Gunnar Freyr með jólabikarinn í Vin

Fimmtán þátttakendur skráðu sig á jólamót Vinjar, sem Skákfélag Vinjar og Hrókurinn héldu í dag, mánudag klukkan 13.00.  Tefldar voru sex umferðir, sjö mínútur á mann og barist var um glæsilegan bikar sem Hrókurinn gaf.

Róbert Harðarson sem var skákstjóri hafði flesta vinninga eða fimm og hálfan, vann allar sínar skákir nema við Björn Sölva Sigurjónsson. En Róbert var gestur á mótinu og fékk engan bikar.
Gunnar Freyr Rúnarsson fékk fjóra og hálfan vinning og hampaði bikarnum. Með fjóra vinninga voru Björn Sölvi, Pétur Atli Lárusson og Rafn Jónsson.

Guðmundur Valdimar Guðmundsson og Arnljótur Sigurðsson voru með þrjá og hálfan og aðrir minna.
Að loknum fjórum umferðum var boðið upp á kaffi og vöfflur, smákökur og fleira svo það var fítonskraftur í öllum í lokin. Alveg fram yfir verðlaunaafhendingu en allir þátttakendur fengu vinning frá bóka- og tónlistarútgáfunni SÖGUR og voru lukkulegir með það.