Íslandsmót skákfélaga hefst í kvöld

Íslandsmót skákfélaga hefst í kvöld föstudaginn 25. september.   Um er að ræða stærstu skákkeppni hvers árs þar sem um 400 skákmenn tefla í einu!  Það sem gerir þessa keppni svo einstaka að þarna má finna ofurstórmeistarar og allt niður í byrjendur. 

Flestir íslensku stórmeistararnir taka þátt og má þar nefna Jóhann Hjartarson, Jón L. Árnason og Þröst Þórhallsson sem tefla fyrir Bolvíkinga, Hannes Hlífar Stefánsson sem teflir fyrir Helli, Héðin Steingrímsson sem teflir fyrir Fjölni,  Helga Ólafsson sem teflir fyrir Eyjamenn og sjálfan Íslandsmeistarann Henrik Danielsen sem teflir fyrir Hauka.

Núverandi Íslandsmeistarar eru Bolvíkingar og flestir spá þeim sigri í ár.  Líklegastir til að veita þeim keppni eru Eyja- og Hellismenn.  Einnig er búist við harðri baráttu um sigur í 2, 3. og 4. deild.  Í fjórðu deild tekur skákklúbburinn ÓSK þátt í fyrsta sinn en um er að ræða skákfélag eingöngu skipað konum.

Um helgina eru tefldar 4 umferðir af 7.  Keppnin fer fram í Rimaskóla og hefst kl. 20 annað kvöld. Henni er svo framhaldið á laugardag með tveimur umferðum (11-15 og 17-21) og líkur fyrri hlutanum á sunnudag (kl. 11-15).

Sjá nánar:

• Heimasíða SÍ
• Chess-Results
• Pistill og spá ritstjóra um úrslit