því spennuþrungið andrúmsloft þegar ungu meistararnir hófu tafl seinnipartinn í dag. Jóhann Arnar og Aron Þór mættust þá og ljóst að sigurvegarinn úr þeirri viðureign myndi sigra mótið.

Það er skemmst frá því að segja að Jóhann stýrði hvítu mönnunum til sigurs og sigraði því þriðja mót syrpunnar með 4 ½ vinning. Halldór Atli gerði engin mistök gegn Jason Andra Gíslasyni og sigraði örugglega. Þar með skaust hann upp fyrir Aron Þór og í annað sætið, jafn Jóhanni Arnar að vinningum en neðar á stigum. Fimm keppendur enduðu með fjóra vinninga og af þeim varð Aron Þór efstur á stigum og hlaut bronsið.

Ellefu keppendur luku keppni með 3 vinninga sem er til marks um hve jafnt og skemmtilegt mótið var. Nokkrir ungir keppendur sem voru að taka þátt í sínu fyrsta móti voru með og þótt vinningarnir hafi kannski ekki orðið margir þá gengu þeir frá borði reynslunni ríkari.

Í heild gékk mótið afar vel og skemmtilegt að sjá þær miklu framfarir sem margir sýndu frá því að fyrsta mótið var haldið í haust. Einnig er mjög ánægjulegt að sjá síaukinn fjölda ungra skákmanna taka þátt mót frá móti. Lokamót syrpunnar fer fram í byrjun maí og þá kemur í ljós hver verður Bikarsyrpumeistari Reykjavíkur 2015.

Bikarsyrpa Taflfélagsins hefur fengið frábærar viðtökur og þar keppa jafnt reynsluboltar sem og þeir krakkar sem eru að stíga sín fyrstu spor í kappskákmótum. Tímamörkin 30 mínútur +30 sek á leik henta þessum hóp afar vel. Mótið uppfyllir öll skilyrði alþjóðaskáksambandsins FIDE og er reiknað til alþjóðlegra og íslenskra skákstiga.

Nánari úrslit og lokastöðu mótsins má finna hér

Fjöldi mynda frá mótinu mun fljótlega verða aðgengilegur á síðu félagsins sem og á facebooksíðu þess. 

Það er síðan ekkert lát á öflugu mótahaldi Taflfélags Reykjavíkur, en næstkomandi sunnudag fer fram Barna-, unglinga- og stúlknameistaramót Reykjavíkur í skákhöllinni.  Fastlega má gera ráð fyrir að margir af þeim efnilegu krökkum sem tóku þátt í Bikarsyrpunni muni þá spreyta sig að nýju á reitunum 64!

Barna- og unglingam.mót Rvk fer fram sunnudaginn 22. febrúar

Barna- og unglingameistaramót Reykjavíkur, sem og Stúlknameistaramót Reykjavíkur, fer fram sunnudaginn 22. febrúar í félagsheimili T.R. Faxafeni 12.

Taflið hefst kl.14 og stendur til ca. kl. 18. Tefldar verða 7 umferðir eftir svissnesku kerfi með umhugsunartímanum 15 mín. á skák.  

Teflt verður í tveimur flokkum: opnum flokki og stúlknaflokki.

Verðlaun verða veitt fyrir þrjú efstu sætin í mótinu og þar fyrir utan hlýtur sigurvegarinn titilinn Unglingameistari Reykjavíkur 2015, sé hann búsettur í Reykjavík eða félagi í reykvísku taflfélagi.

Einnig verða veitt verðlaun fyrir þrjár efstu stúlkurnar og þar fyrir utan hlýtur efsta stúlkan titilinn Stúlknameistari Reykjavíkur 2015, sé hún búsett í Reykjavík eða félagi í reykvísku taflfélagi.

Til viðbótar verða veitt verðlaun fyrir efsta sætið í aldursflokkum 13-15 ára (1999-2001), 11-12 ára (2002-2003), 9-10 ára (2004-2005) sem og 8 ára og yngri (2006-) í báðum flokkum (opna flokknum og stúlknaflokknum). 

Mótið er opið öllum krökkum 15 ára og yngri (fædd 1999 og síðar). 

Núverandi Reykjavíkurmeistarar eru Vignir Vatnar Stefánsson og Veronika Steinunn Magnúsdóttir. 

Skákmótið hefst kl. 14 og er aðgangur ókeypis. 

Skráning fer fram hér. 

Skráðir keppendur.

Dagur Ragnarsson Norðurlandameistari í skólaskák!

Dagur Ragnarsson varð rétt í þessu Norðurlandameistari í skólaskák í flokki 18-20 ára sem fram fór í Klaksvík í Færeyjum um helgina. Glæsilegur árangur hjá pilti sem hefur átt hverja aðra stjörnuframmistöðuna síðustu mánuði. 

Jón Kristinn Þorgeirsson, fékk silfur í flokki 16-17 ára og Óskar Víkingur Davíðsson fékk silfur í flokki 10 ára og yngri.

Verðlaunaafhending kl. 21. Nánari frétt síðar.

NM í skólaskák- pistill nr. 5

Lokaumferð NM í skólaskák hófst nú kl. 16. Íslensku keppendunum hefur heilt yfir gengið vel yfir og þó sérstaklega í eldri flokkunum. Í a-flokki er alíslensk viðureign á fyrsta borð og í b-flokki eru Íslendingar á 1. og 2. borði. Í d-flokki er svo Íslendingur á fyrsta borði. Íslendingar eru fjórða sæti en þó aðeins hálfum vinningi á eftir efstu þjóðum.  Vonskuveður er í Klaksvík og vart stætt á milli húsa. Rennum yfir stöðu mála í hverju flokki.

A-flokkur

Dagur gerði öruggt jafntefli við Högna hinn færeyska. Mikki tefldi skák umferðarinnar og fékk koltapað gegn Loar Olund sem hélt áfram að sýna ólund og neitaði að kvitta fyrir úrslitin að skák lokinni eftir að Mikki hafði bjargað jafntefli á ævintrýalegan hátt.

Dagur er efstur ásamt Olund með 4 vinninga. Sá sænski virðist standa heldur að vígi en stigaútreikningur gildir verði menn jafnir og þar stendur sá sænski heldur betur að vígi en Dagur. Mikki er í fjórða sæti með 3 vinning.

Dagur og Mikki tefla í dag.

B-flokkur

Góður dagur í b-flokki. Oliver vann öruggan sigur en Jokko þurfti meira að hafa fyrir hlutunum. Fékk nánast óteflandi stöðu og fórnaði skiptamuni til að blíðka goðin. Jokko snéri á Svíann í tímahrakinu og vann frábæran sigur.

Jokko og Oliver er í 2.-3. sæti. Oliver teflir við stigahæsta mann mótsins Lars Oskar Hauge (2362) en Jokko teflir við Finna með tæp 2000 stig. Lars Oskar er vinningi á undan þeim.

Spennandi umferð framundan.

C-flokkur.

Hilmir Freyr og Björn Hólm lentu báðir í erfiðleikum og þrátt fyrir hetjulega vörn tókst hvorugum þeirra að halda sínum hluta. Björn hefur 2,5 vinning en Hilmir hefur 0,5 vinning. Vinni Björn Hólm hefur hann afar veik von um verðlaunasæti en þó þurfa önnur úrslit að vera afar hagstæð.

D-flokkur

Vignir gerði fínt jafntefli gegn sterkum andstæðingi og Micha vann afar góðan sigur. Sá síðarnefndi er afar seigur í endatöflum.

Vignir og Micha hafa 3 vinninga og eru í 3.-6. sæti. Sigur gæti tryggt þeim verðlaunasæti.

E-flokkur

Óskar Víkingur gerði afar gott jafntefli við undrabarnið Jonas Bjerra (2216) en Róbert tapaði.

Óskar hefur 3 vinninga og er í 3.-6. sæti. Sigur mun að öllum líkindum tryggja honum verðlaunasæti. Róbert hefur 1,5 vinning.

Samtals

1-2: Denmark, Norway: 29 points

3: Sweden 28

4: Iceland 27½

5: Finland 22½

6: Faroes 14

Sjötta og síðasta umferð hófst kl. 16.

Dagur efstur í a-flokki

Dagur Ragnarsson heldur áfram að gera góða hluti í a-flokki NM í skólaskák. Í síðari skák dagsins gerði hann jafntefli við sænska FIDE-meistarann Roar Olund (2291) í mikilli baráttuskák. Dagur er í 1.-2. sæti ásamt Svíanum með 3,5 vinning. Olund sýndi af sér töluverða ólund í lok skákarinnar þegar hann neitaði að taka í hönd Dags.

Dagur var lengi í vörn í skákinni og um tíma leit út fyrir að hann þyrfti að berjast með hróki gegn hróki og biskupi en andstæðingurinn lék af sér manni áður en til þess kæmi. Hefði verið nokkuð magnað ef það hefði gerst tvær skákir í röð hjá honum að upp hefði komið hrókur og biskup gegn hróki. Dagur vann slíkt endatafli í þriðju umferð, sem er teóríkst jafntefli en erfitt að verja, en losnaði við vörnina í dag. Mikael er í fjórða sæti með 2,5 vinning og tefla þeir félagarnir á 1. og 2. borði á morgun ákaflega mikilvægar skákir við stigahæstu menn mótsins. Dagur við Högna Nielsen (2372), Færeyjameistara í skák og stigahæsta mann mótsins við Mikki við Olund.

B-flokkur

Jón Kristinn og Oliver gerðu jafntefli í dag í innbyrðisskák. Þeir hafa 2,5 vinning og eru í 3.-6. sæti. 

Báðir í góðum verðlaunamöguleikum með góðum úrslitum á morgun.

C-flokkur:

Björn Hólm gerði jafntefli í dag en Hilmir Freyr tapaði. Björn hefur 2 vinninga og er í áttunda sæti en Hilmir er í 11. sæti með 0,5 vinning. Góð úrslit geta fleytt þeim upp töfluna. Björn er t.d. aðeins hálfum vinningi frá verðlaunasæti og Hilmir á mikið inni.

D-flokkur:

Vignir Vatnar vann góðan sigur með svörtu í dag og er í 5. sæti. með 2,5 vinning. Micha tapaði þrátt fyrir góða takta og er í 6.-7. sæti með 2 vinninga. Gaman er að sjá hvað Micha hefur fram í tímanotkun á mótinu. og við það verður taflmennskan mun vandaðri. Enn má þó nýta tímann betur! 

Góð úrslit fyrir þá félaga þýðir baráttu um verðlaunasæti.

E-flokkur 

Óskar Víkingur gerði jafntefli í dag og er í 3.-4. sæti með 2,5 vinning. Óskar hafði vænlegt tafl og missti af vinningsleið. Róbert Luu vann í dag - hans fyrsti sigur á Norðurlandamóti! Hann hefur 1,5 vinning og er í 8.-10. sæti. 

Óskar fær erfiðan andstæðing á morgun eða Jonas Bjerre sem hefur 2216 skákstig þrátt fyrir aðeins 10 ára aldur!

Fótboltinn

Í kvöld var landskeppni í fótbolta. Þar komu Íslendingu sáu og sigruðu og að öðrum ólöstuðum var Hilmir Freyr besti maður liðsins. 

Fimmta umferð hefst kl. 10. 

• Heimasíða mótsins
• Chess-Results
• Beinar útsendingar
• Myndaalbúm (GB) 
• Chessbomb